ഹൈദരാബാദ് സര്‍വകലാശാലയിലെ ദലിത് ഗവേഷക വിദ്യാര്‍ഥി രോഹിത് വെമുല ജീവനൊടുക്കിയ സംഭവത്തില്‍ വിദ്യാര്‍ഥി പ്രക്ഷോഭം തുടരുന്നു. രോഹിതിനൊപ്പം പുറത്താക്കിയ നാല് വിദ്യാര്‍ഥികള്‍ തുടരുന്ന സമരത്തിന് സമീപത്തെ പന്തലില്‍ ഏഴ് വിദ്യാര്‍ഥികള്‍ നടത്തുന്ന നിരാഹാര സമരം നാലാം ദിവസത്തിലേക്ക് കടന്നു. കേന്ദ്രസര്‍ക്കാര്‍ ജുഡീഷ്യല്‍ അന്വേഷണം പ്രഖ്യാപിച്ചെങ്കിലും തങ്ങളുടെ ആവശ്യങ്ങള്‍ അംഗീകരിക്കുന്നതുവരെ സമരവുമായി മുന്നോട്ടുപോകാനാണ് ജോയന്റ് ആക്ഷന്‍ കമ്മിറ്റിയുടെ തീരുമാനം. നാലുപേരുടെ സസ്‌പെന്‍ഷന്‍ പിന്‍വലിക്കുന്നതായി പ്രഖ്യാപിച്ചെങ്കിലും ആരോപണങ്ങള്‍ ബാക്കിയാണെന്നും സസ്‌പെന്‍ഷന്‍ ഉത്തരവ് മരവിപ്പിക്കുകമാത്രമാണ് ഉണ്ടായതെന്നും വിദ്യാര്‍ഥികള്‍ ചൂണ്ടിക്കാട്ടി.

രോഹിത് അടക്കം അഞ്ചുപേരെ സസ്‌പെന്‍ഡ് ചെയ്ത ഉത്തരവില്‍ യൂണിവേഴ്‌സിറ്റി വൈസ് ചാന്‍സലറും എക്‌സിക്യൂട്ടിവ് സബ് കമ്മിറ്റിയുമാണ് ഒപ്പുവെച്ചത്. എന്നാല്‍, ഇത് റദ്ദാക്കിയ ഉത്തരവില്‍ ഡീന്‍ സ്റ്റുഡന്റ് വെല്‍ഫെയര്‍ പ്രകാശ് ബാബുവാണ് ഒപ്പുവെച്ചിരിക്കുന്നത്. പ്രത്യേക സാഹചര്യം കണക്കിലെടുത്താണ് ഇതെന്നും പൊലീസ്, കോടതി നിയമ നടപടികള്‍ ഇതിന് ബാധകമല്ലെന്നും ഉത്തരവിലുണ്ട്. ഇത് യൂനിവേഴ്‌സിറ്റിയുടെ അടവുനയമാണെന്ന് സമരക്കാര്‍ ആരോപിച്ചു. വെള്ളിയാഴ്ചയും ദലിത് അധ്യാപകര്‍ വിവിധ കമ്മിറ്റികളില്‍നിന്ന് രാജിവെച്ച് സമരത്തിന് പിന്തുണ പ്രഖ്യാപിച്ചു. അതേസമയം, നിരാഹാര സമരം മൂന്ന് നാള്‍ പിന്നിട്ടതോടെ ഇവരുടെ ആരോഗ്യനില മോശമായിട്ടുണ്ട്. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha