രാജ്യത്തിന്റെ സമ്പദ്‌വ്യവസ്ഥയെക്കുറിച്ചും നോട്ട് അസാധുവാക്കിയ തീരുമാനത്തിന്റെ പ്രത്യാഘാതങ്ങളെക്കുറിച്ചും 2017-18 ബജറ്റിനെക്കുറിച്ചും ചര്‍ച്ച ചെയ്യാന്‍ പ്രധാനമന്ത്രി നരേന്ദ്ര മോഡി ഇന്നു പ്രമുഖ സാമ്പത്തിക വിദഗ്ധരുമായി ചര്‍ച്ച നടത്തും.
നീതി ആയോഗ് സംഘടിപ്പിക്കുന്ന ഈ ചര്‍ച്ചയില്‍ 15 വര്‍ഷത്തെ വികസനത്തിനായി തയ്യാറാക്കിയ സമീപനരേഖയും ചര്‍ച്ച ചെയ്യും. രാജ്യത്തിനുള്ളില്‍ നിന്നും പുറത്തുനിന്നുമായി 15 സാമ്പത്തിക വിദഗ്ധരെയാണു ചര്‍ച്ചയ്ക്കു ക്ഷണിച്ചിരിക്കുന്നത്.

നവംബര്‍ എട്ടിന് 500, 1000 രൂപ നോട്ടുകള്‍ അസാധുവാക്കിയതിനുശേഷമുള്ള സാമ്പത്തിക സ്ഥിതിഗതികള്‍ യോഗം ചര്‍ച്ച ചെയ്യും. രാജ്യമെങ്ങും ജനങ്ങള്‍ നോട്ട് ലഭിക്കാതെ വലയുന്ന സ്ഥിതിയാണ്. സാധാരണനില പുനഃസ്ഥാപിക്കാന്‍ പ്രധാനമന്ത്രി അഭ്യര്‍ഥിച്ച 50 ദിവസത്തെ കാലാവധി ഈ 30നു തീരുകയാണ്. നോട്ടുകളുടെ ലഭ്യത കൂടിയതല്ലാതെ പ്രതിസന്ധിക്കു യാതൊരു പരിഹാരവുമായിട്ടില്ല.

2016-ലെ പൊതുബജറ്റ് അവതരിപ്പിച്ചതിനു ശേഷം പ്രധാനമന്ത്രി നീതി ആയോഗിനോട് ആവശ്യപ്പെട്ടതു 15 വര്‍ഷത്തേക്കുള്ള വികസനത്തിനു സമീപനരേഖ തയ്യാറാക്കാനാണ്. ഇതു തയ്യാറായിട്ടുണ്ട്. ഇന്നത്തെ യോഗത്തില്‍ പങ്കെടുക്കുന്ന 15 പേരോടും അവരവരുടെ വിലയിരുത്തലുകളും നിര്‍ദേശങ്ങളും പവര്‍ പോയിന്റ് പ്രസന്റേഷന്‍ വഴി അവതരിപ്പിക്കാനാണ് ആവശ്യപ്പെട്ടിരിക്കുന്നത്.

വരുന്ന വര്‍ഷം ബജറ്റ് അവതരണം നേരത്തെയാക്കിയിരിക്കുകയാണ് ഫെബ്രുവരി ഒന്നിന്. നീതി ആയോഗ് സിഇഒ അമിതാഭ് കാന്ത്, അംഗങ്ങള്‍ ബിബേക് ദെബ്രോയ്, വി.കെ.സാരസ്വത്, രമേശ് ചന്ദ് എന്നിവരും കേന്ദ്ര ധനമന്ത്രാലയത്തിലെയും വാണിജ്യ മന്ത്രാലയത്തിലെയും സെക്രട്ടറിമാരും യോഗത്തില്‍ പങ്കെടുക്കും.