തീയറ്ററുകളില്‍ ദേശീയഗാനം കേള്‍പ്പിക്കണമെന്ന് സുപ്രീം കോടതി ഉത്തരവിട്ടു. എല്ലാ തീയറ്ററുകളിലും ദേശീയ പതാക പ്രദര്‍ശിപ്പിക്കണം. ദേശീയ ഗാനം കേള്‍ക്കുന്ന സമയത്ത് എല്ലാവരും എഴുന്നേറ്റ് നിന്ന് ബഹുമാനം പ്രകടിപ്പിക്കണമെന്നും സുപ്രീം കോടതി ഉത്തരവിട്ടു.

യോഗ്യമല്ലാത്ത വസ്തുക്കളില്‍ ദേശീയഗാനം അച്ചടിക്കരുത്. സാമ്പത്തിക ലാഭം ലക്ഷ്യമിട്ടുകൊണ്ടുള്ള പരസ്യ ചിത്രീകരണം നടത്തരുതെന്നും കോടതി നിര്‍ദേശിച്ചു. ഉത്തരവ് കര്‍ശനമായി പാലിക്കണമെന്ന് നിര്‍ദേശിച്ച് കേന്ദ്രസര്‍ക്കാര്‍ സംസ്ഥാന ചീഫ് സെക്രട്ടറിമാര്‍ക്കു കത്തയച്ചു. ഉത്തരവ് പത്ര മാധ്യമങ്ങളില്‍ പ്രസിദ്ധീകരിക്കണമെന്നും നിര്‍ദേശിച്ചിട്ടുണ്ട്. ദേശീയഗാനത്തെ അവഹേളിക്കുന്നത് തടയണമെന്നും ദേശീയഗാനം ആലപിക്കുന്നതും കേള്‍പ്പിക്കുന്നതും സംബന്ധിച്ച് കൃത്യമായ മാര്‍ഗ്ഗനിര്‍ദേശം വേണമെന്നും ആവശ്യപ്പെട്ടുള്ള പൊതുതാല്‍പര്യ ഹര്‍ജി പരിഗണിക്കുകയായിരുന്നു കോടതി.

നിലവില്‍ മഹാരാഷ്ട്രയില്‍ സിനിമ പ്രദര്‍ശനത്തിനു മുന്‍പ് ദേശീയഗാനം കേള്‍പ്പിക്കുന്ന പതിവുണ്ട്. നേരത്തെ രാജ്യത്തിന്റെ വിവിധ ഭാഗങ്ങളില്‍ ദേശീയ ഗാനത്തെ അപമാനിച്ചെന്നുള്ള ആരോപണത്തില്‍ തര്‍ക്കവും മര്‍ദനവുമടക്കമുണ്ടായിട്ടുണ്ട്. ദേശീയ ഗാനം കേള്‍പ്പിച്ച സമയത്ത് എഴുന്നേല്‍ക്കാത്തതിനും പലര്‍ക്കും മര്‍ദ്ദനമേറ്റിട്ടുണ്ട്.

തിരുവനന്തപുരം കൈരളി തിയറ്ററില്‍ സിനിമ പ്രദര്‍ശിപ്പിക്കും മുന്‍പ് ദേശീയഗാനം കേള്‍പ്പിച്ചപ്പോള്‍ എഴുന്നേല്‍ക്കാതിരുന്നതിന് യുവാവിനെ അറസ്റ്റുചെയ്തത് കേരളത്തിലും വലിയ പ്രശ്‌നങ്ങള്‍ക്കിടയാക്കിയിരുന്നു.
സിനിമ തീയേറ്ററുകളില്‍ ദേശീയ ഗാനം കേള്‍പ്പിക്കുന്നതു സംബന്ധിച്ച് ശ്യം മിശ്രയെന്ന വ്യക്തിയാണ് പൊതു താല്‍പര്യ ഹര്‍ജി സമര്‍പ്പിച്ചത്. ശ്യം മിശ്രയ്ക്കു വേണ്ടി അഭിഭാഷകനായ അഭിനവ് ശ്രീവാസ്തവയിലൂടെ സമര്‍പ്പിച്ച ഹര്‍ജിയില്‍ ജസ്റ്റിസ് ദീപക് മിശ്ര, അമിതാവ റോയ് എന്നിവിരടങ്ങുന്ന ബെഞ്ചാണ് നിര്‍ദ്ദശം പുറപ്പെടുവിപ്പിച്ചിരിക്കുന്നത്. വിഷയം കാണിച്ച് കഴിഞ്ഞ ഒക്ടോബര്‍ 31നാണ് ശ്യം മിശ്ര കോടതിയെ സമീപിച്ചത്. ദേശീയ ഗാനത്തെ അവഹേളിക്കുന്ന തരത്തില്‍ നരവധി റിപ്പോര്‍ട്ടുകള്‍ ഇപ്പോള്‍ പുറത്തുവരുന്നുവെന്നും ഇത് ഭരണഘടനാവിരുദ്ധമാണെന്നും ഹര്‍ജിയില്‍ ചൂണ്ടിക്കാട്ടുന്നുണ്ട്. അനുചിതമായ നിരവധി സാഹചര്യങ്ങളില്‍ ദേശീയ ഗാനം ആലപിക്കുന്നത് വിലക്കണമെന്നും ഹര്‍ജിയില്‍ ആവശ്യപ്പെടുന്നുണ്ട്. തീയേറ്ററുകളില്‍ ദേശീയ ഗാനം കേള്‍പ്പിക്കുന്നത് സാമ്പത്തിക നേട്ടത്തിനു വേണ്ടി ദുരുപയോഗം ചെയ്യരുതെന്നും ദേശീയ ഗാനം പൂര്‍ത്തിയാവുന്നതു വരെ യാതൊരു വിധത്തിലുള്ള ഇടപെടലുകളും ഉണ്ടാകരുതെന്നും കോടതി നിര്‍ദ്ദേശിക്കുന്നു. താളമോ രീതിയോ മാറ്റിയുള്ള ദേശീയ ഗാനം കേള്‍പ്പിക്കരുതെന്നും കോടതി നിഷ്‌കര്‍ഷിക്കുന്നുണ്ട്.