കേന്ദ്രം പതിനായിരം കോടി രൂപ ഫണ്ട് നല്കാമെന്ന് വാഗ്ദാനം ചെയ്താലും ദേശീയ വിദ്യാഭ്യാനയം നടപ്പിലാക്കില്ല, കേന്ദ്രത്തിനെതിരേ സ്റ്റാലിന്
ദേശീയ വിദ്യാഭ്യാനയത്തിനെതിരെ വിവാദം തുടരുന്നു. കേന്ദ്രം പതിനായിരം കോടി രൂപ ഫണ്ട് നല്കാമെന്ന് വാഗ്ദാനം ചെയ്താലും ദേശീയ വിദ്യാഭ്യാനയം തമിഴ്നാട്ടില് നടപ്പിലാക്കില്ലെന്ന നിലപാടിലുറച്ച് മുഖ്യമന്ത്രി എം.കെ. സ്റ്റാലിന്. ഹിന്ദി അടിച്ചേല്പ്പിക്കല് എന്നതില് മാത്രമല്ല വിദ്യാര്ത്ഥികളുടെ ഭാവിയിലും സാമൂഹിക നീതി വ്യവസ്ഥയിലും ഗുരുതര പ്രത്യാഘാതങ്ങള് ഉണ്ടാക്കുന്ന മറ്റുനിരവധി ഘടങ്ങള് ഇതിലുണ്ടെന്നും എം.കെ. സ്റ്റാലിന് പറഞ്ഞു.
തമിഴ്നാട്ടിലെ കടലൂരില് വെച്ച് നടന്ന രക്ഷാകര്തൃ- അധ്യാപക സംഘടനയുടെ പരിപാടിയില് സംസാരിക്കുകയായിരുന്നു അദ്ദേഹം. ഒരു ഭാഷയേയും ഞങ്ങള് എതിര്ക്കുന്നില്ല. പക്ഷെ അത് അടിച്ചേല്പ്പിക്കുന്നതിനെ ഞങ്ങള് എതിര്ക്കും. ഹിന്ദി അടിച്ചേല്പ്പിക്കാനുള്ള ശ്രമം മാത്രമല്ല, മറ്റുപല കാരണങ്ങളാലും ഞങ്ങള് ദേശീയ വിദ്യാഭ്യാസ നയത്തെ എതിര്ക്കുന്നു. എന്ഇപി പിന്തിരിപ്പനാണ്. ഇത് വിദ്യാര്ത്ഥികളെ സ്കൂളുകളില് നിന്ന് അകറ്റും - സ്റ്റാലിന് പറഞ്ഞു.
പട്ടികജാതി/ പട്ടികവര്ഗ, ബിസി വിദ്യാര്ത്ഥികള്ക്ക് ഇപ്പോള് നല്കിയിരുന്ന സാമ്പത്തിക സഹായം നിഷേധിക്കുന്നതിന് പുറമെ മൂന്ന് അഞ്ച് എട്ട് ക്ലാസുകള്ക്ക് പൊതുപരീക്ഷകള് നടത്താനും ആര്ട്സ് ആന്ഡ് സയന്സ് കോളേജുകളിലേക്കുള്ള പ്രവേശനത്തിന് പൊതു പ്രവേശന പരീക്ഷ ഏര്പ്പെടുത്താനും എന്ഇപി നിര്ദ്ദേശിച്ചിട്ടുണ്ടെന്നും അദ്ദേഹം അവകാശപ്പെട്ടു.
ദേശീയ വിദ്യാഭ്യാസ നയം നടപ്പിലാക്കുന്നതിനെക്കുറിച്ച് തമിഴ്നാട്ടില് തര്ക്കം രൂക്ഷമാകുന്നതിനിടെയാണ് മുഖ്യമന്ത്രി സ്റ്റാലിന്റെ പരാമര്ശം. ദേശീയ വിദ്യാഭ്യാസ നയം സംസ്ഥാനത്ത് നടപ്പിലാക്കിയില്ലെങ്കില് കേന്ദ്ര സര്ക്കാര് പദ്ധതിയായ സമഗ്ര ശിക്ഷാ അഭിയാന് നല്കി വരുന്ന 2000 കോടി രൂപ തടഞ്ഞുവെക്കുമെന്ന് കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന് ഭീഷണിപ്പെടുത്തി എന്ന് പരാതിപ്പെട്ട് സ്റ്റാലിന് പ്രധാനമന്ത്രി നരേന്ദ്ര മോദിക്ക് കത്തെഴുതിയിരുന്നു.
സംസ്ഥാനം ദേശീയ വിദ്യാഭ്യാസ നയം നടപ്പിലാക്കിയാല് തമിഴ്നാടിന് 2000 കോടി രൂപ നല്കുമെന്ന് കേന്ദ്രം പറയുന്നു. പതിനായിരം കോടി രൂപ വാഗ്ദാനം ചെയ്താലും ഞങ്ങള് എന്ഇപി അംഗീകരിക്കില്ല. തമിഴ്നാടിനെ 2000 വര്ഷം പിന്നിലേക്ക് തള്ളിവിടുന്ന പാപം ഞാന് ചെയ്യില്ല - സ്റ്റാലിന് പറഞ്ഞു.
https://www.facebook.com/Malayalivartha
