ജനജീവിതത്തെ ദുരിതത്തിലാഴ്ത്തി ചെന്നൈയില്‍ കനത്ത മഴ വീണ്ടും തുടരുന്നു. ഉച്ചവരെ മഴയ്ക്ക് ശമനമുണ്ടായിരുന്നിടത്ത് ഉച്ചയ്ക്ക് ശേഷം വീണ്ടും കനത്ത മഴ പെയ്തുതുടങ്ങി. റോയപേട്ട്, മൗണ്ട് റോഡ്, താംബരം, ചെങ്കല്‍പ്പേട്ട് എന്നിവടങ്ങളിലാണ് കനത്ത മഴ പെയ്യുന്നത്. അടുത്ത 48 മണിക്കൂറിലേക്ക് മഴ പെയ്യില്ലെന്ന് കാലാവസ്ഥ നിരീക്ഷണ കേന്ദ്രം അറിയിച്ചതിനു പിന്നാലെയാണ് ശക്തമായ മഴ വീണ്ടും പെയ്തു തുടങ്ങിയത്. ജനജീവിതം സാധാരണ നിലയിലേക്ക് കൊണ്ടു വരാനുള്ള ശ്രമങ്ങള്‍ക്ക് ഇതു തിരിച്ചടിയായി. മഴ ശക്തമായത് രക്ഷാപ്രവര്‍ത്തനത്തെയും ബാധിച്ചിട്ടുണ്ട്.

ഇതുവരെ ഒരു ലക്ഷത്തിലധികം പേരെ സുരക്ഷിതസ്ഥാനങ്ങളിലേക്ക് മാറ്റി. നഗരത്തിന്റെ പല ഭാഗങ്ങളും വെള്ളപ്പൊക്കത്തിലാണ്. നിരവധി പേര്‍ ഭക്ഷണവും കുടിവെള്ളവുമില്ലാതെ വീടിനുള്ളില്‍ അകപ്പെട്ടിരിക്കുകയാണ്. ഇവരെ രക്ഷപ്പെടുത്താനുള്ള ശ്രമങ്ങള്‍ തുടരുകയാണ്. കരസേനയും നാവികസേനയും ദേശീയ ദുരന്തനിവാരണസേനയും രക്ഷാപ്രവര്‍ത്തനത്തിനായി രംഗത്തുണ്ട്.

ആഭ്യന്തര വിമാനക്കമ്പനികളായ എയര്‍ ഇന്ത്യ, ഇന്‍ഡിഗോ, സ്‌പൈസ്‌ജെറ്റ്, ട്രൂജെറ്റ് എന്നിവയെല്ലാം ആറക്കോണത്തെ നാവിക താവളത്തില്‍ നിന്നും വിമാനസര്‍വീസുകള്‍ നടത്തിവരുന്നുണ്ട്. റെയില്‍വെ ചെന്നൈ ബീച്ചില്‍ നിന്ന് ആറക്കോണത്തെ നാവിക താവളത്തിലേക്ക് ഷട്ടില്‍ സര്‍വീസ് നടത്തുന്നുണ്ട്. കര,നാവിക,വ്യോമസേനകളും കോസ്റ്റുഗാര്‍ഡും രക്ഷാപ്രവര്‍ത്തനത്തില്‍ സജീവമാണ്.  വ്യോമസേനയുടെ ഹെലിക്കോപ്ടറുകള്‍ ഭക്ഷണവും മരുന്നും ആകാശത്ത് നിന്ന് താഴേക്ക് ഇട്ടുകൊടുക്കുന്നുണ്ട്. ശനിയാഴ്ച ഉച്ചയോടെ ചെന്നൈ വിമാനത്താവളത്തിന്റെ പ്രവര്‍ത്തനം പുനരാരംഭിച്ചേക്കും. റണ്‍വേയിലെ ചെളിനീക്കം ചെയ്തുകഴിഞ്ഞു.

കേരളത്തില്‍ നിന്ന് തമിഴ്‌നാട്ടിലേക്ക് ഇന്ന് രാത്രിയും ആറക്കോണത്ത് നിന്ന് നാളെ ഉച്ചയ്ക്ക് മംഗലാപുരത്തേക്ക് തിരിച്ചും രണ്ട് സ്‌പെഷല്‍ ട്രെയിനുകള്‍ സര്‍വീസ് നടത്തും. ഇന്ന് രാത്രി 9: 10ന് ഗുരുവായൂരില്‍ നിന്ന് വില്ലുപുരത്തേക്ക് പ്രത്യേക ട്രെയിന്‍ പുറപ്പെടും. തിരുനല്‍വേലി, മധുര വഴിയായിരിക്കും ഈ ട്രെയിന്‍ സര്‍വീസ് നടത്തുക. മംഗലാപുരത്ത് നിന്ന് ആറക്കോണത്തേക്കുള്ള പ്രത്യേക തീവണ്ടി രാത്രി എട്ട് മണിക്ക് പുറപ്പെടും. ഈ തീവണ്ടിക്ക് കാസര്‍കോട്, കണ്ണൂര്‍, കോഴിക്കോട്, ഷൊര്‍ണൂര്‍, പാലക്കാട് എന്നിവടങ്ങളില്‍ സ്‌റ്റോപ്പുണ്ടാകും

നാളെ(ശനിയാഴ്ച) ഉച്ചയ്ക്ക് ആറക്കോണത്ത് നിന്ന് പ്രത്യേക തീവണ്ടി മംഗലാപുരത്തേക്ക് യാത്രതിരിക്കും. മേല്‍പ്പറഞ്ഞ സ്‌റ്റോപ്പുകളിലെല്ലാം ഈ തീവണ്ടിയും നിര്‍ത്തുന്നതായിരിക്കും.

കെ.എസ്.ആര്‍.ടി.സി ഓരോ മണിക്കൂറും ഇടവിട്ട് ചെന്നൈയില്‍ നിന്ന് പാലക്കാട്ടേക്ക് സര്‍വീസ് നടത്തും. തിരുവനന്തപുരത്തേക്കും തൃശൂരേക്കും കെ.എസ്.ആര്‍.ടി.സി സര്‍വീസ് ഏര്‍പ്പെടുത്തിയിട്ടുണ്ട്. ഈ ബസ്സുകളില്‍ നാട്ടിലേക്ക് പോകാന്‍ ആഗ്രഹിക്കുന്നവര്‍ കോയമ്പേട് സി.എം.സി ബസ് സ്റ്റാന്‍ഡിലെ 4,5 ബസ് ബേകളില്‍ എത്തിച്ചേരണം.

ചെന്നൈ എഗ്മോറിലെ കേരള ഹൗസില്‍ കെ.എസ്.ആര്‍.ടി.സി പ്രത്യേക കൗണ്ടര്‍ തുറന്നിട്ടുണ്ട്. ബന്ധപ്പെടാന്‍ ഫോണ്‍: 9176112100

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha