പാറ്റ്‌നയില്‍ ഗംഗാനദിയില്‍ ബോട്ട് മുങ്ങിയുണ്ടായ അപകടത്തില്‍ മരിച്ചവരുടെ എണ്ണം 23 ആയി. നദിയില്‍ മുങ്ങിത്താണ എട്ടു പേരെ രക്ഷപ്പെടുത്തിയിരുന്നു. ഇവരെ പാറ്റ്‌ന മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരിക്കുകയാണ്. ബിഹാറിലെ പാറ്റ്‌നയിലാണ് അപകടമുണ്ടായത്. ബോട്ടില്‍ 40 പേരാണ് ഉണ്ടായിരുന്നത്. കാണാതായ മറ്റുള്ളവര്‍ക്കായി തെരച്ചില്‍ തുടരുകയാണ്. ബോട്ടില്‍ അനുവദനീയമായതിലും അധികം ആളുകയറിയതാണ് അപകടത്തിനു കാരണമെന്ന് പറയുന്നു.

ഗംഗ ഘട്ടില്‍നിന്നു പുറപ്പെട്ട ബോട്ടാണ് മറിഞ്ഞത്. ശനിയാഴ്ച വൈകിട്ട് ആറിനായിരുന്നു അപകടം സംഭവിച്ചത്. മകരസംക്രമ ദിനത്തോടനുബന്ധിച്ച് ഗംഗാതീരത്ത് മൂന്നു ദിവസം നടത്തുന്ന പട്ടം പറത്തല്‍ ഉല്‍സവത്തില്‍ പങ്കെടുത്ത് മടങ്ങിയവരാണ് അപകടത്തില്‍പെട്ടത്. നേരത്തെ ബിഹാര്‍ മുഖ്യമന്ത്രി നിതീഷ് കുമാര്‍ സംഭവത്തില്‍ അന്വേഷണത്തിന് ഉത്തരവിട്ടു.
പാറ്റ്‌നയില്‍ ഗംഗാനദിയില്‍ ബോട്ട് മുങ്ങിയുണ്ടായ അപകടത്തില്‍ ദുഃഖം രേഖപ്പെടുത്തി പ്രധാനമന്ത്രി നരേന്ദ്ര മോദി. അപകടത്തില്‍ മരിച്ചവര്‍ക്ക് അനുശോചനം രേഖപ്പെടുത്തിയ പ്രധാനമന്ത്രി അപകടത്തെ സംബന്ധിച്ച് അന്വേഷണമുണ്ടാകുമെന്നും പറഞ്ഞു.