ഗോസംരക്ഷണത്തിന്റെ പേരില്‍ അക്രമങ്ങള്‍ക്കിരയായവര്‍ക്ക് നഷ്ടപരിഹാരം നല്‍കണമെന്ന് സുപ്രീം കോടതി
ഗോസംരക്ഷണത്തിന്റെ പേരിലുള്ള അക്രമങ്ങള്‍ക്കിരയായവരുടെ ബന്ധുക്കള്‍ക്ക് അര്‍ഹമായ നഷ്ടപരിഹാരം നല്‍കാന്‍ സംസ്ഥാനങ്ങള്‍ക്ക് ബാധ്യതയുണ്ടെന്ന് സുപ്രീംകോടതി വ്യക്തമാക്കി. ഇക്കാര്യത്തില്‍ കോടതി ഉത്തരവില്ലെങ്കിലും സംസ്ഥാനങ്ങള്‍ അര്‍ഹിച്ച നഷ്ടപരിഹാരം വിതരണം ചെയ്യണമെന്ന് ചീഫ് ജസ്റ്റിസ് ദീപക്മിശ്ര അദ്ധ്യക്ഷനായ ബെഞ്ച് നിര്‍ദ്ദേശിച്ചു.
രാജസ്ഥാനിലെ അല്‍വാറില്‍ ഗോസംരക്ഷകര്‍ അടിച്ചുകൊന്ന പെഹ്‌ളുഖാന്റെയും ഡല്‍ഹിയില്‍ നിന്നും ഹരിയാനയിലേക്കുള്ള യാത്രാമദ്ധ്യേ അക്രമികള്‍ കുത്തിക്കൊന്ന ജുനൈദിന്റെയും ഉള്‍പ്പെടെയുള്ളവരുടെ കുടുംബങ്ങള്‍ക്ക് നഷ്ടപരിഹാരം നല്‍കാന്‍ ഉത്തരവിടണമെന്ന് ഹര്‍ജിക്കാരനായ തുഷാര്‍ ഗാന്ധിക്ക് വേണ്ടി മുതിര്‍ന്ന അഭിഭാഷക ഇന്ദിരാ ജെയ്‌സിംഗ് വാദിച്ചപ്പോഴാണ് കോടതി ഇക്കാര്യം വ്യക്തമാക്കിയത്.
നിയമം കൈയ്യിലെടുക്കുന്ന ഗോസംരക്ഷകര്‍ക്കെതിരെ ശക്തമായ നടപടി സ്വീകരിക്കണമെന്ന് കോടതി ആവര്‍ത്തിച്ചു. കേന്ദ്രം പറയുന്നത് ഇത്തരം സംഭവങ്ങളെ നേരിടാന്‍ നിയമം ഉണ്ടെന്നാണ്. ഏതായാലും ഇത്തരം സംഭവങ്ങള്‍ ആവര്‍ത്തിക്കാതിരിക്കാന്‍ നടപടികള്‍ വേണം. ഗോസംരക്ഷണത്തിന്റെ പേരിലുള്ള അക്രമങ്ങള്‍ മാത്രം അന്വേഷിക്കാന്‍ എല്ലാ ജില്ലകളിലും നോഡല്‍ പൊലീസ് ഓഫീസര്‍മാരെ നിയോഗിക്കണമെന്ന് കഴിഞ്ഞതവണ കോടതി ഉത്തരവിട്ടിരുന്നു.
ഈ നിര്‍ദ്ദേശം എത്രത്തോളം നടപ്പാക്കിയെന്ന് വ്യക്തമാക്കി സത്യവാങ്മൂലം സമര്‍പ്പിക്കാന്‍ സംസ്ഥാനങ്ങളോട് കോടതി നിര്‍ദ്ദേശിച്ചു. ഡി.വൈ.എസ്.പി റാങ്കില്‍ കുറയാത്ത് പൊലീസ് ഉദ്യോഗസ്ഥരെ അടുത്തമാസം 13നുള്ളില്‍ നോഡല്‍ ഓഫീസര്‍മാരായി നിയമിക്കണമെന്നാണ് കോടതിയുടെ മുന്‍ ഉത്തരവ്. ഇക്കാര്യത്തില്‍ സ്വീകരിച്ച നടപടികള്‍ വ്യക്തമാക്കി സത്യവാങ്മൂലം സമര്‍പ്പിച്ചിട്ടുണ്ടെന്ന് ഗുജറാത്ത്, കര്‍ണാടക, ജാര്‍ഖണ്ഡ്, രാജസ്ഥാന്‍, ഉത്തര്‍പ്രദേശ് സംസ്ഥാനങ്ങള്‍ കോടതിയെ അറിയിച്ചു. ബീഹാറും മഹാരാഷ്ട്രയും ഉടന്‍ സത്യവാങ്മൂലം അറിയിച്ചു.
അതേസമയം, ഗോസംരക്ഷകരുടെ മര്‍ദ്ദനത്തിന് ഇരയായവര്‍ക്ക് നീതി നല്‍കാത്തതിന് പുറമേ അവരുടെയും ബന്ധുക്കളുടെയും പേരില്‍ കേസെടുത്ത് ദ്രോഹിക്കുന്ന സാഹചര്യമാണുള്ളതെന്ന് മുതിര്‍ന്ന അഭിഭാഷകന്‍ കപില്‍ സിബല്‍ പറഞ്ഞു.
സഹകരണ ഫെഡറലിസം എന്ന സങ്കല്പത്തില്‍ ഊന്നി നില്‍ക്കുന്ന രാജ്യത്ത് ഇത്തരം അക്രമങ്ങളുടെ ഉത്തരവാദിത്തം സംസ്ഥാനങ്ങള്‍ക്കുമേല്‍ കെട്ടിവച്ച് കേന്ദ്ര സര്‍ക്കാരിന് ഒഴിഞ്ഞുനില്‍ക്കാനാവില്ലെന്നാണ് ഗാന്ധിജിയുടെ ചെറുമകന്റെ മകനായ തുഷാര്‍ ഗാന്ധിയുടെ ഹര്‍ജിയിലെ പ്രധാന വാദം. ദളിതരും മുസ്ലിങ്ങള്‍ അടക്കമുള്ള ന്യൂനപക്ഷ സമൂഹമാണ് ഇത്തരം അക്രമങ്ങളിലെ ഇരകള്‍. ഭരണഘടനയുടെ 256ാം അനുച്ഛേദ പ്രകാരം തുടര്‍ നടപടികള്‍ക്ക് സംസ്ഥാനങ്ങള്‍ കേന്ദ്രത്തോട് നിര്‍ദ്ദേശിക്കേണ്ടതാണെന്നും ഹര്‍ജിയില്‍ പറയുന്നു.
https://www.facebook.com/Malayalivartha
