മത്സ്യത്തൊഴിലാളികളെ വധിച്ചവരെ പത്മ അവാര്‍ഡും മറ്റും നല്‍കി ആദരിക്കാന്‍ കഴിയില്ലെന്ന് അറ്റോര്‍ണി ജനറല്‍ . അവര്‍ വിചാരണ നേരിടുക തന്നെ വേണമെന്നും എജി കോടതിയില്‍ പറഞ്ഞു. നാവികര്‍ക്കെതിരെ സുവ നിയമം ചുമത്തണമെന്നാണ് കേന്ദ്രസര്‍ക്കാരിന്റെ നിലപാട്.

അതേസമയം സുവ നിയമത്തില്‍ വധശിക്ഷ ഉറപ്പുവരുത്തുന്ന 3 ജി (1) ചുമത്തില്ല. പകരം 10 വര്‍ഷം തടവ് ഉറപ്പ് വരുത്തുന്ന വകുപ്പാണ് ചുമത്തുക. അതായത് കടലിലെ ഭീകരപ്രവര്‍ത്തനം തടയുന്നതിനുള്ള സുവാ നിയമത്തിലെ മൂന്ന്-എ വകുപ്പ് പ്രകാരം പ്രോസിക്യൂട്ട് ചെയ്യാനാണ് സര്‍ക്കാര്‍ തീരുമാനം.

നേരത്തേ നാവികര്‍ക്ക് വധശിക്ഷ ഉറപ്പാക്കുന്ന വകുപ്പുകള്‍ പ്രകാരം പ്രോസിക്യൂട്ട് ചെയ്യാന്‍ എന്‍ഐഎയ്ക്ക് അനുമതി നല്‍കിയിരുന്നെങ്കിലും ഇറ്റലിയുടേയും യൂറോപ്യന്‍ യൂണിയന്റേയും എതിര്‍പ്പിനെ തുടര്‍ന്ന് അനുമതി പരിഷ്‌കരിക്കുകയായിരുന്നു. അതേസമയം സുവ നിയമ ചുമത്തിയതിന്റെ നിയമസാധുത ഇറ്റലി കോടതിയില്‍ ചോദ്യംചെയ്തു.

കടല്‍ക്കൊള്ളക്കാര്‍ക്കെതിരെ ചുമത്തുന്ന നിയമമാണ് സുവയെന്നും ഇറ്റാലിയന്‍ നാവികര്‍ കടല്‍ക്കൊള്ളക്കാരല്ലെന്നും 13 മാസമായി വിചാരണ തുടങ്ങാത്ത സാഹചര്യത്തില്‍ നാവികരെ ഇറ്റലിയിലേക്ക് തിരിച്ചയയ്ക്കണമെന്നും ഇറ്റലിക്കു വേണ്ടി ഹാജരായ അഭിഭാഷകന്‍ വാദിച്ചു.

കടല്‍ക്കൊലക്കേസില്‍ സുവ നിയമത്തിനെതിരായ ഇറ്റലിയുടെ ഹര്‍ജിയില്‍ അടുത്ത ചൊവ്വാഴ്ച സുപ്രീംകോടതി അന്തിമവാദം കേള്‍ക്കും. നാവികരെ തിരിച്ചയക്കണമെന്ന ഹര്‍ജിയിലും കോടതി വാദം കേള്‍ക്കും. അതേസമയം ഇറ്റാലിയന്‍ നാവികര്‍ വിചാരണ നേരിടണമെന്ന് കേന്ദ്രസര്‍ക്കാര്‍ നിലപാടെടുത്തു. സുവ നിയമത്തിലെ വധശിക്ഷ വകുപ്പ് ഒഴിവാക്കിയ കാര്യവും കേന്ദ്രസര്‍ക്കാര്‍ കോടതിയെ അറിയിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha