കാമുകിയെ കല്യാണം കഴിക്കാനുള്ള ആഗ്രഹത്താല്‍ ആ യുവാവ് എന്തിനും തയ്യാറായിരുന്നു കാരണം അത്രക്കിഷ്ടമായിരുന്നു അവളെ. കിണറ്റില്‍ചാടി ചാകാനും തയ്യാറായ അവനെ ആസാമി നന്നായി വലിച്ചു. 
മൈസൂരുവില്‍ കാമുകിയെ വിവാഹം കഴിക്കാന്‍ സഹായം തേടി മന്ത്രവാദിയെ സമീപിച്ച യുവാവിനെ കബളിപ്പിച്ച് ലക്ഷക്കണക്കിനു രൂപയുടെ സ്വര്‍ണവും വെള്ളിയും തട്ടിയെടുത്തതായി പരാതി. ഏതു പ്രശ്‌നവും 24 മണിക്കൂറിനകം പരിഹരിക്കുമെന്ന പത്രപ്പരസ്യത്തില്‍ വിശ്വസിച്ച കെആര്‍ മൊഹല്ല കക്കരവാഡി സ്വദേശി അസ്മത് ഖാനാണ് കബളിപ്പിക്കപ്പെട്ടത്. വിവാഹമോചിതയായ യുവതിയുമായി ഇയാള്‍ പ്രണയത്തിലായിരുന്നു. വീട്ടുകാരുടെ എതിര്‍പ്പു മൂലം യുവതി വിവാഹത്തിനു സമ്മതിക്കാത്തതില്‍ വിഷമിച്ചിരിക്കെയാണ് പരസ്യം കണ്ട് ബാബാ കബീര്‍ ഖാന്‍ എന്നയാളെ സമീപിച്ചത്. 
മന്ത്രവാദത്തിലൂടെ യുവതിയെ വിവാഹത്തിനു സമ്മതിപ്പിക്കാമെന്നു വിശ്വസിപ്പിച്ച ഇയാള്‍ യുവാവിനോട് 250 ഗ്രാം സ്വര്‍ണവും 250 ഗ്രാം വെള്ളിയുമായി എത്താന്‍ ആവശ്യപ്പെട്ടു. വീട്ടുകാരെ അറിയിക്കാതെ കൊണ്ടുവന്ന സ്വര്‍ണവും വെള്ളിയും കുടത്തില്‍ നിക്ഷേപിക്കാന്‍ നിര്‍ദേശിച്ച കബീര്‍ഖാന്‍ പൂജ നടത്തുന്നുവെന്ന വ്യാജേന മുറി മുഴുവന്‍ പുക കൊണ്ടു നിറച്ചു. പൂജയ്ക്കു ശേഷം വായ്‌കെട്ടിയ കുടം നല്‍കി മൂന്നു ദിവസം കഴിഞ്ഞേ തുറക്കാവൂ എന്നു നിര്‍ദേശിച്ചു യുവാവിനെ പറഞ്ഞയച്ചു. വീട്ടിലെത്തി മൂന്നു ദിവസത്തിനു ശേഷം തുറന്നു നോക്കിയപ്പോള്‍ കുടത്തില്‍ സ്വര്‍ണവും വെള്ളിയും ഉണ്ടായിരുന്നില്ലെന്ന് അസ്മത്ത് ഖാന്‍ കെആര്‍ പൊലീസില്‍ നല്‍കിയ പരാതിയില്‍ പറയുന്നു.