ദേശീയ ഭക്ഷ്യ സുരക്ഷാ നിയമം തമിഴ്‌നാട് ഒഴികെ ബാക്കിയുള്ള എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും ഏപ്രില്‍ മാസത്തില്‍ നിലവില്‍ വരുമെന്ന് കേന്ദ്ര ഭക്ഷ്യമന്ത്രി രാംവിലാസ് പസ്വാന്‍ അറിയിച്ചു. നിലവില്‍ 25 സംസ്ഥാനങ്ങള്‍ നിയമം നടപ്പാക്കി. കേരളമുള്‍പ്പെടെ 11 സംസ്ഥാനങ്ങള്‍ നിയമം നടപ്പാക്കുന്നതിനുള്ള നടപടികള്‍ തുടങ്ങിയതായും മന്ത്രി അറിയിച്ചു.

2013ലാണ് നിയമം പാസാക്കിയത്. തുടര്‍ന്ന് ഒരു വര്‍ഷത്തിനുള്ളില്‍ നടപ്പാക്കണമെന്നായിരുന്നു നിര്‍ദേശം. എന്നാല്‍ വിവിധ സംസ്ഥാനങ്ങളുടെ അഭിപ്രായം പരിഗണിച്ച് 2015 സെപ്റ്റംബര്‍ വരെ മൂന്നു തവണയോളം നിയമം നടപ്പാക്കുന്നതു മാറ്റിവച്ചു. തങ്ങള്‍ അധികാരത്തില്‍ കയറുമ്പോള്‍ 11 സംസ്ഥാനങ്ങളിലെ നിയമം നടപ്പാക്കിയിരുന്നുള്ളെന്നും ഇപ്പോള്‍ 25 സംസ്ഥാനങ്ങളിലേക്ക് അതെത്തിച്ചെന്നും പസ്വാന്‍ കൂട്ടിച്ചേര്‍ത്തു. 

കൂടാതെ ഗുജറാത്ത്, ജമ്മു കശ്മീര്‍, മേഘാലയ, നാഗാലാന്‍ഡ്, മണിപ്പൂര്‍, അരുണാചല്‍പ്രദേശ്, ആന്‍ഡമാന്‍ നിക്കോബാര്‍, മിസോറാം, ദാദ്ര ആന്‍ഡ് നാഗര്‍ ഹാവേലി, തമിഴ്‌നാട് എന്നീ സംസ്ഥാനങ്ങളിലാണ് ഇനി നിയമം നടപ്പിലാക്കാനുള്ളത്. ഇതില്‍ തമിഴ്‌നാട് ഒഴിച്ചുള്ള സംസ്ഥാനങ്ങളില്‍ ഏപ്രിലില്‍ നിയമം പ്രാബല്യത്തില്‍ വരും. 
ഭക്ഷ്യസബ്‌സിഡിക്ക് നേരിട്ട് ബാങ്ക് അക്കൗണ്ടുകള്‍ വഴി പണം അയയ്ക്കുന്ന പദ്ധതി പുതുച്ചേരിയിലും ചണ്ഡിഗഢിലും പരീക്ഷണാടിസ്ഥാനത്തില്‍ ആരംഭിച്ചു. ഉടന്‍ തന്നെ ദാദ്ര ആന്‍ഡ് നാഗര്‍ ഹാവേലിയിലും ഈ പദ്ധതി നടപ്പാക്കും. രാജ്യത്തെ പൊതുവിതരണ സമ്പ്രദായം ശക്തിപ്പെടുത്തുന്നതിനുള്ള നടപടികള്‍ കഴിഞ്ഞ 19 മാസമായി എടുത്തുവരുന്നതായും പസ്വാന്‍ അറിയിച്ചു.

പൊതുവിതരണ സമ്പ്രദായം കാര്യക്ഷമമാക്കാന്‍ റേഷന്‍ കാര്‍ഡുകളുടെ ഡിജിറ്റലൈസേഷനാണ് പ്രധാനപ്പെട്ട കാര്യം. രാജ്യത്ത് ആകയുള്ള 24.99 കോടി റേഷന്‍ കാര്‍ഡുകളില്‍ 97 ശതമാനവും ഡിജിറ്റല്‍ രൂപത്തിലാക്കി. ഉടന്‍ തന്നെ എല്ലാ കാര്‍ഡുകളും ഡിജിറ്റല്‍ രൂപത്തിലാക്കും. നിലവില്‍ 10.10 കോടി റേഷന്‍ കാര്‍ഡുകള്‍ ആധാറുമായി ബന്ധിച്ചിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha