പ്രക്ഷോഭകര്‍ തീയിട്ട ഹോട്ടലിന്റെ നാലാം നിലയില്‍ നിന്ന് ചാടിയ തീര്‍ത്ഥാടകയ്ക്ക് ദാരുണാന്ത്യം
നേപ്പാളിലെ സര്‍ക്കാര്‍ വിരുദ്ധ പ്രക്ഷോഭകര്‍ തീയിട്ട ഹോട്ടലിന്റെ നാലാം നിലയില്‍ നിന്ന് ചാടിയ ഇന്ത്യന്‍ തീര്‍ത്ഥാടകയ്ക്ക് ദാരുണാന്ത്യം. ഗാസിയാബാദില്‍ നിന്നുള്ള 55കാരി രാജേഷ് ഗോലയാണ് മരിച്ചത്. അതേസമയം ഇവരുടെ ഒപ്പം ചാടിയ ഭര്‍ത്താവ് രാംവീര്‍ സിംഗ് ഗുരുതര പരിക്കുകളോടെ ദുരിതാശ്വാസ ക്യാമ്പില്‍ ചികിത്സയിലാണ്.
സെപ്തംബര്‍ ഏഴിനാണ് രാജേഷ് ഗോലയും രാംവീര്‍ സിംഗും കാഠ്മണ്ഡുവിലെ പ്രശസ്തമായ പശുപതിനാഥ് ക്ഷേത്രം സന്ദര്‍ശിക്കാന്‍ എത്തിയത്. സെപ്തംബര്‍ ഒമ്പതിന് 'ജെന്‍ സി' പ്രക്ഷോഭകരുടെ പ്രതിഷേധം അക്രമാസക്തമായപ്പോള്‍ ഇരുവരും ഒരു പഞ്ചനക്ഷത്ര ഹോട്ടലില്‍ താമസിക്കുകയായിരുന്നു. പ്രതിഷേധക്കാര്‍ ഹോട്ടലിന് തീയിട്ടതോടെ ദമ്പതികള്‍ നാലാം നിലയില്‍ കുടുങ്ങി. മറ്റ് മാര്‍ഗമില്ലാതായപ്പോള്‍ തീയില്‍ നിന്ന് രക്ഷപ്പെടാന്‍ അവര്‍ ജനാലയിലൂടെ പുറത്തേക്ക് ചാടുകയായിരുന്നു.
തീപിടുത്തത്തില്‍ നിന്ന് രക്ഷപ്പെട്ടവരെ സഹായിക്കാന്‍ രക്ഷാപ്രവര്‍ത്തകര്‍ ഹോട്ടലിന് താഴെ കിടക്കകള്‍ വിരിച്ചെങ്കിലും രക്ഷാപ്രവര്‍ത്തനത്തിനിടെ ദമ്പതികള്‍ വേര്‍പിരിഞ്ഞു. നിര്‍ഭാഗ്യവശാല്‍ രാജേഷ് ഗോല അതിജീവിച്ചില്ല, ചികിത്സയ്ക്കിടെ മരിക്കുകയായിരുന്നു. നേപ്പാള്‍ അധികൃതര്‍ ഇവരുടെ മകന്‍ വിശാലിനെ ഫോണിലൂടെയാണ് വിവരം അറിയിച്ചത്. രാജേഷ് ഗോലയുടെ മൃതദേഹം ഗാസിയാബാദിലെ മാസ്റ്റര്‍ കോളനിയിലുള്ള അവരുടെ വീട്ടിലേക്ക് ഇന്ന് കൊണ്ടു പോകുമെന്നാണ് വിവരം.
https://www.facebook.com/Malayalivartha
