പത്തുരൂപയ്ക്കു ചെരുപ്പുതുന്നിയ ചെരുപ്പുകുത്തിക്ക് കേന്ദ്രമന്ത്രി സ്മൃതി ഇറാനി 100 രൂപ നല്‍കി . മന്ത്രിയുടെ ഈ പ്രവൃത്തിക്കു സമൂഹമാധ്യമങ്ങളില്‍ വലിയ തോതിലാണ് അഭിനന്ദന പ്രവാഹം. ഇഷ ഫൗണ്ടേഷന്റെ പരിപാടിയില്‍ പങ്കെടുക്കാനായി തമിഴ്‌നാട്ടില്‍ എത്തിയപ്പോള്‍ നടന്ന സംഭവത്തിന്റെ വിഡിയോ ഇപ്പോള്‍ വൈറലാവുകയാണ്.

വിമാനത്തില്‍നിന്ന് ഇറങ്ങുമ്പോള്‍ത്തന്നെ മന്ത്രിയുടെ ചെരുപ്പ് പൊട്ടിയിരുന്നു. ചടങ്ങു നടക്കുന്ന സ്ഥലത്തേക്കു പോകവേ വിമാനത്താവളത്തില്‍നിന്ന് 16 കിലോമീറ്റര്‍ ദൂരെയുള്ള പേരൂരില്‍ വച്ചാണ് അവര്‍ ചെരുപ്പുകുത്തിയെ കണ്ടത്. ഉടന്‍ തന്നെ വണ്ടിനിര്‍ത്തി ചെരുപ്പ് നന്നാക്കാനായി മന്ത്രി തന്നെ നേരിട്ട് ഇറങ്ങുകയായിരുന്നു. തമിഴ്‌നാട് ബിജെപി ജനറല്‍ സെക്രട്ടറി വാനതി ശ്രീനിവാസനും സ്മൃതി ഇറാനിക്കൊപ്പമുണ്ടായിരുന്നു.

ചെരുപ്പ് തുന്നിത്തീരുന്നതുവരെ മന്ത്രി സമീപത്തിരുന്നു. 10 രൂപയാണ് കൂലിയായി ഇയാള്‍ ആവശ്യപ്പെട്ടത്. എന്നാല്‍ ചെയ്ഞ്ച് വേണ്ട ബാക്കി കൈവശം വച്ചുകൊള്ളൂ എന്നുപറഞ്ഞ് 100 രൂപയാണ് ഇയാള്‍ക്കു നല്‍കിയത്. എന്നാല്‍ അധികം പണം വാങ്ങിയതിനാല്‍ ചെരുപ്പില്‍ കൂടുതല്‍ തുന്നലുകള്‍ നടത്തിയശേഷമാണ് അയാള്‍ മന്ത്രിയെയും സംഘത്തെയും വിട്ടത്