ആഗ്രകോട്ടക്ക് സമീപം ആകാശത്തേക്ക് വെടിയുതിര്‍ത്ത് വിജയദശമി ആഘോഷിച്ച 60 ഓളം പേര്‍ക്കെതിരെ പൊലീസ് കേസെടുത്തു. വിശ്വഹിന്ദു പരിഷത്ത്്, ബജ്‌റംഗദള്‍ പ്രവര്‍ത്തകര്‍ക്കെതിരെയാണ് കേസെടുത്തത്. ആകാശത്തേക്ക് വെടിയുതിര്‍ക്കുന്നതിന്റെ ദൃശ്യങ്ങള്‍ പ്രചരിച്ചതിനെ തുടര്‍ന്നാണ് നടപടി.

60 പേരില്‍ 29 പേരെ മാത്രമാണ് തിരിച്ചറിയാനായത്. വിഡിയോ ദൃശ്യം വഴി മറ്റുള്ളവരെ തിരിച്ചറിയാന്‍ ശ്രമിക്കുമെന്ന് പൊലീസ് പറഞ്ഞു. ആഗ്രയിലെ രാംലീല മൈതാനിക്ക് സമീപം ഹനുമാന്‍ ക്ഷേത്രത്തിലെ വിജയദശമി ആഘോഷത്തിന് വംശീയ മുദ്രാവാക്യങ്ങള്‍ മുഴക്കിയ പ്രവര്‍ത്തകര്‍ക്കതിരെ ഗുരുതര കുറ്റം ചുമത്തിയിട്ടുണ്ട്. നിയമം ലംഘിച്ചുള്ള വെടിയുതിര്‍പ്പില്‍ ഉള്‍പ്പെട്ടവരുടെ തോക്ക് ലൈസന്‍സ് റദ്ദാക്കുമെന്നും പൊലീസ് അറിയിച്ചു. ആയുധ പൂജയുമായി ബന്ധപ്പെട്ടാണ് പ്രവര്‍ത്തകര്‍ വെടിയുതിര്‍ത്തത്. അതോടൊപ്പം അയോധ്യയില്‍ രാമക്ഷേത്രം പണിയാന്‍ ആവശ്യപ്പെട്ടുകൊണ്ടുള്ള മുദ്രാവാക്യങ്ങളും ഉയര്‍ന്നിരുന്നു.

അതിനിടെ ന്യൂനപക്ഷങ്ങളെ ലക്ഷ്യം വെച്ചു കൊണ്ട് വംശീയ മുദ്രാവാക്യങ്ങളും പ്രവര്‍ത്തകര്‍ മുഴക്കി. അതേസയം, ആഗ്ര കോട്ടയില്‍ നിന്ന് വളരെ അകലെയുള്ള ഹനുമാന്‍ ക്ഷേത്രത്തില്‍ വച്ചാണ് വെടിയുതിര്‍ത്തതെന്നും അത് പൊതു സ്ഥലമല്ലെന്നും വി.എച്ച്.പി പറയുന്നു. ആയുധ പൂജയുടെ ഭാഗമായി നടത്തിയ വെടിവെപ്പില്‍ നിയമലംഘനപരമായി ഒന്നുമില്ലെന്നും വി.എച്ച്.പി അവകാശപ്പെട്ടു.