പോലീസുകാരുടെ അതിക്രമങ്ങള്‍ക്ക് ഇരയായത് 34 സ്ത്രീകള്‍. ദേശീയ മനുഷ്യാവകാശ കമ്മീഷന്‍ ഛത്തീസ്ഗഡ് സര്‍ക്കാരിന് നല്‍കിയ നോട്ടീസിലാണ് പോലീസുകാരുടെ ലൈംഗീക അതിക്രമങ്ങള്‍, മാനഭംഗങ്ങള്‍, മര്‍ദ്ദനങ്ങള്‍ എന്നിവയെ കുറിച്ച് വ്യക്തമാക്കിയിരിക്കുന്നത്. ഇരകള്‍ക്ക് നേരെ മനുഷ്യാവകാശ ലംഘനങ്ങള്‍ ഉണ്ടായതായും കമ്മീഷന്‍ വ്യക്തമാക്കി.

ആകെ 34 സ്ത്രീകളാണ് പോലീസില്‍ പരാതി നല്‍കിയിരിക്കുന്നത്. ഇതില്‍ 15 പേരുടെ മൊഴികള്‍ മജിസ്‌ട്രേറ്റ് മുന്‍പാകെ രേഖപ്പെടുത്തിയിട്ടുണ്ട്. അതേസമയം പീഡനത്തിനിരയായവര്‍ എല്ലാവരും തന്നെ ഗോത്രവിഭാഗത്തിലെ സ്ത്രീകളാണെന്നും കമ്മീഷന്‍ പറയുന്നു.

പൊലീസിന്റെ ലൈംഗിക അതിക്രമത്തിന് ഇരകളായ മറ്റ് 20 സ്ത്രീകളുടെ മൊഴിയെടുക്കുമെന്നും കമ്മീഷന്‍ പ്രസ്താവനയില്‍ വ്യക്തമാക്കി. ഒരു മാസത്തിനുള്ളില്‍ ബാക്കിയുള്ളവരുടെ മൊഴി കൂടി രേഖപ്പെടുത്താന്‍ നിര്‍ദ്ദേശം നല്‍കിയിട്ടുണ്ട്. അതിക്രമത്തിന് ഇരകളായവര്‍ക്ക് 37 ലക്ഷം രൂപയുടെ സാമ്ബത്തിക സഹായം നല്‍കാനും കമ്മീഷന്‍ സംസ്ഥാന സര്‍ക്കാരിനോട് ആവശ്യപ്പെട്ടു.

ബലാത്സംഗം ചെയ്യപ്പെട്ട എട്ടു പേര്‍ക്ക് മൂന്നു ലക്ഷം വീതവും ലൈംഗികാതിക്രമത്തിന് ഇരയായ ആറു പേര്‍ക്ക് രണ്ടു ലക്ഷം വീതവും ശാരീരികമായി അക്രമിക്കപ്പെട്ടവര്‍ക്ക് അമ്ബതിനായിരം രൂപവീതവും നല്‍കാനാണ് നിര്‍ദ്ദേശിച്ചിരിക്കുന്നത്.