അഖിലേഷ് യാദവിനെയും രാംഗോപാല് യാദവിനെയും പാര്ട്ടിയില് നിന്നും പുറത്താക്കി, ആറു വര്ഷത്തേക്കാണ് ഇരുവരെയും പുറത്താക്കിയത്
സമാജ്വാദി പാര്ട്ടി പിളര്പ്പിലേക്കു നീങ്ങുന്നുവെന്ന സൂചനകള് ശരിവച്ച് ഉത്തര്പ്രദേശ് മുഖ്യമന്ത്രി അഖിലേഷ് യാദവിനെയും അദ്ദേഹത്തിന്റെ വിശ്വസ്തനായ രാംഗോപാല് യാദവിനെയും പാര്ട്ടിയില്നിന്ന് പുറത്താക്കി. പാര്ട്ടി വിരുദ്ധ പ്രവര്ത്തനം നടത്തിയെന്നാരോപിച്ച് ആറു വര്ഷത്തേക്കാണ് ഇരുവരെയും പുറത്താക്കിയത്. രാം ഗോപാല് യാദവ് തന്റെ മകന്റെ ഭാവി തകര്ക്കുകയാണെന്നും ഇക്കാര്യം അഖിലേഷ് തിരിച്ചറിയുന്നില്ലെന്നും തീരുമാനം പ്രഖ്യാപിച്ച മുലായം സിങ് യാദവ് ആരോപിച്ചു. അഖിലേഷിന് പകരം പുതിയ മുഖ്യമന്ത്രിയെ ഉടന് തീരുമാനിക്കുമെന്നും അദ്ദേഹം അറിയിച്ചു. അഖിലേഷ് യാദവും ഇളയച്ഛനും പാര്ട്ടി സംസ്ഥാന അധ്യക്ഷനുമായ ശിവ്പാല് യാദവും തമ്മിലുള്ള മുപ്പിളമ തര്ക്കം സ്ഥാനാര്ത്ഥി നിര്ണയത്തിലും കടന്നു വന്നതോടെയാണ് സമാജ് വാദി പാര്ട്ടിയില് പ്രതിസന്ധി രൂക്ഷമാക്കിയത്.
സ്ഥാനാര്ത്ഥി പട്ടികയില് നിന്ന് അഖിലേഷ് യാദവ് അനുകൂലികളെ ശിവ്പാല് യാദവ് വെട്ടി നിരത്തി. തൊട്ടു പിന്നാലെ ആ പട്ടിക ശിവ്പാല് യാദവ് ട്വിറ്ററിലും പരസ്യപ്പെടുത്തി. ഇത് പ്രശ്നം കൂടുതല് വഷളാക്കി. തന്നെ അനുകൂലിക്കുന്ന എംഎല്എമാര്ക്ക് സീറ്റ് നിഷേധിച്ച ശിവ്പാല് യാദവിന്റെ നടപടിക്കെതിരെ അഖിലേഷ് പിതാവ് മുലായം സിംഗ് യാദവിനെ കണ്ട് പ്രതിഷേധം അറിയിച്ചു.
ശിവ്പാല് യാദവിന്റെ വെട്ടിനിരത്തലിന്റെ ഫലമായി സീറ്റ് നിഷേധിക്കപ്പെട്ട എംഎല്എമാര് പിന്തുണയുമായി അഖിലേഷിനെ കണ്ടു. മത്സരിക്കാന് ഇവര് സന്നദ്ധതയും അറിയിച്ചു. തുടര്ന്ന 225 പേരുടെ ബദല് സ്ഥാനാര്ത്ഥി പട്ടിക അഖിലേഷ് പുറത്തിറക്കി. അഖിലേഷ് ശിവ്പാല് പോര് ശക്തമായ സമയത്ത് അഖിലേഷിന് പിന്തുണയുമായി മുലായത്തിന്റെ സഹോദരന് രാംഗോപാല് രംഗത്തെത്തി. ഇത് മുലായത്തിന്റെ അനിഷ്ടത്തിനിടയാക്കി.
രാംഗോപാല് പാര്ട്ടിയെ തകര്ക്കാന് ശ്രമിക്കുന്നെന്നാണ് മുലായയത്തിന്റെ ആരോപണം. അഖിലേഷ് തയാറാക്കിയ ബദല് സ്ഥാനാര്ത്ഥി പട്ടികയിലുള്ളവര് സമാജ് വാദി പാര്ട്ടിയുടെ ഔദ്യോഗിക സ്ഥാനാര്ത്ഥികള്ക്കെതിരെ പ്രത്യേക ചിഹ്നത്തില് മത്സരിക്കുമെന്നാണ് സൂചന. അഖിലേഷിന്റെ എതിര് പാളയത്തിലുള്ള ശിവ്പാലിനും അനിയായികള്ക്കും സീറ്റുണ്ട്. രണ്ട് മാസം മുമ്പ് അഖിലേഷ് പുറത്താക്കിയ ശിവ്പാല് സംഘത്തിലെ 10 മന്ത്രിമാരും വീണ്ടും മത്സരിക്കും.
https://www.facebook.com/Malayalivartha
