മുംബൈ കണ്ഡീവ്​ലിയിൽ ചിപ്​സ്​ പാക്കറ്റിനൊപ്പം സൗജന്യമായി കിട്ടിയ കളിപ്പാട്ടം നാലര വയസ്സുകാരന്റെ കാലനായി. പിയൂഷ്​ കുഷ്​വ എന്ന നാലര വയുകാരനാണ്​ ശ്വാസംമുട്ടി മരിച്ചത്. കളിപ്പാട്ടം കുരുങ്ങി കുഞ്ഞി​ന്‍റെ ശ്വാസനാളം പൂർണമായും അടയുകയും ശ്വാസോച്​ഛ്വാസം തടസപ്പെടുകയും മരണം സംഭവിക്കുകയുമായിരുന്നുവെന്നാണ്​ ഫോറൻസിക്​ വിദഗ്​ദര്‍ പറയുന്നത്​. ദുർഗാപൂജ ഘോഷയാത്ര നടന്നുക്കൊണ്ടിരുന്നതിനാൽ ഗതാഗതം തടസപ്പെടുകയും കുഞ്ഞിനെ തക്ക സമയത്ത് ആശുപത്രിയിൽ എത്തിക്കുവാനും കഴിഞ്ഞില്ല. ശനിയാഴ്​ച ഒരു ആഘോഷ പരിപാടിയില്‍ പങ്കെടുത്ത് തിരിച്ചുവരുമ്പോഴാണ് സംഭവം. വഴിയില്‍ വെച്ച്​ പിയൂഷ് ചിപ്​സ് വേണമെന്ന് വാശിപിടിച്ചതിനെത്തുടർന്ന് അച്ഛൻ വാങ്ങി കൊടുത്തതായിരുന്നു ചിപ്സ്.

ചിപ്‌സിനൊപ്പം ഒരു കളിപ്പാട്ടവും സൗജന്യമായി ലഭിച്ചു. ആ കളിപ്പാട്ടത്തിൽ കളിച്ചുകൊണ്ടിരിക്കെ കളിപ്പാട്ടം തൊണ്ടയിൽ കുരുങ്ങുകയായിരുന്നു. ഇത് പുറത്തെടുക്കാൻ രക്ഷിതാക്കള്‍ ആവുന്നത്ര ശ്രമിച്ചുവെങ്കിലും ശ്രമം വിഫലമായി. ദുർഗാപൂജ ഘോഷയാത്രയായതിനാൽ വാഹനങ്ങൾ ഇല്ലാത്തതാണ് കുഞ്ഞിന് വിനയായത്. തുടർന്ന്​ കുഞ്ഞിനെ കൈയിലെടുത്ത്​ നടന്നാണ്​ മൂന്ന്​ കി​ലോ മീറ്റർ അകലെയുള്ള നഴ്​സിങ്​ ഹോമിൽ എത്തിചെങ്കിലും രക്ഷിക്കാനായില്ല.

ഗതാഗതക്കുരുക്കിനെ തുടര്‍ന്ന്​ 20മിനിറ്റ് സമയമെടുത്താണ് കുഞ്ഞിനെ നഴ്​സിങ്​ ഹോമിൽ എത്തിച്ചത്. കുഞ്ഞിന് ശ്വാസം നിലച്ചെന്ന് അപ്പോള്‍ തന്നെ കണ്ടെത്തിയ ഡോക്ടര്‍മാര്‍ അടുത്തുള്ള മറ്റൊരു ആശുപത്രിയിലേക്ക്​ മാറ്റിയെങ്കിലും കുടുതലായി ഒന്നും ചെയ്യാനില്ലെന്ന്​ അവിടുത്തെ ഡോക്​ടർമാര്‍ അറിയിക്കുകയായിരുന്നു. കളിപ്പാട്ടം കുടുങ്ങി ശ്വാസനാളം പൂർണമായും തടസപ്പെട്ടാണ് മരണകാരണമായത്. സാധാരണ കുട്ടികള്‍ കളിപ്പാട്ടങ്ങള്‍ വിഴുങ്ങുന്ന സംഭവങ്ങളിൽ ശ്വാസനാളം ഭാഗികമായി തടസപ്പെടുന്നതാണ്​ കണ്ടുവരാറുള്ളതെന്നും എന്നാൽ പിയൂഷി​ന്‍റെ കാര്യത്തിൽ ശ്വാസം അല്‍പ്പം പോലും കടക്കാത്ത വിധത്തില്‍ പൂർണമായും അടഞ്ഞുപോവുകയായിരുന്നുവെന്നും ഡോക്ടര്‍മാര്‍ പറഞ്ഞു.