ആള്‍ദൈവങ്ങളുടെ മുഖംമൂടികള്‍ അഴിഞ്ഞു വീണുകൊണ്ടിരിക്കുന്ന ഇക്കാലത്ത് മറ്റൊരു ആള്‍ദൈവം കൂടി അറസ്റ്റില്‍. ഇത്തവണ രാജസ്ഥാനില്‍ നിന്നുമാണ് വാര്‍ത്ത. വിവാദ ആള്‍ദൈവം റാം റഹിമിനെതിരായ പീഡനക്കേസും ജയില്‍ശിക്ഷയും സൃഷ്ടിച്ച വിവാദക്കൊടുങ്കാറ്റ് ഇനിയും കെട്ടടങ്ങിയിട്ടില്ല. 

അതിനിടെയാണ് ആള്‍വാറില്‍ നിന്നുള്ള എഴുപതുകാരനായ ഫലാഹാരി ബാബയെന്ന സ്വാമി കൗശലേന്ദ്ര പ്രപന്നാചാര്യ ഫലാഹാരി മഹാരാജ് പീഡനക്കേസില്‍ അറസ്റ്റിലായത്. ഇയാള്‍ ലൈംഗികമായി പീഡിപ്പിച്ചെന്നു ചൂണ്ടിക്കാട്ടി ഛത്തീസ്ഗഡില്‍ നിന്നുള്ള ഇരുപത്തൊന്നുകാരി നല്‍കിയ പരാതിയിലാണ് അറസ്റ്റ്. 

കഴിഞ്ഞ 25 വര്‍ഷമായി പഴങ്ങള്‍ മാത്രം കഴിച്ചാണ് ജീവിക്കുന്നതെന്ന വെളിപ്പെടുത്തലാണ് ഈ സ്വാമിക്ക് 'ഫലാഹാരി ബാബ' എന്ന വിളിപ്പേരു സമ്മാനിച്ചത്. അറസ്റ്റ് ഉറപ്പായതോടെ 'കടുത്ത രക്തസമ്മര്‍ദ'വുമായി ഇയാള്‍ ആശുപത്രിയില്‍ അഭയംതേടിയിരുന്നു. തുടര്‍ന്ന് ആശുപത്രിയിലെത്തിയാണ് പൊലീസ് ഇയാളുടെ അറസ്റ്റ് രേഖപ്പെടുത്തിയത്. ഇക്കഴിഞ്ഞ ഓഗസ്റ്റ് ഏഴിനു ബാബയുടെ ദിവ്യധാം ആശ്രമത്തിലാണു സംഭവം.

15 വര്‍ഷത്തിലേറെയായി ബാബയുടെ അനുയായികളായ യുവതിയുടെ മാതാപിതാക്കള്‍ക്ക് ബാബയോടുള്ള വിശ്വാസത്തെ അയാള്‍ മുതലെടുക്കുകയായിരുന്നു. ഇവരുടെ വീട്ടില്‍ പലതവണ ബാബ സന്ദര്‍ശനം നടത്തുകയും അവിടെ തങ്ങുകയും ചെയ്തിട്ടുണ്ട്. നിയമവിദ്യാര്‍ഥിനിയായ യുവതിക്ക് ഇന്റേണ്‍ഷിപ് കാലത്ത് ആദ്യ പ്രതിഫലമായി ലഭിച്ച 3,000 രൂപ ബാബയ്ക്കു സമര്‍പ്പിച്ച് അനുഗ്രഹം നേടുന്നതിനാണ് അവര്‍ സകുടുംബം ഓഗസ്റ്റ് ഏഴിന് ആശ്രമത്തിലെത്തിയത്. എന്നാല്‍ അന്നു ഗ്രഹണ ദിവസമായതിനാല്‍ ബാബ ആരെയും മുഖംകാണിക്കില്ലെന്ന് അവരെ അറിയിക്കുകയായിരുന്നു. അതിനാല്‍ ആശ്രമത്തില്‍ തങ്ങാന്‍ ആവശ്യപ്പെട്ടു. 

എന്നാല്‍ അനുഗ്രഹം തേടിയെത്തിയ യുവതിയ്ക്ക് മാംസാഹാര വിരുദ്ധനായ, ഫലം മാത്രം കഴിച്ചു ജീവിക്കുന്ന ബാബയില്‍ നിന്നുണ്ടായ അനുഭവം ഞെട്ടിക്കുന്നതായിരുന്നു. ഗ്രഹണദിവസം ആരേയും മുഖം കാണിക്കാത്ത ബാബ വൈകുന്നേരം യുവതിയെ മുറിയിലേക്കു വിളിച്ചുവരുത്തുകയും പീഡിപ്പിക്കുകയും ആയിരുന്നുവെന്നു പരാതിയില്‍ പറയുന്നു. ബാബയുടെ ഇടപെടല്‍ മൂലമാണു ഡല്‍ഹിയില്‍ യുവതിക്ക് ഇന്റേണ്‍ഷിപ് സൗകര്യം ലഭിച്ചത്. തന്മൂലം പീഡനവിവരം പുറത്തു പറയരുതെന്നു ഭീഷണിയുണ്ടായിരുന്നുവെങ്കിലും ഗുര്‍മീത് റാം റഹിം സിങ് ജയിലിലായതോടെ പരാതിയുമായി പൊലീസിനെ സമീപിക്കാന്‍ യുവതിയും കുടുംബവും ധൈര്യം കാട്ടുകയായിരുന്നു. യുവതിയും മാതാപിതാക്കളും ഛത്തീസ്ഗഡ് ഡിജിപി എ.എന്‍.ഉപാധ്യായയെ നേരിട്ടുകണ്ടാണു പരാതി പറഞ്ഞത്. 

തുടര്‍ന്ന് ഡിജിപി യുടെ നിര്‍ദേശപ്രകാരം അന്വേഷണ ഉദ്യോഗസ്ഥന്‍ ആശ്രമം സ്ഥിതിചെയ്യുന്ന ആള്‍വാറിലെ ആരവലി വിഹാര്‍ സ്‌റ്റേഷനില്‍ എത്തിയതറിഞ്ഞതോടെയാണ് ബാബയ്ക്ക് രക്തസമ്മര്‍ദ്ദം ഉയര്‍ന്ന് ആശുപത്രിയില്‍ അഭയം തേടിയത്. ബാബയെയും ആശ്രമത്തെയും ഇകഴ്ത്തിക്കാണിക്കുന്നതിനായി ചിലര്‍ വ്യാജ ആരോപണങ്ങളുമായി രംഗത്തിറങ്ങിയിരിക്കുകയാണെന്നായിരുന്നു ആശ്രമാധികൃതരുടെ നിലപാട്. ബിലാസ്പുര്‍ പൊലീസ് കേസെടുത്തിട്ടുണ്ട്.