ലോകമെമ്പാടുമുള്ള ക്രൈസ്തവർ ഇന്ന് ഓശാന ഞായർ ആചരിക്കുന്നു. യേശു ജെറുസലേം ദേവാലയത്തിൽ പ്രവേശിച്ചതിന്റെ ഓർമ്മ പുതുക്കുന്നതാണ് ഓശാന തിരുനാൾ. ദേവാലയത്തിൽ പ്രവേശിക്കാൻ ജെറൂസലേം നഗരത്തിലെത്തിയ യേശുക്രിസ്തുവിനെ ജനം കുരുത്തോലകളും എണ്ണപ്പനയോലയും വീശി സ്വീകരിച്ചതിന്റെ ഓർമ്മ തിരുന്നാളാണ് ഓശാന ഞായർ . 

ക്രൈസ്തവ വിശ്വസികളുടെ കഷ്ടാനുഭവ ആഴ്ചയുടെ ആരംഭം കൂടിയാണ് ഓശാന ഞായർ . ഉയിർപ്പു തിരുന്നാളായ ഈസ്റ്ററിന്റെ വരവറിയിക്കുന്നതാണ് ഓശാന ഞായർ. പെസഹ വ്യാഴം, ദുഃഖവെള്ളി എന്നി ആത്മീയ ദിനങ്ങളിലൂടെ കടന്ന് ഈസ്റ്ററോടെയാണ് വിശ്വാസികൾക്ക് വിശുദ്ധ വാരം പൂർത്തിയാകുന്നത്. ഓശാന ഞായർ ആചരണത്തിന്റെ ഭാഗമായി പള്ളികളിൽ കുരുത്തോല പ്രദക്ഷിണവും പ്രത്യേക തിരുക്കർമങ്ങളും വിശുദ്ധ കുർബാനയും നടക്കും

പീഡാനുഭവത്തിന്റെയും കുരിശുമരണത്തിന്റെയും മുന്നോടിയായി യേശുക്രിസ്തു 40 രാവും 40 പകലും ഉപവാസം അനുഷ്ഠിച്ചതിന്റെ ഓർമയ്ക്ക് വിശ്വാസികൾ അനുഷ്ഠിച്ചു വരുന്ന വലിയ നോമ്പ് ഇതോടെ പൂർത്തിയാകുന്നതാണ്. ഒലീവിൻ ചില്ലകളും പൂക്കളും വീശി ദാവീദിൻ പുത്രന് ഓശാന വിളിച്ച് യഹൂദർ യേശുക്രിസ്തുവിനെ ആനയിച്ചതിന്റെ അനുസ്മരണമാണ് ഞായറാഴ്ച പള്ളികളിൽ നടക്കുന്നത്.രാവിലെ കുരുത്തോല വെഞ്ചരിക്കൽ, പ്രദക്ഷിണം, ദിവ്യബലി എന്നിവ ഉണ്ടായിരിക്കും.

അതേസമയം വൈക്കം ​ക്രൈസ്തവ ദേവാലയങ്ങളിൽ 29ന് ഓശാന ഞായർ ആചരിക്കും. വൈക്കം സെന്റ് ജോസഫ് ഫൊറോനാ പള്ളിയുടെ കീഴിലുള്ള 19 ഇടവക ദേവാലയങ്ങളിൽ ഓശാന ഞായർ വിവിധ ചടങ്ങുകളോടെ നടത്തും. വിശുദ്ധവാര കർമങ്ങളുടെ ഭാഗമായുള്ള കുരുത്തോല വെഞ്ചരിപ്പ്, വിതരണം, പ്രദക്ഷിണം എന്നീ ചടങ്ങുകൾ വിവിധ ദേവാലയങ്ങളിൽ രാവിലെ 6.30ന് തുടങ്ങും. വിശുദ്ധ ഗ്രന്ഥം വായനയ്‌ക്ക് ശേഷം അൾത്താരയിൽ വച്ച് കുരുത്തോലകൾ വെഞ്ചരിച്ച് വിശ്വാസികൾക്ക് വിതരണം ചെയ്യും.

ഏപ്രിൽ 2ന് പെസഹ വ്യാഴം ആചരിക്കും. രാവിലെ 6.30ന് ദേവാലയങ്ങളിൽ പെസഹാതിരുകർമങ്ങൾ തുടങ്ങും. അൾത്താരയിൽ പ്രത്യേകം ക്രമീകരിക്കുന്ന ഇരിപ്പിടങ്ങളിൽ കാൽകഴുകൽ ശ്രുശ്രൂഷകൾ നടക്കും. ഏപ്രിൽ 3ന് ദുഃഖവെള്ളി ആചരിക്കും. രാവിലെ 6ന് തിരുകർമങ്ങൾ തുടങ്ങും. വൈകിട്ട് 4ന് വെൽഫയർ സെന്ററിലേക്ക് പരിഹാരപ്രദക്ഷിണം നടത്തും. ഏപ്രിൽ 4ന് ദുഃഖശനി ആചരിക്കും. ഏപ്രിൽ 5ന് ഉയർപ്പ് ഞായറാഴ്ച ആഘോഷിക്കുന്നതാണ്.