നോട്ട് നിരോധനത്തില് ആവശ്യമെങ്കില് പ്രധാനമന്ത്രിയോടും വിശദീകരണം തേടുമെന്ന് പി എസി അധ്യക്ഷന്
നോട്ട് നിരോധന വിഷയത്തില് പബ്ലിക് അക്കൗണ്ട്സ് കമ്മിറ്റിക്കു മുന്നില് റിസര്വ് ബാങ്ക് ഗവര്ണര് ഉര്ജിത് പട്ടേല് നല്കുന്ന വിശദീകരണം തൃപ്തികരമല്ലെങ്കില് പ്രധാനമന്ത്രിയോടും വിശദീകരണം തേടിയേക്കും. ഇതിന്റെ സൂചനകള് പി എസി അധ്യക്ഷന് കെ വി തോമസ് നല്കി കഴിഞ്ഞു. നോട്ട് പിന്വലിച്ചതുമായി ബന്ധപ്പെട്ട് പ്രവര്ത്തിച്ച ആരോടും വിശദീകരണം തേടാന് നോട്ട് അസാധുവാക്കലിനെക്കുറിച്ച് അന്വേഷിക്കുന്ന പാര്ലമെന്ററികാര്യ സമിതിയായ പി എസിക്ക് അധികാരമുണ്ടെന്ന് കെ വി തോമസ് പറഞ്ഞു.
ജനുവരി 20നാണ് റിസര്വ് ബാങ്ക് ഗവര്ണറും വകുപ്പ് സെക്രട്ടറിമാരും പി എസിക്ക് വിശദീകരണം നല്കുക. ഈ വിശദീകരണത്തെ ആശ്രയിച്ചായിരിക്കും തുടര് നടപടി. സമിതി അംഗങ്ങള് ഒറ്റക്കെട്ടായി തീരുമാനിച്ചാല് പ്രധാനമന്ത്രിയെ വിളിച്ചുവരുത്തി വിശദീകരണം തേടാനുള്ള വകുപ്പുണ്ട്. സ്വയം തൃപ്തിപ്പെടുത്തുന്നതിനായി രാജ്യത്തെ തെറ്റായ വഴിയില് നയിക്കുകയാണ് പ്രധാനമന്ത്രി. എന്നിട്ട് തന്റെ തീരുമാനങ്ങളെ ന്യായീകരിക്കുകയാണ്.
നോട്ട് അസാധുവാക്കല് നടപടിക്ക് ശേഷം താന് പ്രധാനമന്ത്രിയുമായി കൂടിക്കാഴ്ച നടത്തിയിരുന്നു. എന്നാല് എല്ലാ പ്രതിസന്ധികളും 50 ദിവസത്തിനകം പരിഹരിക്കപ്പെടുമെന്നാണ് അന്ന് അദ്ദേഹം പറഞ്ഞത്. എന്നാല്, ഒന്നും സംഭവിച്ചില്ലെന്നാണ് ഇപ്പോള് വ്യക്തമാകുന്നതെന്നും കെ വി തോമസ് പറഞ്ഞു.
https://www.facebook.com/Malayalivartha
