അഞ്ച് സംസ്ഥാനങ്ങളില്‍ തെരഞ്ഞെടുപ്പ് പ്രഖ്യാപിച്ച സാഹചര്യത്തില്‍ കേന്ദ്ര ബജറ്റ് മാറ്റണമെന്നാവശ്യപ്പെട്ട് സുപ്രീംകോടതിയില്‍ സമര്‍പ്പിച്ച ഹര്‍ജി കോടതി പരിഗണിച്ചില്ല.

ഫെബ്രുവരി ഒന്നാം തീയതിയാണ് ധനമന്ത്രി അരുണ്‍ ജെയ്റ്റ്‌ലി ബജറ്റ് അവതരിപ്പിക്കുന്നത്. ഫെബ്രുവരി 4നാണ് വിവിധ സംസ്ഥാനങ്ങളിലേക്കുള്ള തെരഞ്ഞെടുപ്പ് നടക്കുന്നത്. ബജറ്റില്‍ സര്‍ക്കാര്‍ ജനപ്രിയ പ്രഖ്യാപനങ്ങള്‍ നടത്തുമെന്നും അത് തെരഞ്ഞെടുപ്പില്‍ സ്വാധീനം ചെലുത്തുമെന്ന് ആരോപിച്ചായിരുന്നു കോണ്‍ഗ്രസ് ഉള്‍പ്പടെയുള്ള പ്രതിപക്ഷ പാര്‍ട്ടികള്‍ ബജറ്റ് മാറ്റണമെന്ന് ആവശ്യപ്പെട്ട് തെരഞ്ഞെടുപ്പ് കമ്മീഷനെ സമീപിച്ചത്. തെരഞ്ഞെടുപ്പിന്റെ അവസാനഘട്ടമായ മാര്‍ച്ച് എട്ടിന് ശേഷം ബജറ്റ് അവതരിപ്പിച്ചാല്‍ മതിയെന്ന നിലപാടിലാണ് പ്രതിപക്ഷം.

ബജറ്റ് സമ്മേളനം ജനുവരി 31ന് തുടങ്ങുന്നതില്‍ തങ്ങള്‍ക്ക് എതിര്‍പ്പില്ല. എന്നാല്‍ ബജറ്റ് മാര്‍ച്ച് എട്ടിന് ശേഷം അവതരിപ്പിച്ചാല്‍ മതി. അതുവരെയും മറ്റ് സഭാനടപടികള്‍ നടത്താവുന്നതാണെന്ന് കോണ്‍ഗ്രസ് നേതാവ് ഗുലാം നബി ആസാദ് പറഞ്ഞു. തെരഞ്ഞെടുപ്പ് കമീഷന്‍ ഈ വിഷയത്തില്‍ ഉറപ്പൊന്നും നല്‍കിയിട്ടില്ലെന്നും തങ്ങളുടെ പരാതികള്‍ കേള്‍ക്കുകയാണ് ചെയ്തതെന്നും ഗുലാം നബി കൂട്ടിച്ചേര്‍ത്തു.
ഉത്തര്‍പ്രദേശ്, പഞ്ചാബ്, ഉത്തരാഖണ്ഡ്, ഗോവ, മണിപ്പുര്‍ എന്നീ അഞ്ച് സംസ്ഥാനങ്ങളിലാണ് ഫെബ്രുവരി, മാര്‍ച്ച് മാസങ്ങളിലായി തെരഞ്ഞെടുപ്പ് നടക്കുന്നത്.