ക്ലാസ് സമയത്ത് കുട്ടികളെ കൊണ്ട് കാല്‍ മസാജ് ചെയ്യിച്ച അധ്യാപികയ്ക്ക് സസ്‌പെന്‍ഷന്‍
ട്രൈബല്‍ ഗേള്‍സ് ആശ്രം സ്‌കൂളിലെ അധ്യാപികയെ വിദ്യാര്‍ത്ഥിനികളെക്കൊണ്ട് കാല്‍ തിരുമ്മിപ്പിച്ച സംഭവത്തില്‍ സസ്‌പെന്‍ഡ് ചെയ്തു. ആന്ധ്രാപ്രദേശിലെ ശ്രീകാകുളത്തുള്ള ബന്ദപ്പള്ളി ട്രൈബല്‍ സ്‌കൂളിലാണ് സംഭവം. അധ്യാപക ധാര്‍മ്മികതയുടെ എല്ലാ അതിര്‍വരമ്പുകളും ലംഘിച്ച ഈ സംഭവം സംബന്ധിച്ച വീഡിയോ സമൂഹ മാധ്യമങ്ങളില്‍ വൈറലായതോടെയാണ് വിദ്യാഭ്യാസ വകുപ്പ് കര്‍ശന നടപടി സ്വീകരിച്ചത്. സ്‌കൂള്‍ സമയത്ത് ഒരു കസേരയില്‍ കാലും നീട്ടിയിരുന്ന് ഫോണില്‍ സംസാരിക്കുന്ന അധ്യാപികക്ക്, യൂണിഫോമണിഞ്ഞ രണ്ട് വിദ്യാര്‍ത്ഥിനികള്‍ നിലത്തിരുന്ന് കാല്‍ മസാജ് ചെയ്തു കൊടുക്കുന്ന ദൃശ്യങ്ങളാണ് വീഡിയോയിലുള്ളത്.
വൈ. സുജാത എന്ന അധ്യാപികയാണ് കുട്ടികളെക്കൊണ്ട് കാല്‍ തിരുമ്മിപ്പിച്ച് വിവാദത്തിലായത്. ക്ലാസ് സമയത്താണ് ഈ സംഭവം നടന്നതെന്നും അധ്യാപിക അധികാര ദുര്‍വിനിയോഗം നടത്തിയെന്നും ചൂണ്ടിക്കാട്ടി ശക്തമായ പരാതികള്‍ അധികൃതര്‍ക്ക് ലഭിച്ചിരുന്നു. ആദിവാസി വിഭാഗത്തില്‍പ്പെട്ട വിദ്യാര്‍ത്ഥികളോടുള്ള മോശം പെരുമാറ്റമായും ഇത് വിലയിരുത്തപ്പെട്ടു.
വീഡിയോ ദൃശ്യങ്ങള്‍ സമൂഹ മാധ്യമങ്ങളില്‍ വ്യാപകമായി പ്രചരിച്ചതോടെ വിദ്യാഭ്യാസ വകുപ്പ് അധികൃതര്‍ ഉടനടി വിഷയത്തില്‍ ഇടപെട്ടു. അധ്യാപികയോട് വിശദീകരണം തേടുകയും ചെയ്തു. എന്നാല്‍, തനിക്ക് കാല്‍മുട്ട് വേദനയുണ്ടായിരുന്നെന്നും നടന്നു പോകുമ്പോള്‍ കാല്‍വഴുതി വീഴാന്‍ പോയപ്പോള്‍ വിദ്യാര്‍ത്ഥികള്‍ സഹായിക്കുകയായിരുന്നു എന്നുമാണ് അധ്യാപിക വിശദീകരിച്ചത്. മാത്രമല്ല, വീഡിയോ തെറ്റിദ്ധരിപ്പിക്കുന്നതാണെന്നും അവര്‍ വാദിച്ചു.
എങ്കിലും, അധ്യാപികയുടെ വിശദീകരണം തൃപ്തികരമല്ലാത്തതിനാല്‍ അധികൃതര്‍ തുടര്‍നടപടി സ്വീകരിക്കുകയായിരുന്നു. ഔദ്യോഗിക പദവി ദുരുപയോഗം ചെയ്യുകയും വിദ്യാര്‍ത്ഥികളെക്കൊണ്ട് വ്യക്തിപരമായ ആവശ്യങ്ങള്‍ക്കായി ജോലി ചെയ്യിക്കുകയും ചെയ്തതിനെ തുടര്‍ന്നാണ് വൈ. സുജാതയെ സസ്‌പെന്‍ഡ് ചെയ്തത്. സ്‌കൂളുകളിലെ അധ്യാപകവിദ്യാര്‍ത്ഥി ബന്ധങ്ങളുടെ അതിര്‍വരമ്പുകള്‍ പാലിക്കേണ്ടതിന്റെ പ്രാധാന്യം ഈ സംഭവം അടിവരയിടുന്നു.
https://www.facebook.com/Malayalivartha
