ഉത്തര്‍പ്രദേശിലെ മുറാദാബാദ് ലോക്സഭാ മണ്ഡലത്തിലെ ബിജെപി പാര്‍ട്ടി സ്ഥാനാര്‍ത്ഥി കുന്‍വര്‍ സര്‍വേഷ് സിംഗ് അന്തരിച്ചു. ഡല്‍ഹിയിലെ എയിംസില്‍ വൈകുന്നേരം 6.30 ഓടെയായിരുന്നു സിംഗ് മരിച്ചത്. ലോക്സഭാ തിരഞ്ഞെടുപ്പിന്റെ ആദ്യഘട്ടത്തില്‍ മുറാദാബാദ് സീറ്റില്‍ വെള്ളിയാഴ്ചയാണ് വോട്ടെടുപ്പ് നടന്നത്. അന്തരിച്ച ബിജെപി സ്ഥാനാര്‍ത്ഥി ആരോഗ്യസ്ഥിതി കാരണം തിരഞ്ഞെടുപ്പ് പ്രചാരണങ്ങളില്‍ പങ്കെടുത്തിരുന്നില്ല.

'കുന്‍വര്‍ സര്‍വേശ് കുമാര്‍ അന്തരിച്ചു, അദ്ദേഹത്തിന് തൊണ്ടയില്‍ എന്തോ പ്രശ്നമുണ്ടായിരുന്നു, ഓപ്പറേഷന്‍ നടത്തി. ഇന്നലെ, അദ്ദേഹം പരിശോധനയ്ക്കായി എയിംസില്‍ പോയിരുന്നു.' യുപി ബിജെപി അധ്യക്ഷന്‍ ഭൂപേന്ദ്ര ചൗധരി വാര്‍ത്താ ഏജന്‍സിയായ പിടിഐയോട് പറഞ്ഞു.അതേസമയം, യുപി മുഖ്യമന്ത്രി യോഗി ആദിത്യ നാഥ് സോഷ്യല്‍ മീഡിയയില്‍ അനുശോചനം രേഖപ്പെടുത്തി.

മുറാദാബാദ് ലോക്സഭാ മണ്ഡലത്തിലെ ബിജെപി സ്ഥാനാര്‍ത്ഥിയും മുന്‍ എംപിയുമായ കുന്‍വര്‍ സര്‍വേഷ് സിംഗ് ജിയുടെ വിയോഗം എന്നെ ഞെട്ടിച്ചു. ബിജെപി കുടുംബത്തിന് ഇത് നികത്താനാവാത്ത നഷ്ടമാണ്. എന്റെ അനുശോചനം ദുഃഖിതരായ കുടുംബത്തോടൊപ്പമുണ്ട്. പരേതനായ ശ്രീരാമന്റെ പാദങ്ങളില്‍ ഇടം നല്‍കാനും ഈ വിയോഗം താങ്ങാന്‍ അവരുടെ കുടുംബത്തിനും അവരെ പിന്തുണയ്ക്കുന്നവര്‍ക്കും ശക്തി നല്‍കാനും ഞാന്‍ ഭഗവാന്‍ രാമനോട് പ്രാര്‍ത്ഥിക്കുന്നു,'യോഗി ആദിത്യനാഥ് എക്സില്‍ കുറിച്ചു.

കുന്‍വര്‍ സര്‍വേഷ് സിംഗ് ഒരു വ്യവസായിയും ഉത്തര്‍പ്രദേശിലെ പാര്‍ട്ടിയുടെ ശക്തനായ നേതാവുമായിരുന്നു. എംപിയാകുന്നതിന് മുമ്പ് അദ്ദേഹം താക്കൂര്‍ദ്വാര അസംബ്ലി സീറ്റില്‍ നിന്ന് നാല് തവണ എംഎല്‍എയായി തിരഞ്ഞെടുക്കപ്പെട്ടു. സര്‍വേഷ് കുമാറിന്റെ മകന്‍ കുന്‍വര്‍ സുശാന്ത് സിംഗ് മുറാദാബാദ് ലോക്സഭയില്‍ വരുന്ന ബദാപൂര്‍ നിയമസഭാ സീറ്റില്‍ നിന്നുള്ള എംഎല്‍എയാണ്.

2014ല്‍ കാന്ത് നിയമസഭാ മണ്ഡലത്തിലെ ഉച്ചഭാഷിണി വിവാദത്തിലും സര്‍വേഷ് കുമാര്‍ വാര്‍ത്തകളില്‍ നിറഞ്ഞിരുന്നു.ലോക്സഭാ തിരഞ്ഞെടുപ്പിന്റെ ആദ്യഘട്ട വോട്ടെടുപ്പ് നടന്ന എട്ട് പടിഞ്ഞാറന്‍ ഉത്തര്‍പ്രദേശ് സീറ്റുകളില്‍ 60 ശതമാനത്തിലധികം പോളിംഗ് രേഖപ്പെടുത്തിയിരുന്നു. മുറാദാബാദില്‍ 60.60 ശതമാനം പോളിങ് രേഖപ്പെടുത്തി.