ഉറിയിലെ ഭീകരാക്രമണത്തിന് പാകിസ്ഥാന് തിരിച്ചടി നല്കാന്‍ വ്യോമാക്രമണം ഉള്‍പ്പടെ 5 നിര്‍ദ്ദേശങ്ങളാണ് ഇന്നലെ പ്രധാനമന്ത്രിയുടെ അദ്ധ്യക്ഷതയില്‍ നടന്ന യോഗത്തില്‍ ഉയര്‍ന്നത്. ഉടന്‍ ഒരു തുറന്ന ഏറ്റുമുട്ടലിലേക്ക് പോകുന്നതിനോട് സൈനിക കമാന്‍ഡര്‍മാരും വിയോജിച്ചു എന്നാണ് സൂചന. 

ഉറിയില്‍ 18 സൈനികര്‍ മരിച്ച ആക്രമണത്തിന് ശക്തമായ തിരിച്ചടി വേണം എന്ന ആവശ്യം ബിജെപിക്കുള്ളില്‍ ശക്തമായ സാഹചര്യത്തില്‍ നാലു നിര്‍ദ്ദേശങ്ങളാണ് ഇന്നലെ പ്രധാനമന്ത്രി വിളിച്ച യോഗം ചര്‍ച്ച ചെയ്തത്.

1.ഇന്ത്യയുടെ മിറാഷ്, സുഖോയി വിമാനങ്ങള്‍ ഉപയോഗിച്ച് പാക് അധിനിവേശ കശ്മീരിലെ ഭീകര ക്യാംപുകള്‍ തകര്‍ക്കുക. വ്യോമസേന ഇതിന് തയ്യാറാണെങ്കിലും നിരപരാധികളും മരിക്കാനുള്ള സാധ്യതയുള്ളതിനാല്‍ കൃത്യമായ രഹസ്യാന്വേഷണ വിവരം അനിവാര്യമാണെന്ന് സേന വാദിക്കുന്നു

2. കരസേന അതിര്‍ത്തി കടന്ന് മിന്നലാക്രമണത്തിലൂടെ ഭീകര ക്യാംപുകള്‍ തകര്‍ക്കുക. ഭീകരക്യാംപുകള്‍ക്ക് സംരക്ഷണം നല്കുന്നത് പാക്‌സേന ആണെന്നതിനാല്‍ അവരുടെ ചെറുത്തുനില്പ് ഉണ്ടായേക്കാം

3. കീഴടങ്ങിയ ഭീകരര്‍ ഉള്‍പ്പടെ ചില നിഴല്‍ ഗ്രൂപ്പുകളെ ഉപയോഗിച്ച് ഉറിക്കു സമാനമായി പാകിസ്ഥാന്‍ സൈനിക കേന്ദ്രങ്ങളില്‍ പ്രത്യാക്രമണം നടത്തുക. ഇത് ഇന്ത്യയും ഭീകരവാദം പ്രോത്സാഹിപ്പിക്കുന്നു എന്ന പ്രചരണത്തിന് ഇടയാക്കിയേക്കാം

4.അതിര്‍ത്തിയിലും നിയന്ത്രണരേഖയിലും പാകിസ്ഥാന്‍ സേനയുടെ പോസ്റ്റുകള്‍ ആര്‍ട്ടിലറി യൂണിറ്റ് ഉപയോഗിച്ച് ആക്രമിക്കുക. പാകിസ്ഥാന് ഒരു സന്ദേശം നല്കാമെങ്കിലും ഇതിന്റെ വിശദാംശങ്ങള്‍ പരസ്യപ്പെടുത്താനാവില്ല.

5. ബ്രഹ്മോസ് മിസൈല്‍ അതിര്‍ത്തിയല്‍ വിന്യസിച്ച് ഭീകര ക്യാംപുകള്‍ക്ക് നേരെ തൊടുക്കുക.

തിരിച്ചടി എങ്ങനെ വേണമെന്ന് അന്തിമതീരുമാനം ആയിട്ടില്ല. ഭീകരക്യാപുകള്‍ തകര്‍ക്കണമെന്ന് ആവശ്യപ്പെടുമ്പോഴും പാക്‌സേനയുമായി ഒരു തുറന്ന ഏറ്റുമുട്ടലിന് സൈനിക കമാന്‍ഡര്‍മാരും സമയം ആവശ്യപ്പെട്ടു എന്നാണ് സൂചന.