ബിഹാര്‍ നിയമസഭാ തിരഞ്ഞെടുപ്പിന്റെ 65 ശതമാനത്തോളം പോളിങ് രേഖപ്പെടുത്തി ആദ്യഘട്ട വോട്ടെടുപ്പ് പൂര്‍ത്തിയായി. ഏറ്റവും ഒടുവില്‍ ലഭിക്കുന്ന വിവരം പ്രകാരം പോളിംഗ് 65 ശതമാനത്തോളം എത്തുമെന്നാണ് സൂചന. 18 ജില്ലകളിലായി 121 മണ്ഡലങ്ങളിലാണ് രാവിലെ ഏഴ് മുതല്‍ വൈകീട്ട് ആറുവരെ വോട്ടിങ് നടന്നത്. സുരക്ഷാ കാരണങ്ങളാല്‍ ചില മണ്ഡലങ്ങളില്‍ അഞ്ച് മണിവരെ മാത്രമായി പരിമിതപ്പെടുത്തി. 3.75 കോടി വോട്ടര്‍മാര്‍ വിധിയെഴുതി, ഒറ്റപ്പെട്ട അക്രമസംഭവങ്ങള്‍ ഒഴികെ പ്രക്രിയ സമാധാനപരമായിരുന്നു.

ബെഗുസരായ് ജില്ലയില്‍ ഏറ്റവും ഉയര്‍ന്ന 67.32% പോളിങ് രേഖപ്പെടുത്തി. സമസ്തിപൂര്‍ (66.65%), മധേപുര (65.74%) എന്നിവ തൊട്ടുപിന്നില്‍. ഉപമുഖ്യമന്ത്രി വിജയ് കുമാര്‍ സിന്‍ഹയുടെ വാഹനത്തിനുനേരെ ആക്രമണം ഉള്‍പ്പെടെയുള്ള സംഭവങ്ങള്‍ റിപ്പോര്‍ട്ട് ചെയ്‌തെങ്കിലും വലിയ അലോസരങ്ങള്‍ ഉണ്ടായില്ല.

ആര്‍ജെഡി നേതാവ് തേജസ്വി യാദവ്, ഉപമുഖ്യമന്ത്രിമാരായ സമ്രാട്ട് ചൗധരി, വിജയ് സിന്‍ഹ തുടങ്ങിയ പ്രമുഖര്‍ മത്സരരംഗത്തുള്ളതിനാല്‍ ഘട്ടം എന്‍ഡിഎയ്ക്കും ഇന്ത്യാ സഖ്യത്തിനും നിര്‍ണായകം. 2020ല്‍ മഹാസഖ്യം 63 സീറ്റ് നേടിയിരുന്നു. നവംബര്‍ 11ന് രണ്ടാംഘട്ടം (122 മണ്ഡലങ്ങള്‍), 14ന് വോട്ടെണ്ണല്‍.