പാക്-അമേരിക്കന്‍ ഭീകരന്‍ ഡേവിഡ് കോള്‍മാന്‍ ഹെഡ്‌ലിയുടെ വെളിപ്പെടുത്തലുകളുടെ അടിസ്ഥാനത്തില്‍ പാക്കിസ്ഥാനെ ഭീകരവാദ രാജ്യമായി പ്രഖ്യാപിക്കണമെന്നു ബിജെപി. അതിര്‍ത്തി കടന്നുള്ള ഭീകരവാദത്തിനു സഹായമെത്തിക്കുന്നത് പാക്കിസ്ഥാന്‍ ചാരസംഘടനയായ ഐഎസ്‌ഐ ആണെന്ന് ഹെഡ്‌ലി മുംബൈ കോടതിയില്‍ നല്‍കിയ മൊഴിയിലൂടെ വ്യക്തമായി.

ഇതിനാല്‍ പാക്കിസ്ഥാനെ ഭീകരവാദ രാജ്യമായി പ്രഖ്യാപിക്കണം. ഇതിനാവശ്യമായ കാര്യങ്ങള്‍ നയതന്ത്രപരമായി കൈകാര്യം ചെയ്യണമെന്നും ബിജെപി ദേശീയ സെക്രട്ടറി സിദ്ധാര്‍ഥ്‌നാഥ് സിംഗ് പറഞ്ഞു. ലോകരാഷ്ട്രങ്ങള്‍ക്കിടെ പാക്കിസ്ഥാനെ ഒറ്റപ്പെടുത്താനുള്ള ശ്രമങ്ങള്‍ ഇന്ത്യ നടത്തണമെന്നും അദ്ദേഹം കൂട്ടിച്ചേര്‍ത്തു.
ഇസ്രത് ജഹാനും സംഘവും കൊല്ലപ്പെട്ടത് വ്യാജ ഏറ്റുമുട്ടലില്‍ അല്ലെന്നു ഹെഡ്‌ലി വെളിപ്പെടുത്തിയ സാഹചര്യത്തില്‍ പ്രധാനമന്ത്രി നരേന്ദ്ര മോദിയോടും പാര്‍ട്ടി ദേശീയ അധ്യക്ഷന്‍ അമിത് ഷായോടും കോണ്‍ഗ്രസ് മാപ്പു പറയണം. ഇസ്രത് ജഹാന്റെ കൊലപാതകം തെരഞ്ഞെടുപ്പില്‍ വോട്ടാക്കാനാണ് പ്രതിപക്ഷം ഉപയോഗിച്ചിരിക്കുന്നതെന്നും സിംഗ് പറഞ്ഞു.
2004 ജൂണ്‍ 15 ഗുജറാത്ത് പോലീസുമായുള്ള ഏറ്റുമുട്ടലില്‍ കൊല്ലപ്പെട്ട പത്തൊമ്പതുകാരി ഇസ്രത് ജഹാന്‍ ഭീകര സംഘടനയായ ലഷ്‌കര്‍ ഇ തൊയ്ബയുടെ ചാവേറാണെന്ന് ഹെഡ്‌ലി വെളിപ്പെടുത്തിയിരുന്നു. ഇസ്രത്തും സംഘവും കൊല്ലപ്പെട്ടത് അഹമ്മദാബാദ് സിറ്റി ക്രൈംബ്രാഞ്ച് പോലീസിന്റെ നേതൃത്വത്തില്‍ നടന്ന വ്യാജ ഏറ്റുമുട്ടലിലാണെന്നു സിബിഐ 2013 ഓഗസ്റ്റില്‍ നല്കിയ കുറ്റപത്രത്തില്‍ രേഖപ്പെടുത്തിയിരുന്നു. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha