ഹന്ദ്വാരയിലെ പോലീസ് സ്റ്റേഷന് നേരെ തീവ്രവാദികള്‍ വെടിവെപ്പ് നടത്തി. പോലീസ് തിരിച്ചടിച്ചതോടെ തീവ്രാവദികള്‍ രക്ഷപ്പെടുകയായിരുന്നു. ആക്രമണത്തില്‍ ആളപായമില്ലെന്നും തീവ്രവാദികള്‍ക്കായി മേഖലയില്‍ തിരച്ചില്‍ തുടരുകയാണെന്നും അധികൃതര്‍ അറിയിച്ചു. ഉറിയിലെ സൈനിക കേന്ദ്രത്തിന് നേരെ ഉണ്ടായ ഭീകരാക്രമണത്തിന്റെ പശ്ചാത്തലത്തില്‍ സൈന്യം കനത്ത ജാഗ്രത പുലര്‍ത്തുന്ന സാഹചര്യത്തിയലാണ് ഹന്ദ്വാരയില്‍ വീണ്ടും ആക്രമണമുണ്ടായിരിക്കുന്നത്.

ഉറി ഭീകരാക്രമണത്തിന് ഇന്ത്യ തക്ക സമയത്ത് നിശ്ചയിക്കുന്ന സമയത്തും സ്ഥലത്തും വെച്ച് ഉചിതമായ തിരിച്ചടി നല്‍കുമെന്ന് മിലിട്ടറി ഓപ്പറേഷന്‍സ് ഡയക്ടര്‍ ജനറല്‍ ലെഫ്. ജനറല്‍ രണ്‍ബീര്‍ സിങ് . നിര്‍ലജ്ജമായ ആക്രമണത്തിന് തിരിച്ചടി നല്‍കാന്‍ നമുക്ക് ശേഷിയുണ്ടെന്നും അദ്ദേഹം കൂട്ടിച്ചേര്‍ത്തു. വടക്കന്‍ കശ്മീരിലെ ഉറി സേനാക്യാമ്പിനു നേരെ നടന്ന ഭീകരാക്രമണത്തില്‍ ഇരുപതു സൈനികര്‍ മരിച്ചതിന്റെ പശ്ചാത്തലത്തിലാണ് തിരിച്ചടിക്കൊരുങ്ങുന്നത്.

ഉറിയില്‍ ആക്രമണം നടത്തിയ ഭീകരരില്‍ നിന്ന് പാക് നിര്‍മിത ഭക്ഷണ പാക്കറ്റുകളും മരുന്നുകളും കണ്ടെത്തിയിട്ടുണ്ടെന്നും രണ്‍ബീര്‍ സിങ് പറഞ്ഞു. നാല് എ.കെ 47 റൈഫിള്‍, നാല് ഗ്രനേഡ് ലോഞ്ചര്‍, നാല് അണ്ടര്‍ ബാരല്‍ ഗ്രനേഡ് ലോഞ്ചര്‍, അഞ്ച് ഹാന്‍ഡ് ഗ്രനേഡ്, രണ്ട് റേഡിയോ സെറ്റ്, രണ്ട് ജിപിഎസ് സംവിധാനങ്ങള്‍ എന്നിവയും ഭീകരരില്‍ നിന്ന് പിടിച്ചെടുത്തിട്ടുണ്ടെന്നും അദ്ദേഹം അറിയിച്ചു.

17 നുഴഞ്ഞുകയറ്റശ്രമങ്ങളാണ് അതിര്‍ത്തിയില്‍ ഈ വര്‍ഷം റിപ്പോര്‍ട്ട് ചെയ്യപ്പെട്ടത്. രാജ്യത്ത് പ്രശ്നങ്ങള്‍ സൃഷ്ടിക്കുക എന്ന ലക്ഷ്യമാണ് ഇതിന് പിന്നില്‍. 110 ഭീകരരെയാണ് ഈ വര്‍ഷം സൈന്യം വിവിധ സൈനിക നടപടികളില്‍ കൂടി വധിച്ചത്. അതില്‍ 31 പേരും കൊല്ലപ്പെട്ടത് നുഴഞ്ഞുകയറ്റ ശ്രമത്തിനിടെ സൈന്യത്തിന്റെ വെടിയേറ്റാണെന്നും അദ്ദേഹം കൂട്ടിച്ചേര്‍ത്തു.