രണ്ട് വര്‍ഷം നീണ്ടു നിന്ന വയറുവേദനയുടെ കാരണം കണ്ടെത്തിയ യുവതിയും വീട്ടുകാരും ഞെട്ടിയിരിക്കുകയാണ്. രണ്ട് വര്‍ഷം നീണ്ടു നിന്ന വയറുവേദനയുടെ കാരണം കണ്ടെത്താനാവാത്തതിന് പുറമെ പ്രസവ സമയത്ത് കുഞ്ഞിനുണ്ടായ പരിക്കുകള്‍ക്കും കാരണമായത് ഡോക്ടര്‍മാരുടെ അനാസ്ഥയെന്ന് യുവതി പരാതിയുമായി എത്തി. ആദ്യ പ്രസവ സമയത്ത് യുവതിയുടെ ശരീരത്തില്‍ മറന്നുവെച്ച സര്‍ജിക്കല്‍ നീഡില്‍ രണ്ട് വര്‍ഷത്തിന് ശേഷം രണ്ടാമെത്തെ പ്രസവ സമയത്ത് ഗുരുതര അപകടം സംഭവിച്ച ശേഷമാണ് കണ്ടെത്തിയതെന്നാണ് ആരോപണം.

സൂചി ശരീരത്തില്‍ ഉരഞ്ഞ് കുഞ്ഞിന്റെ ശരീരത്തില്‍ നിരവധി മുറിവുകളുണ്ടായി. ഇതേ തുടര്‍ന്ന് പ്രസവം കഴിഞ്ഞയുടനെ കുഞ്ഞിനെ വെന്റിലേറ്ററിലേക്ക് മാറ്റി. അമ്മയ്ക്ക് ഭാഗ്യവശാല്‍ മറ്റ് പ്രശ്‌നങ്ങളില്ലെന്നും ബന്ധുക്കള്‍ പറഞ്ഞു. മദ്ധ്യപ്രദേശിലെ റേവയില്‍ പ്രവര്‍ത്തിക്കുന്ന സഞ്ജയ് ഗാന്ധി ആശുപത്രിക്കെതിരെയാണ് പരാതി.

ഹിന ഖാന്‍ എന്ന യുവതി 2023 മാര്‍ച്ച് അഞ്ചാം തീയ്യതി സഞ്ജയ് ഗാന്ധി ആശുപത്രിയില്‍ വെച്ച് തന്റെ ആദ്യ കുഞ്ഞിന് ജന്മം നല്‍കിയിരുന്നു. അമ്മയും കുഞ്ഞും അന്ന് പൂര്‍ണ ആരോഗ്യത്തോടെ ഏതാനും ദിവസങ്ങള്‍ക്കകം ആശുപത്രി വിട്ടു. എന്നാല്‍ വീട്ടിലെത്തി കുറച്ച് ദിവസങ്ങള്‍ കഴിഞ്ഞപ്പോള്‍ വയറുവേദന തുടങ്ങി. ഡോക്ടര്‍മാരെ കാണിച്ചെങ്കിലും തുന്നലുകള്‍ കൊണ്ടുള്ള പ്രശ്‌നമായിരിക്കുമെന്നും പതുക്കെ ശരിയാവുമെന്നും പറഞ്ഞ് വിട്ടു. എന്നാല്‍ പിന്നെയും വയറുവേദന മാറിയില്ലെന്നാണ് ബന്ധുക്കള്‍ പറയുന്നത്.

പിന്നീട് രണ്ട് വര്‍ഷത്തിന് ശേഷം യുവതി രണ്ടാം പ്രസവത്തിന് തയ്യാറെടുത്തു. ജില്ലാ ആശുപത്രിയില്‍ രണ്ടാമത്തെ പ്രസവം കഴിഞ്ഞപ്പോള്‍ കുഞ്ഞിനൊപ്പം സര്‍ജിക്കല്‍ നീഡിലും പുറത്തുവന്നു. ഇക്കാലമത്രയും സൂചി ശരീരത്തിനുള്ളില്‍ കുടങ്ങിയിരുന്നതിന്റെ വേദന യുവതി അനുഭവിക്കുകയായിരുന്നു എന്ന് ബന്ധുക്കള്‍ പറഞ്ഞു.