ഇന്ത്യയിലെ തിരഞ്ഞെടുപ്പില്‍ ഇടപെടാന്‍ യുഎസ്എഐഡി ഫണ്ടുകള്‍ ഉപയോഗിക്കുന്നുണ്ടെന്ന് യുഎസ് പ്രസിഡന്റ് ഡൊണാള്‍ഡ് ട്രംപ് ആരോപിച്ചതിന് പിന്നാലെ, രാഹുല്‍ ഗാന്ധിയെ 'വിദേശ ഏജന്‍സികള്‍ക്കുള്ള ഉപകരണം' എന്ന് ബിജെപി വിശേഷിപ്പിച്ചു. 'വോട്ടര്‍മാരുടെ പോളിംഗ് മെച്ചപ്പെടുത്തുന്നതിനായി' ഇന്ത്യയ്ക്ക് 21 മില്യണ്‍ യുഎസ് ഡോളര്‍ നല്‍കാനുള്ള മുന്‍ ജോ ബൈഡന്‍ ഭരണകൂടത്തിന്റെ നീക്കം 'മറ്റൊരാളെ തെരഞ്ഞെടുക്കാനുള്ള' ശ്രമമാണെന്ന് ട്രംപ് സൂചിപ്പിച്ചു. ഇന്ത്യയിലെ തിരഞ്ഞെടുപ്പിനെ സ്വാധീനിക്കാനും പ്രധാനമന്ത്രി മോദിയെ അല്ലാതെ മറ്റൊരാളെ പ്രതിഷ്ഠിക്കാനുമുള്ള ശ്രമം നടന്നിട്ടുണ്ടെന്ന് ട്രംപിന്റെ പ്രസ്താവന സ്ഥിരീകരിച്ചതായി ബിജെപി നേതാവ് അമിത് മാളവ്യ പറഞ്ഞു.

2024 ലെ ലോക്സഭാ തിരഞ്ഞെടുപ്പിന് ഒരു വര്‍ഷം മുമ്പ് കോണ്‍ഗ്രസ് നേതാവ് ലണ്ടനിലായിരുന്നെന്നും ഇന്ത്യയുടെ ആഭ്യന്തര കാര്യങ്ങളില്‍ ഇടപെടാന്‍ വിദേശ ശക്തികളോട് ആവശ്യപ്പെടുകയാണെന്നും അമിത് മാളവ്യ പ്രതിപക്ഷ നേതാവ് രാഹുല്‍ ഗാന്ധിയെ രൂക്ഷമായി വിമര്‍ശിച്ചു. 'ഇത് വെറുമൊരു ഇന്ത്യന്‍ പോരാട്ടമല്ല... 2024 ലെ ലോക്സഭാ തിരഞ്ഞെടുപ്പിന് മുന്നോടിയായി, 2023 മാര്‍ച്ചില്‍, രാഹുല്‍ ഗാന്ധി ലണ്ടനിലുണ്ടായിരുന്നു, യുഎസ് മുതല്‍ യൂറോപ്പ് വരെയുള്ള വിദേശ ശക്തികളോട് ഇന്ത്യയുടെ ആഭ്യന്തര കാര്യങ്ങളില്‍ ഇടപെടാന്‍ ആവശ്യപ്പെട്ടു. വിദേശ ഏജന്‍സികള്‍ക്കുള്ള ഒരു ഉപകരണമായി പ്രവര്‍ത്തിക്കുന്ന, ഇന്ത്യയുടെ തന്ത്രപരവും ഭൗമരാഷ്ട്രീയവുമായ താല്‍പ്പര്യങ്ങളെ ദുര്‍ബലപ്പെടുത്താന്‍ ശ്രമിക്കുന്ന ആഗോള നെറ്റ്വര്‍ക്കുകളുമായി അദ്ദേഹം സ്വയം സഖ്യത്തിലേര്‍പ്പെട്ടു,' അമിത് മാള്‍വിയ പറഞ്ഞു.

2023 ല്‍ ലണ്ടനില്‍ നടന്ന ഒരു പരിപാടിയില്‍ രാഹുല്‍ ഗാന്ധി പ്രസംഗിക്കുന്നതിന്റെ ഒരു ക്ലിപ്പ് മാളവ്യ പങ്കിട്ടു. 'അതിശയകരമായ കാര്യം, ജനാധിപത്യത്തിന്റെ സംരക്ഷകരെന്ന് വിളിക്കപ്പെടുന്ന അമേരിക്കയും യൂറോപ്യന്‍ രാജ്യങ്ങളും, ജനാധിപത്യ മാതൃകയുടെ വലിയൊരു ഭാഗം തകര്‍ന്നു എന്ന കാര്യം മറന്നുപോകുന്നതായി തോന്നുന്നു, അത് ഒരു യഥാര്‍ത്ഥ പ്രശ്‌നമാണ്... പ്രതിപക്ഷം പോരാടുകയാണ്, ഇത് വെറും ഒരു ഇന്ത്യന്‍ പോരാട്ടമല്ല, വാസ്തവത്തില്‍ വളരെ പ്രധാനപ്പെട്ട ഒരു പോരാട്ടമാണ്...' രാഹുല്‍ ഗാന്ധി വീഡിയോയില്‍ പറഞ്ഞു.