കണ്ടാല്‍ സുമുഖന്‍ മാന്യന്‍. വാചകം കൊണ്ട് ആരെയും വീഴ്ത്തും മിടുക്കന്‍. യാത്ര ലോകോത്തര കാറുകളില്‍. സിഡ്‌നി ലൊമോസിന്റെ തട്ടിപ്പ് വീരകഥകള്‍ക്ക് അവസാനമില്ല. ഭൂരിപക്ഷവും മലയാളികളടങ്ങുന്ന ഗള്‍ഫ് പ്രവാസികളില്‍ നിന്നും 2100 കോടി രൂപയുടെ നിക്ഷേപതട്ടിപ്പ് നടത്തിയ ഗോവന്‍ സ്വദേശി സിഡ്‌നി ലൊമോസ് ദുബായില്‍ പിടിയിലായി.
ദുബായ് മീഡിയാ സിറ്റിയില്‍ അത്യാഡംബരമായ ഓഫീസില്‍ എക്‌സന്‍ഷ്യല്‍ എന്ന വിദേശനാണ്യ നിക്ഷേപസ്ഥാപനം നടത്തിവന്ന ഈ മുപ്പത്താറുകാരനെ ചൊവ്വാഴ്ച രാത്രിയാണ് ദുബായ് പൊലീസ് കസ്റ്റഡിയിലെടുത്തത്. സിഡ്‌നിലോമോസിന്റെ ഇരകളായവര്‍ ഏഴായിരത്തില്‍പ്പരം പ്രവാസികളും സ്വദേശികളുമാണെന്ന് അധികൃതര്‍ അറിയിച്ചു. ഇയാളുടെ തട്ടിപ്പിനെക്കുറിച്ച് പരാതി ലഭിച്ചതിനെത്തുടര്‍ന്ന് ലൊമോസിനെ അറസ്റ്റു ചെയ്യുകയും എക്‌സന്‍ഷ്യലിന്റെ ദുബായ് ഓഫീസ് അടച്ചുപൂട്ടുകയും ചെയ്തു.
എന്നാല്‍ ജാമ്യത്തിലിറങ്ങിയ ഈ ഗോവന്‍ തരികിട കള്ളപ്പണനിക്ഷേപ സ്വര്‍ഗ്ഗമായ ബ്രിട്ടീഷ് വിര്‍ജിന്‍ ഐലന്റിലെ എഫ്‌സിഐ മാര്‍ക്കറ്റ്‌സ് എന്ന മറ്റൊരു നിക്ഷേപതട്ടിപ്പു കമ്പനിയുമായി ചേര്‍ന്ന് പിന്നക്കിള്‍ അസറ്റ് ആന്‍ഡ് ഇന്‍വെസ്റ്റ് മാനേജ്‌മെന്റ് എന്ന മറ്റൊരു തട്ടിപ്പുസ്ഥാപനം തട്ടിക്കൂട്ടി പുതിയ ഇരകളെ വീഴ്ത്തുന്നതിനിടയിലാണ് വലയിലായത്.
നിക്ഷേപത്തുകയുടെ 120 ശതമാനം പ്രതിവര്‍ഷലാഭമായി നല്‍കുമെന്ന കേരളത്തിലെ ശബരീനാഥിന്റെ ട്ടോട്ടല്‍ ഫോര്‍ യു മാതൃകയിലുള്ള തട്ടിപ്പായിരുന്നു സിഡ്‌നി ലിമോസിന്റേത്. ലാഭത്തുക മാസംതോറും നിക്ഷേപകര്‍ക്കു നല്‍കുമെന്നായിരുന്നു പ്രലോഭനം. സിവില്‍ വ്യോമയാനം, എണ്ണഖനനം, പ്രകൃതിവാതക വ്യവസായം എന്നീ മേഖലകളില്‍ നിക്ഷേപിക്കാനെന്ന പരസ്യപ്രളയം സൃഷ്ടിച്ചായിരുന്നു കബളിപ്പിക്കല്‍. പലരും ബന്ധുക്കളില്‍ നിന്നു കടംവാങ്ങിയും ബാങ്കുകളില്‍ നിന്നു ഭീമമായ തുകകള്‍ വായ്പയെടുത്തുമാണ് വന്‍ ലാഭവിഹിതം മോഹിച്ച് പണം നിക്ഷേപിച്ചത്.
നിക്ഷേപകര്‍ ഏഴായിരത്തില്‍പ്പരമായിരുന്നുവെങ്കില്‍ ഓരോരുത്തര്‍ക്കും നിരവധി അക്കൗണ്ടുകളാണുണ്ടായിരുന്നത്. ഇതുമൂലം എക്‌സെന്‍ഷ്യലിലെ മൊത്തം അക്കൗണ്ടുകള്‍ 18,000 ല്‍പ്പരമായിരുന്നുവെന്ന് പൊലീസ് അറിയിച്ചു. ഒരു എണ്ണപ്രകൃതിവാതക കമ്പനിയുടെ എക്‌സിക്യൂട്ടീവ് കാല്‍ലക്ഷം ഡോളര്‍ വീതം 700 അക്കൗണ്ടുകളിലാണ് പണം നിക്ഷേപിച്ചത്. ഒരു അലുമിനിയം കമ്പനിയുടെ വൈസ് പ്രസിഡന്റിന് 350 അക്കൗണ്ടുകളിലായിരുന്നു നിക്ഷേപം. ഒരു മലയാളി എന്‍ജിനീയര്‍ 25 ലക്ഷം രൂപ ബാങ്കില്‍ നിന്നു വായ്പയെടുത്താണ് സിഡ്‌നി ലൊമോസിന്റെ മടയില്‍കൊണ്ട് ഇട്ടുകൊടുത്തത്. ഷാര്‍ജയിലെ ഒരു മലയാളിയുടെ നിക്ഷേപം 1.75 ലക്ഷം ഡോളര്‍.
ഗോവയിലെ ഒരു പ്രമുഖ ഫുട്‌ബോള്‍ ക്ലബിന്റെ ഉടമയാവാന്‍വേണ്ടി കോടികള്‍ നിക്ഷേപിച്ച ലൊമോസ് ബോളിവുഡ്ഹോളിവുഡ് സുന്ദരിമാരുമൊത്ത് അഴിഞ്ഞാടിയ വകയിലും നിക്ഷേപത്തുകയുടെ നല്ലൊരുപങ്ക് പോയിട്ടുണ്ടെന്നും അധികൃതര്‍ സംശയിക്കുന്നു.