സാമ്പത്തിക പ്രതിസന്ധിയെ തുടര്‍ന്ന് ദമ്പതികള്‍ രണ്ട് മക്കളെ കഴുത്ത് ഞെരിച്ച് കൊലപ്പെടുത്തിയ ശേഷം ആത്മഹത്യക്ക് ശ്രമിച്ചു. ശനിയാഴ്ച വൈകുന്നേരം ബെംഗളൂരു റൂറല്‍ ജില്ലയിലെ ഗോണക്കനഹള്ളിയിലാണ് സംഭവം നടന്നതെന്ന് പോലീസ് പറഞ്ഞു. പോലീസിന്റെ റിപ്പോര്‍ട്ട് അനുസരിച്ച്, 32കാരനായ ശിവകുമാര്‍ തന്റെ 11 വയസ്സും 7 വയസ്സുമുള്ള മകളെയും മകനെയും കൊലപ്പെടുത്തിയ ശേഷം തൂങ്ങിമരിച്ചു. ഭാര്യ മഞ്ജുളയെ (30) അയല്‍ക്കാര്‍ രക്ഷപ്പെടുത്തിയതിനാല്‍ അവര്‍ രക്ഷപ്പെട്ടു. കൊലപാതക കുറ്റത്തിന് മഞ്ജുളയെ പോലീസ് അറസ്റ്റ് ചെയ്തു.

കുറച്ച് നാള്‍ മുന്‍പ് ഉണ്ടായ ഒരു അപകടത്തില്‍ ശിവകുമാറിന്റെ കാലുകള്‍ക്ക് ഗുരുതരമായ പരിക്ക് പറ്റിയിരുന്നു. അതോടെ കുടുംബം മഞ്ജുളയുടെ ചെറിയ കൂലിപ്പണി വരുമാനത്തെ ആശ്രയിച്ചായിരുന്നു കഴിഞ്ഞിരുന്നത്. ചികിത്സക്കായി ദമ്പതികള്‍ കടം വാങ്ങുകയും സാമ്പത്തിക സമ്മര്‍ദ്ദം കാരണം സ്വന്തം ജീവിതം അവസാനിപ്പിക്കാനും കുട്ടികള്‍ അനാഥരാകാതിരിക്കാന്‍ അവരെ കൊലപ്പെടുത്താനും തീരുമാനിച്ചതായി പോലീസ് പറഞ്ഞു.

വീടിന്റെ പിന്നിലുള്ള പൂന്തോട്ടത്തില്‍ കുട്ടികള്‍ അവരുടെ പതിവ് ജോലികളില്‍ ഏര്‍പ്പെട്ടിരിക്കുമ്പോള്‍, ദമ്പതികള്‍ ആദ്യം മകളെ അകത്തേക്ക് വിളിച്ച് കഴുത്ത് ഞെരിച്ച് കൊലപ്പെടുത്തി. തുടര്‍ന്ന് മകനെ വിളിച്ച് സമാനമായ രീതിയില്‍ കൊലപ്പെടുത്തിയെന്നും ഒരു മുതിര്‍ന്ന പോലീസ് ഉദ്യോഗസ്ഥന്‍ പറഞ്ഞു.

ആത്മഹത്യക്ക് ശ്രമിക്കുന്നതിന് മുന്‍പ് ശിവകുമാര്‍ മദ്യപിക്കുന്നതിനായി എന്തെങ്കിലും പലഹാരങ്ങള്‍ കൊണ്ടുവരാന്‍ മഞ്ജുളയോട് ആവശ്യപ്പെട്ടു. തിരികെ വരുമ്പോള്‍ ശിവകുമാര്‍ തൂങ്ങിമരിച്ചതായി മഞ്ജുള കണ്ടു. അയല്‍ക്കാരാണ് കുട്ടികളുടെ മൃതദേഹങ്ങള്‍ കണ്ടെത്തിയതും പോലീസിനെ വിവരമറിയിച്ചതും. മഞ്ജുളയുടെ ജീവന്‍ രക്ഷിച്ചതും അവരാണെന്ന് പോലീസ് പറഞ്ഞു.