പണത്തിനുവേണ്ടി സഹോദരിയെ കൊലപ്പെടുത്തി ചാക്കിലാക്കി തോട്ടത്തില്‍ ഉപേക്ഷിച്ച യുവാവിനെ പൊലീസ് അറസ്റ്റ് ചെയ്തു. ഉത്തര്‍പ്രദേശിലെ ഗോരഖ്പൂരിലാണ് നാടിനെ നടുക്കിയ സംഭവം. റാം ആഷിഷ് നിഷാദ്(32) ആണ് സഹോദരി നീലത്തെ (19) കൊലപ്പെടുത്തിയ കേസില്‍ അറസ്റ്റിലായത്. സംശയം തോന്നി തടഞ്ഞു നിര്‍ത്തിയ പൊലീസിനോട് ചാക്കില്‍ ഗോതമ്പ് ആണെന്നാണ് പ്രതിയായ റാം പറഞ്ഞിരുന്നത്.

റോഡ് നിര്‍മാണ പദ്ധതിക്ക് ഭൂമി വിട്ടുകൊടുത്തതില്‍ റാമിന്റെ പിതാവിന് ആറ് ലക്ഷം രൂപ ലഭിച്ചിരുന്നു. ഈ പണം സഹോദരിയുടെ കല്ല്യാണത്തിന് ഉപയോഗിക്കുമെന്ന ചിന്തയാണ് കൊലപാതക കാരണം. നീലത്തെ ഒരു തുണികൊണ്ട് കഴുത്തു ഞെരിച്ച് കൊലപ്പെടുത്തിയ ശേഷം മൃതദേഹം ഒടിച്ച് ചാക്കിലാക്കി ബൈക്കില്‍ കെട്ടിവച്ചു. കുശിനഗറിലേക്കുള്ള യാത്രക്കിടെയാണ് പൊലീസ് ഇയാളെ തടഞ്ഞത്.

ചാക്കില്‍ ഗോതമ്പാണെന്ന് പറഞ്ഞ ഇയാള്‍ ഗോരഖ്പൂരില്‍ നിന്ന് 70 കിലോമീറ്റര്‍ അകലെയുള്ള കുശിനഗറിലെ ഒരു തോട്ടത്തില്‍ ഉപേക്ഷിച്ചു. മകളെ കാണാനില്ലായെന്ന പിതാവിന്റെ പരാതിയിലാണ് പൊലീസ് കേസെടുത്തത്. സിസിടിവി കേന്ദ്രീകരിച്ച് നടത്തിയ അന്വേഷണത്തില്‍ റാം മൃതദേഹവുമായി പോകുന്ന ദൃശ്യങ്ങള്‍ ലഭിക്കുകയായിരുന്നു.