രാജ്യം വിട്ട എല്ലാ കുറ്റവാളികളെയും തിരികെയെത്തിക്കണമെന്ന് കേന്ദ്ര സര്ക്കാരിനോട് സുപ്രിംകോടതി, രൂക്ഷ വിമര്ശനവുമായി വീണ്ടും ചീഫ് ജസ്റ്റിസ്
രാജ്യം വിട്ട എല്ലാ കുറ്റവാളികളെയും തിരികെയെത്തിക്കണമെന്ന് കേന്ദ്ര സര്ക്കാരിനോട് സുപ്രിംകോടതി. നിയമ നടപടികളില് നിന്നും രക്ഷപ്പെടാനായി രാജ്യം വിടുന്ന കാഴ്ച്ചയാണ് ഇപ്പോള് കാണുന്നത്. ഇവരെ തിരികെ നിയമത്തിനു മുന്നിലെത്തിക്കാന് കേന്ദ്രസര്ക്കാര് തന്നെ മുന്കൈയെടുക്കണമെന്നും ജസ്റ്റിസ് ഖെഹാറും ജസ്റ്റിസ് അരുണ് മിശ്രയും ഉള്പ്പെട്ട ബെഞ്ച് പറഞ്ഞു. നിയമത്തിന്റെ പിടിയില് നിന്ന് ആര്ക്കും രക്ഷപ്പെടാന് കഴിയില്ലെന്ന് ഒരു സന്ദേശം നല്കേണ്ടതുണ്ട്. അതിന് അവരെ എത്രയും പെട്ടന്ന് ഇന്ത്യയിലെത്തിക്കണം. ക്രിമിനല് കേസില് ഉള്പ്പെട്ട വനിതാ വ്യവസായി റിതികയെ ലണ്ടനില് നിന്ന് തിരികെ കൊണ്ടു വരാന് ആവശ്യമായ നടപടികള് ഉടന് സ്വീകരിക്കണമെന്ന് കോടതി സര്ക്കാരിനോട് ആവശ്യപ്പെട്ടു.
സുപ്രിംകോടതിയുടെ അനുവാദത്തോടെയാണ് രോഗിയായ ഭര്ത്താവിനെ സന്ദര്ശിക്കാനെന്നു പറഞ്ഞ് റിതിക ലണ്ടനിലേക്ക് പോയത്. എന്നാല് അവര് പിന്നെ തിരിച്ചു വന്നില്ല. ഇവരുടെ പാസ്പോര്ട്ട് റദ്ദാക്കാന് കോടതി നേരത്തെ സര്ക്കാരിന് നിര്ദ്ദേശം നല്കിയിരുന്നു.
ട്രൈബ്യൂണലുകളില് അടിസ്ഥാന സൗകര്യം ഒരുക്കാന് കേന്ദ്രസര്ക്കാര് തയ്യാറാകുന്നില്ലെന്ന് ചീഫ് ജസ്റ്റിസ് വിമര്ശിച്ചു. സുപ്രീംകോടതി ജഡ്ജിമാര്ക്ക് നല്കുന്ന ബംഗ്ലാവും സൗകര്യങ്ങളും ട്രൈബ്യൂണല് അധ്യക്ഷന്മാര്ക്ക് നല്കാനാകില്ലെന്നായിരുന്നു കേന്ദ്ര നിയമമന്ത്രി രവിശങ്കര് പ്രസാദിന്റെ മറുപടി.
സെന്ട്രല് അഡ്മിനിസ്ട്രേറ്റീവ് ട്രൈബ്യൂണലിന്റെ അഖിലേന്ത്യാ സമ്മേളനം ഉദ്ഘാടനം ചെയ്യവേയായിരുന്നു കേന്ദ്രസര്ക്കാരിനെതിരെ സുപ്രീംകോടതി ചീഫ് ജസ്റ്റിസ് ടി എസ് ഠാക്കൂറിന്റെ വിമര്ശനം. കേന്ദ്ര നിയമമന്ത്രി രവിശങ്കര് പ്രസാദിനേയും പേഴ്സണല്കാര്യ മന്ത്രി ജിതേന്ദര് സിംഗിനേയും വേദിയിലിരുത്തിയായിരുന്നു വിമര്ശനം.
ട്രൈബ്യൂണലുകള്ക്ക് പ്രവര്ത്തിക്കാന് ആവശ്യമായ ഭൗതിക സൗകര്യം രാജ്യത്തില്ല. ട്രൈബ്യൂണല് അധ്യക്ഷന്മാര്ക്ക് സൗകര്യങ്ങള് നല്കാന് കേന്ദ്രസര്ക്കാര് തയ്യാറാകുന്നില്ല. താന് ആവശ്യപ്പെട്ടാലും ട്രൈബ്യൂണലുകളുടെ അധ്യക്ഷ സ്ഥാനം ഏറ്റെടുക്കാന് സുപ്രീംകോടതി ജഡ്ജിമാര് തയ്യാറാവുന്നില്ലെന്നും ചീഫ് ജസ്റ്റ് പറഞ്ഞു. ഹൈക്കോടതികളില് 500 ഓളം ജഡ്ജിമാരുടെ ഒഴിവു നികത്താന് സര്ക്കാര് നടപടിയെടുക്കുന്നില്ല. ജഡ്ജിമാരില്ലാത്തതിനാല് കോടതി മുറികള് ഒഴിഞ്ഞുകിടക്കുന്നു. ജഡ്ജിമാരില്ലാത്തതിനാല് കര്ണണ്ാകടക ഹൈക്കോടതിയിലെ ഒരു നില അടഞ്ഞ് കിടക്കുകയാണെന്നും ചീഫ് ജസ്റ്റിസ് പറഞ്ഞു. എന്നാല് ഏറ്റവും കൂടുതല് ജഡ്ജിമാരെ നിയമിക്കുന്ന ലോകത്തിലെ രണ്ടാമത്തെ രാജ്യമാണ് ഇന്ത്യയെന്നായിരുന്നു കേന്ദ്ര നിയമമന്ത്രി രവിശങ്കര് പ്രസാദിന്റെ മറുപടി.
ജഡ്ജിമാരുടെ നിയമനത്തില് കേന്ദ്ര സര്ക്കാര് ഒഴിവാക്കിയ 43 ജഡ്ജിമാരെ കൂടി ഉള്പ്പെടുത്തി ജഡ്ജിമാരുടെ പട്ടിക ചീഫ് ജസ്റ്റ് അധ്യക്ഷനായ ബഞ്ച് കേന്ദ്ര സര്ക്കാരിന് തിരിച്ചയച്ചിരുന്നു. ഇതിന് പിന്നാലെയാണ് ട്രൈബ്യൂണല് വിഷയത്തിലും കേന്ദ്രസര്ക്കാരും ചീഫ് ജസ്റ്റിസും നേര്ക്കുനേര് വരുന്നത്.
https://www.facebook.com/Malayalivartha
