പിതാവ് മരിച്ചു പോയ നിര്‍ദ്ധനരായ 236 പെണ്‍കുട്ടികളുടെ വിവാഹം നടത്തി വജ്രവ്യാപാരി. ഇക്കഴിഞ്ഞ ക്രിസ്തുമസ് ദിനത്തില്‍ നടത്തിയത് 236 ജോഡി വധൂവരന്മാരുടെ വിവാഹമാണ്. പടിഞ്ഞാറന്‍ ഗുജറാത്തിലെ പാവപ്പെട്ട കുടുംബങ്ങളില്‍ നിന്നുള്ളവരെയാണ് വിവാഹത്തിനായി തെരഞ്ഞെടുത്തത്. 2012 മുതല്‍ സമൂഹവിവാഹം നടത്തുന്നുണ്ട് നാല്‍പത്തിയെട്ട് വയസുള്ള മഹേഷ് സവാനി.

ഇത്രയധികം പെണ്‍കുട്ടികളെ വിവാഹം കഴിപ്പിക്കാന്‍ കഴിഞ്ഞത് വലിയ അനുഗ്രഹമായാണ് കാണുന്നതെന്ന് മഹേഷ് സവാനി പറഞ്ഞു. ഇതുവരെ 700ല്‍ അധികം പെണ്‍കുട്ടികളുടെ വിവാഹം നടത്താന്‍ കഴിഞ്ഞു. രക്ഷിതാവ് മരിച്ചു പോയ നിര്‍ദ്ധനരായ പെണ്‍കുട്ടികളെയാണ് കൂടുതലും സമൂഹ വിവാഹത്തില്‍ ഉള്‍പ്പെടുത്തുന്നത്.

വിവാഹിതരായ ഓരോ ജോഡികള്‍ക്കും ആറായിരം രൂപ വില വരുന്ന സ്വര്‍ണ്ണവും വീട്ടുസാധനങ്ങളും സമ്മാനമായി നല്‍കുകയും ഉണ്ടായി. കഴിഞ്ഞ വര്‍ഷം 151 ജോഡികളുടെ വിവാഹം നടത്തിയിരുന്നു. 2014ല്‍ 111 ജോഡികളുടെ വിവാഹം നടത്തിക്കൊടുത്തു.

ഇത്തവണ തന്റെ മകനും അടുത്ത ബ്വന്ധുവും സമൂഹ വിവാഹത്തില്‍ വിവാഹിതരായെന്നും മഹേഷ് സവാനി പറഞ്ഞു. അങ്ങനെ മൊത്തം 238 ജോഡികളുടെ വിവാഹം നടത്താന്‍ കഴിഞ്ഞു. തന്റെ ജീവനക്കാരില്‍ ഒരാള്‍ അയാളുടെ മകളുടെ വിവാഹത്തിന് ദിവസങ്ങള്‍ക്ക് മുന്‍പ് മരിച്ചു പോയതിനെ തുടര്‍ന്നാണ് സമൂഹവിവാഹം നടത്താന്‍ തുടങ്ങിയതെന്നും മഹേഷ് സവാനി പറഞ്ഞു.