കേന്ദ്രസര്‍ക്കാര്‍ നോട്ട് അസാധുവാക്കിയതു കാരണം രാജ്യത്ത് താല്‍ക്കാലികമായ സാമ്പത്തിക മാന്ദ്യം ഉണ്ടാകുമെന്ന് രാഷ്ട്രപതി പ്രണബ് മുഖര്‍ജിയുടെ മുന്നറിയിപ്പ്. കള്ളപ്പണം തടയാനും അഴിമതിയോടു പൊരുതാനുമുള്ള നടപടിയാണെങ്കിലും, രാജ്യത്തെ പാവപ്പെട്ട ജനങ്ങള്‍ കഷ്ടപ്പാട് അനുഭവിക്കുന്നത് ഒഴിവാക്കാന്‍ പ്രത്യേക ശ്രദ്ധ വേണമെന്നു രാഷ്ട്രപതി നിര്‍ദേശിച്ചു. അതേസമയം, ദീര്‍ഘകാല പുരോഗതി ലക്ഷ്യമാക്കുമ്പോള്‍ ഒഴിവാക്കാനാവാത്ത കഷ്ടപ്പാടുകളാണ് ഇവയെന്നും അദ്ദേഹം എടുത്തുപറഞ്ഞു.

പുതുവര്‍ഷത്തില്‍ രാഷ്ട്രപതിഭവനില്‍നിന്നു ഗവര്‍ണര്‍മാരോടും ലഫ്റ്റനന്റ് ഗവര്‍ണര്‍മാരോടും വിഡിയോ കോണ്‍ഫറന്‍സിങ്ങിലൂടെ സംസാരിക്കുകയായിരുന്നു രാഷ്ട്രപതി. നരേന്ദ്ര മോഡി സര്‍ക്കാരിന്റെ നോട്ട് അസാധുവാക്കല്‍ തീരുമാനത്തെ ധീരമായ നടപടി എന്നു മുന്‍പു വിശേഷിപ്പിച്ച പ്രണബ് മുഖര്‍ജി ഇതാദ്യമായാണ് സാമ്പത്തികമേഖല നേരിടുന്ന മാന്ദ്യത്തെക്കുറിച്ചു മുന്നറിയിപ്പു നല്‍കുന്നത്. നോട്ട് അസാധുവാക്കല്‍ തീരുമാനത്തിനു പിന്നാലെ പുറപ്പെടുവിച്ച പ്രസ്താവനയില്‍ കണക്കില്‍പെടാത്ത പണവും കള്ളനോട്ടും പിടികൂടാന്‍ നടപടി സഹായിക്കുമെന്നു രാഷ്ട്രപതി അഭിപ്രായപ്പെട്ടിരുന്നു.

വ്യവസായോല്‍സുക സമീപനത്തിനൊപ്പം ദരിദ്രരെ സഹായിക്കാനും തയാറാകണമെന്നു രാഷ്ട്രപതി നിര്‍ദേശിച്ചു. പ്രധാനമന്ത്രി ഏറ്റവും ഒടുവില്‍ പ്രഖ്യാപിച്ച പദ്ധതികള്‍ അല്‍പം ആശ്വാസം പകരുന്നതാണ്. ആഗോള സാമ്പത്തിക തളര്‍ച്ചയെ മറികടന്ന് ഇന്ത്യന്‍ സമ്പദ്‌വ്യവസ്ഥ നല്ല രീതിയില്‍ പ്രവര്‍ത്തിച്ചുതുടങ്ങിയ വര്‍ഷമായിരുന്നു 2016. വര്‍ഷാദ്യം മൊത്തവരുമാനം 7.2 ശതമാനം കണ്ടു വളര്‍ന്നതു നമ്മുടെ സാമ്പത്തിക അടിത്തറ തികച്ചും ഭദ്രമാണെന്നു വ്യക്തമാക്കുന്നതായും രാഷ്ട്രപതി പറഞ്ഞു.