ആദ്യ വിവാഹം മറച്ചുവച്ച് സമൂഹ വിവാഹത്തിനെത്തി യുവതി പിടിയില്‍. ഉത്തര്‍പ്രദേശിലെ ഹസന്‍പൂരിലാണു സംഭവം. അസ്മ എന്ന യുവതിയാണ് സര്‍ക്കാരിന്റെ നേതൃത്വത്തില്‍ നടത്തുന്ന സമൂഹവിവാഹ പദ്ധതിയില്‍ റജിസ്റ്റര്‍ ചെയ്തത്. ആദ്യ വിവാഹത്തില്‍നിന്നു വിവാഹമോചനം നേടാതെ രണ്ടാമതും വിവാഹം കഴിക്കാനൊരുങ്ങിയ സംഭവത്തില്‍ യുവതിക്കെതിരെ പൊലീസ് കേസെടുത്തു.

ഞായറാഴ്ച ഹസന്‍പുരിലെ ഒരു ഓഡിറ്റോറിയത്തില്‍ നടന്ന സമൂഹവിവാഹത്തിലാണ് അസ്മയും പങ്കെടുത്തത്. എന്നാല്‍ ആദ്യ ഭര്‍ത്താവിന്റെ ബന്ധുക്കളെത്തിയാണ് അസ്മയുടെ വിവാഹം തടഞ്ഞത്. മൂന്നു വര്‍ഷം മുന്‍പു തന്റെ മകന്‍ നൂര്‍ മുഹമ്മദുമായി അസ്മയുടെ വിവാഹം കഴിഞ്ഞിരുന്നുവെന്ന് വിവാഹം തടസ്സപ്പെടുത്തിയവരില്‍ ഒരാള്‍ വെളിപ്പെടുത്തി. ബന്ധത്തിലെ പ്രശ്‌നങ്ങളെ തുടര്‍ന്ന് ആറു മാസം മുമ്പാണ് യുവതി സ്വന്തം വീട്ടിലേക്കു മടങ്ങിയെത്തിയത്. ഇവരുടെ വിവാഹമോചന ഹര്‍ജി കോടതിയുടെ പരിഗണനയിലാണ്. വിവാഹ സര്‍ട്ടിഫിക്കറ്റുമായാണ് ഭര്‍തൃപിതാവും ബന്ധുക്കളും കല്യാണ ഓഡിറ്റോറിയത്തിലെത്തിയത്.

സര്‍ക്കാര്‍ നടത്തുന്ന സമൂഹ വിവാഹത്തിലൂടെ വിവാഹിതരായാല്‍ 35,000 രൂപയും മറ്റ് സമ്മാനങ്ങളും ലഭിക്കുമെന്ന് അറിഞ്ഞതോടെയാണ് അസ്മ 'ചീഫ് മിനിസ്റ്റേര്‍സ് മാസ് മാര്യേജ് സ്‌കീം' വഴി ബന്ധു ജാബര്‍ അഹമ്മദിനെ വിവാഹം ചെയ്യാന്‍ തയാറായത്. സമ്മാനങ്ങളും പണവും പങ്കിട്ടെടുക്കാനും ഇരുവരും തമ്മില്‍ ധാരണയായിരുന്നു. ലഭിക്കുന്ന 35,000 രൂപ കൊണ്ട് എരുമകളെ വാങ്ങാനും ഇരുവരും തീരുമാനിച്ചിരുന്നു. ഡിന്നര്‍ സെറ്റ്, വധുവിനും വരനും രണ്ട് ജോഡി വസ്ത്രങ്ങള്‍, ക്ലോക്ക്, വാനിറ്റി കിറ്റ്, ഷാള്‍ (ദുപ്പട്ട), വെള്ളി മോതിരം, പാദസരം, ചോറ്റുപാത്രം തുടങ്ങിയവയാണു വധുവരന്മാര്‍ക്ക് ലഭിക്കുന്ന സമ്മാനം.