ഇന്ത്യയെ ആക്രമിക്കുന്നതിനായി ഭീകരര്‍ക്കു സഹായം നല്‍കുന്ന പാക്ക് ചാരസംഘടനയായ ഐഎസ്‌ഐ തന്ത്രങ്ങള്‍ മാറ്റുന്നുവെന്നു റിപ്പോര്‍ട്ട്. ജമ്മു കശ്മീര്‍ അതിര്‍ത്തി വഴിയാണു ഭീകരര്‍ പ്രധാനമായും ഇന്ത്യയിലേക്കു നുഴഞ്ഞുകയറുന്നതും ആക്രമണങ്ങള്‍ നടത്തുന്നതും. ഇതിനു പകരം, ഇന്ത്യയുടെ കിഴക്കന്‍ അതിര്‍ത്തികളില്‍ കൂടുതല്‍ ശ്രദ്ധകേന്ദ്രീകരിച്ച് അവിടെ രഹസ്യമായി ഭീകരരുടെ ലോഞ്ച് പാഡുകള്‍ നിര്‍മിക്കാനാണു പദ്ധതിയെന്നാണു റിപ്പോര്‍ട്ട്. ഐഎസ്‌ഐ ഇത്തരം നീക്കവുമായി മുന്നോട്ടുപോവുകയാണ് എന്നാണു രഹസ്യാന്വേഷണ ഏജന്‍സികള്‍ നല്‍കുന്ന മുന്നറിയിപ്പ്. ഒരു പ്രമുഖ ദേശീയ മാധ്യമാണു വാര്‍ത്ത റിപ്പോര്‍ട്ട് ചെയ്തിരിക്കുന്നത്.

മ്യാന്‍മര്‍ തായ്‌ലന്‍ഡ് അതിര്‍ത്തില്‍ ഐഎസ്‌ഐ, ഭീകരരുടെ പുതിയ ലോഞ്ച് പാഡ് നിര്‍മിക്കാന്‍ ശ്രമിക്കുന്നു. ഇതിനു മുന്നോടിയായി മ്യാന്‍മര്‍ തായ്‌ലന്‍ഡ് അതിര്‍ത്തിയിലുള്ള മരിസോട്ടില്‍ പുതിയ ഭീകര ക്യാംപ് തയാറാക്കിയെന്നും റിപ്പോര്‍ട്ടില്‍ പറയുന്നു. ഇന്ത്യയിലും ബംഗ്ലാദേശിലും ആക്രമണം നടത്തുകയെന്നതാണ് ഈ ലോഞ്ച്പാഡിന്റെ ഉദ്ദേശം. ഇതിന്റെ ചിത്രങ്ങള്‍ ഏതാനും മാസം മുന്‍പു രഹസ്യാന്വേഷണ ഉദ്യോഗസ്ഥര്‍ക്കു ലഭിച്ചിരുന്നു.

താലിബാന്‍ ഭീകരര്‍ ആണ് ആക്രമണം നടത്താന്‍ റോഹങ്ക്യ മുസ്‌ലിംസുകള്‍ക്കു പരിശീലനം നല്‍കുന്നത്. പാക്ക് വംശജനും റോഹങ്ക്യ മുസ്‌ലിം വിഭാഗക്കാരനുമായ പാക്ക് താലിബാന്‍ നേതാവ് മൗലാന അബ്ദുല്‍ കുദ്ദുസാണ് നീക്കങ്ങള്‍ക്കു നേതൃത്വം നല്‍കുന്നത്. ഇയാളും ലഷ്‌കര്‍ നേതാവ് ഹാഫിസ് സയീദും തമ്മില്‍ കൂടിക്കാഴ്ച നടത്തിയിട്ടുണ്ടെന്നുമാണു രഹസ്യാന്വേഷണ ഏജന്‍സികള്‍ക്കു ലഭിക്കുന്ന വിവരം. ഐഎസ്‌ഐ ആണ് കൂടിക്കാഴ്ചയ്ക്ക് അവസരം ഒരുക്കിയതെന്നും ആവശ്യമായ പണവും ആയുധവും നല്‍കുന്നതും പാക്ക് ചാരസംഘടനയാണെന്നുമാണു റിപ്പോര്‍ട്ട്.