ഇന്ത്യയുടെ ശത്രുക്കളുമായി പൊരുതിനില്‍ക്കാന്‍ 36 റാഫേല്‍ വിമാനങ്ങള്‍ മാത്രം പോരെന്ന് വ്യോമസേനാ മേധാവി അരൂപ് റാഹ. 200 - 250 യുദ്ധവിമാനങ്ങള്‍ ഉണ്ടെങ്കില്‍ മാത്രമേ വ്യോമസേന ശക്തമാകുകയുള്ളൂ. പോര്‍വിമാനങ്ങളാണ് വ്യോമസേനയുടെ ശക്തി. തേജസിനു പുറമെ കൂടുതല്‍ യുദ്ധവിമാനങ്ങള്‍ രാജ്യത്തിന് ആവശ്യമാണ്. അടുത്ത പത്തുവര്‍ഷത്തിനുള്ളില്‍ അത് സ്വന്തമാക്കണമെന്നും റാഹ പറഞ്ഞു.
ഹെവി വെയിറ്റ് യുദ്ധവിമാനങ്ങള്‍ ഇന്ത്യയ്ക്കുണ്ട്. അവയെല്ലാം ഇനിയൊരു 30 - 40 വര്‍ഷത്തേക്ക് നിലനില്‍ക്കുന്നതാണ്. വ്യോമസേനയുടെ ആവശ്യാനുസരണം തേജസ് ലൈറ്റ് കോംമ്ബാറ്റ് യുദ്ധവിമാനങ്ങള്‍ എത്തിച്ചേരും. റാഫേല്‍ വിമാനങ്ങള്‍ മീഡിയം വെയിറ്റ് ഗണത്തില്‍പ്പെടുന്നവയാണ്.

വളരെ ഉപയോഗപ്രദമായ ഒന്നാണത്. ഏതു സാഹചര്യത്തിലും ആവശ്യാനുസരണം ഉപയോഗിക്കാന്‍ സാധിക്കും. 36 വിമാനങ്ങള്‍ മാത്രമാണ് നമ്മള്‍ ആവശ്യപ്പെട്ടിരിക്കുന്നത്. കൂടുതല്‍ മിഡില്‍ വെയിറ്റ് യുദ്ധവിമാനങ്ങള്‍ സേനയ്ക്ക് ആവശ്യമാണെന്നും റാഹ കൂട്ടിച്ചേര്‍ത്തു. ഈമാസം 31നാണ് റാഹ വിരമിക്കുന്നത്.
2015 ഏപ്രിലിലെ പാരിസ് സന്ദര്‍ശനകാലയളവിലാണ് റാഫേല്‍ വിമാനങ്ങള്‍ വാങ്ങുമെന്ന് പ്രധാനമന്ത്രി പറഞ്ഞത്. എന്നാല്‍ ഈവര്‍ഷം സെപ്റ്റംബറിലാണ് ഇതു സംബന്ധിച്ച ധാരണയിലെത്തിയത്. 2019 സെപ്റ്റംബറിനും 2022 ഏപ്രിലിനുമിടയില്‍ ഇന്ത്യയ്ക്കാവശ്യമായ യുദ്ധവിമാനങ്ങള്‍ നിര്‍മിച്ചു നല്‍കാമെന്നതാണ് കരാര്‍.