ഡല്‍ഹിയില്‍ വംശീയാധിക്ഷേപം ചോദ്യം ചെയ്‌ത അരുണാചല്‍ പ്രദേശ്‌ സ്വദേശിയായ 18 വയസുകാരനെ ക്രൂരമായി മര്‍ദ്ദിച്ചു കൊന്നു. അരുണാചലിലെ കോണ്‍ഗ്രസ്‌ എം.എല്‍.എ നിദോ പവിത്രയുടെ മകന്‍ നിദോ തനിയാം ആണ്‌ ദക്ഷിണ ഡല്‍ഹിയിലെ ലജ്‌പത്‌നഗര്‍ മാര്‍ക്കറ്റിലുണ്ടായ സംഘട്ടനത്തില്‍ കൊല്ലപ്പെട്ടത്‌.
ബൂധനാഴ്‌ച്ച വൈകീട്ട്‌ മൂന്നു സുഹൃത്തുകള്‍ക്കൊപ്പം ഒരു വിലാസം തിരക്കാന്‍ ചെന്ന നിദോയെ കടയില്‍ വച്ച്‌ നിദോയുടെ മുടിയുടെ നിറത്തെ കളിയാക്കി കൊണ്ട്‌ വംശീയമായി അധിക്ഷേപിച്ചെന്ന്‌ പോലീസ്‌ പറയുന്നു. കടയില്‍ വച്ച്‌ ക്ഷുഭിതനായ നിദോ കടയിലെ ഗ്ലാസ്‌ അലമാര അടിച്ചുടച്ചു. ഇതിനെ തുടര്‍ന്ന്‌ കയ്യേറ്റമുണ്ടാവുകയും 7000 രൂപ നഷ്ടപരിഹാരം നല്‍കാമെന്ന്‌ നിദോ സമ്മതിക്കുകയും ചെയ്‌തു. നിദോയെയും സുഹൃത്തുക്കളെയും ചോദ്യം ചെയ്യാന്‍ കൊണ്ടുപോയ പോലീസ്‌ കുറച്ച്‌ കഴിഞ്ഞ്‌ അവരെ അവിടെത്തന്നെകൊണ്ടുവിട്ടു. ഇരുമ്പു ദണ്ഡും വടിയുമായി അവിടെ ഉണ്ടായിരുന്ന ചിലര്‍ നിദോയെ അടിച്ച്‌ പരിക്കേല്‍പ്പിക്കുകയായിരുന്നു. പിറ്റേന്ന്‌ വ്യാഴാഴ്‌ച്ച താമസസ്ഥലത്ത്‌ നിദോയെ മരിച്ച നിലയില്‍ കണ്ടെത്തുകയായിരുന്നു.
സംഭവത്തെക്കുറിച്ച്‌ ലജ്‌പത്‌നഗര്‍ പോലീസ്‌ ആദ്യം പരാതി സ്വീകരിക്കാന്‍ തയ്യാറായില്ലെന്നും കേന്ദ്ര പിന്നാക്ക കാര്യ മന്ത്രി നിനോംഗ്‌ എറിംഗ്‌ ഇടപെട്ട ശേഷമാണ്‌ എഫ്‌.ഐ.ആര്‍ രജിസ്റ്റര്‍ ചെയ്‌തതെന്നും അരുണാചലില്‍ നിന്നുള്ള എംപി തക്കറാം സജ്ഞയ്‌ ആരോപിച്ചു.
നിദോയുടെ ശരീരത്തില്‍ മാരകമായ മുറിവുകളൊന്നുമുണ്ടായിരുന്നില്ലെന്നും മരണകാരണം പോസ്‌റ്റമോര്‍ട്ടം റിപ്പോര്‍ട്ട്‌ ലഭിച്ച ശേഷമേ വ്യക്തമാകു എന്ന്‌ പോലീസ്‌ പറയുന്നു.
കഴിഞ്ഞ വര്‍ഷം ദില്ലിയില്‍ വച്ച്‌ ദാരുണമായി കൊല്ലപ്പെട്ട മണിപ്പൂര്‍ സ്വദേശിയായ 21 വയസുകാരനും വംശീയാധിക്ഷേപത്തിന്‌ ഇരയായതാണെന്ന്‌ ആരോപണമുണ്ടായിരുന്നു. വടക്കു കിഴക്കന്‍ സംസ്ഥാനക്കാര്‍ക്ക്‌ ഡല്‍ഹിയില്‍ നേരിടേണ്ടി വരുന്ന അപമാനത്തിന്റെ യഥാര്‍ത്ഥ മുഖമാണ്‌ ഇത്തരം സംഭവങ്ങള്‍ .

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha