വിവാദങ്ങള്‍ ആസൂത്രിതം. ദാദ്രിയിലെ മുഹമ്മദ അഖ്‌ലാഖിന്റെ വീട്ടിലെ ഫ്രിഡ്ജില്‍ സൂക്ഷിച്ചിരുന്നത് ആട്ടിറച്ചിയെന്നു പരിശോധനാ റിപ്പോര്‍ട്ട്. പശുവിനെ കൊന്നെന്നും ഗോമാംസം കഴിച്ചുവെന്നും ആരോപിച്ചാണ് ഉത്തര്‍ പ്രദേശിലെ ദാദ്രിയില്‍ മുഹമ്മദ് അഖ്‌ലാഖിനെ മര്‍ദിച്ചുകൊന്നത്.
യുപി സര്‍ക്കാരിന്റെ വെറ്റിനറി വകുപ്പാണ് ഫ്രിഡ്ജില്‍ സൂക്ഷിച്ചിരുന്നത് ആട്ടിറച്ചിയാണെന്ന റിപ്പോര്‍ട്ട് പുറത്തുവിട്ടത്. പശുവിനെ കൊന്ന് ഗോമാംസം കഴിച്ചുവെന്നാരോപിച്ച് സെപ്റ്റംബര്‍ 28നാണ് മുഹമ്മദ് അഖിലാഖിനെ മര്‍ദ്ദിച്ചു കൊന്നത്.
സമീപത്തെ ക്ഷേത്രത്തില്‍ നിന്നുള്ള അനൗണ്‍സ്‌മെന്റിനെ തുടര്‍ന്നാണ് അക്രമികള്‍ മുഹമ്മദിന്റെ വീട്ടിലെത്തിയത്. പ്രാദേശിക ബിജെപി നേതാവിന്റെ മകന്‍ വിശാല്‍ റാണ അടക്കം പതിനഞ്ച് പേരാണ് കേസിലെ പ്രതികള്‍. കൊലപാതകം ആസൂത്രിതമാണെന്ന വാദം ശരിവയ്ക്കുന്നതാണ് വെറ്റിനറി വകുപ്പിന്റെ റിപ്പോര്‍ട്ട്.
സമീപത്തെ ക്ഷേത്രത്തിലെ പശുവിനെ മുഹമ്മദ് അഖ്‌ലാഖ് മോഷ്ടിച്ച് കൊന്നുവെന്നായിരുന്നു അക്രമികളുടെ വാദം. പശുവിനെ കൊന്നുവെന്ന് അഭ്യൂഹം പ്രചരിപ്പിച്ചത് വിശാല്‍ റാണയുടെയും ബന്ധു ശിവത്തിന്റെയും നേതൃത്വത്തിലാണെന്നും കുറ്റപത്രം പറയുന്നുണ്ട്. മുഹമ്മദ് അഖ്‌ലാഖിനെ കൊന്നത് പശുവിനെ കൊന്നതെന്ന കേട്ടുകേള്‍വിയെ തുടര്‍ന്നാണെന്നു മുഖ്യപ്രതി ഏറ്റുപറഞ്ഞതായുള്ള റിപ്പോര്‍ട്ടുകള്‍ നേരത്തെ പുറത്തുവന്നിരുന്നു. മുഹമ്മദ് അഖ്‌ലാഖ് പശുവിനെ കൊന്നതായി ചിലര്‍ പറഞ്ഞിരുന്നു. ഇതിന്റെ തുടര്‍ച്ചയായിട്ടാണ് അഖ്‌ലാഖിനെ കൊലപ്പെടുത്തിയത് മുഖ്യപ്രതി വിശാല്‍ റാണ പറഞ്ഞതായി കുറ്റപത്രത്തില്‍ പറയുന്നുണ്ട്.
പശുവിറച്ചി കഴിച്ചെന്നും വീട്ടില്‍ സൂക്ഷിച്ചെന്നും ആരോപിച്ച് മുഹമ്മദ് അഖ്‌ലാഖിനെ അടിച്ചുകൊല്ലുകയും മകനെ മാരകമായി പരിക്കേല്‍പ്പിക്കുകയും ചെയ്തിരുന്നു. ഒരു കുട്ടി ഉള്‍പ്പെടെ 15 പേരാണ് പ്രതികള്‍. പശുക്കിടാവിനെ കൊന്നതായി ഗ്രാമത്തിലെ ക്ഷേത്രത്തില്‍ നിന്നാണ് അറിയിപ്പുണ്ടായത്. ക്ഷുഭിതരായ ജനക്കൂട്ടം അഖ്‌ലാഖിനെ വീട്ടില്‍ നിന്നു വലിച്ചിറക്കി അടിച്ചുകൊല്ലുകയും ഇളയമകന്‍ ഡാനിഷിനെ ഭീകരമായി മര്‍ദിക്കുകയും ചെയ്യുകയായിരുന്നു. വന്‍ വിവാദത്തിനും പ്രതിഷേധത്തിനുമാണ് ഈ സംഭവം കാരണമായത്.
പശുവിനെ കൊന്നാലും തല്ലിക്കൊല്ലുകയാണോ വേണ്ടതെന്ന ചോദ്യവും ഉയര്‍ന്നിരുന്നു. നിയമപരമായ ശിക്ഷ നേടിക്കൊടുക്കാതെ കേട്ടപാതി കേള്‍ക്കാത്ത പാതി അഖ്‌ലഖിന്റെ വീട് ആക്രമിച്ചത് ആസൂത്രിതമെന്ന വാദം ഉയര്‍ന്നിരുന്നു. ഇക്കാര്യം ശക്തിപ്പെടുത്തുന്നതാണ് പരിശോധനാഫലം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha