മഹാത്​മാ ഗാന്ധിയെ വധിച്ചത്​ ഗോഡ്​സെയല്ലെന്നും മറ്റൊരു അജ്​ഞാതനാണെന്നും അവകാശപ്പെട്ട്​ സവര്‍ക്കര്‍ അനുകൂലിയായ അഭിനവ്​ ഭാരത്​ പ്രവര്‍ത്തകന്‍ കോടതിയില്‍. ഗാന്ധിയുശട യഥാര്‍ഥ ഘാതകനെ കണ്ടെത്തണമെന്നാവശ്യപ്പെട്ട്​ ഡോ. പങ്കജ്​ ഫട്​നിസ്​ ആണ്​ സുപ്രീം കോടതിയില്‍ പൊതുതാത്​പര്യ ഹരജി നല്‍കിയത്​. ഹരജി നാളെ പരിഗണിക്കും.

ഗാന്ധിജിക്ക്​ മരണസമയത്ത്​ നാലു വെടിയേറ്റിരുന്നെന്നും ഗോഡ്​സെ ഉതിര്‍ത്ത മൂന്നു വെടിയുണ്ടകള്‍ കൂടാതെ നാലാമതൊരു വെടിയുണ്ടകൂടി ഏറ്റിരുന്നുവെന്നും നാലാമത്തെ ഉണ്ടയാണ്​ ഗാന്ധിജിയുടെജീവനെടുത്തതെന്നുമാണ്​ ഹരജിക്കാരന്റെ വാദം. ഇൗ വെടിയുതിര്‍ത്തത്​ ആരാണ്​ എന്ന്​ അന്വേഷിക്കണമെന്നാവശ്യപ്പെട്ടാണ്​ ഹരജി.
ലോക മാധ്യമങ്ങളിലെ ഏറിയ പങ്കും നാലു ബുള്ളറ്റുകള്‍ ഗാന്ധിജിക്ക്​ ഏറ്റിരുന്നുവെന്നാണ്​ റിപ്പോര്‍ട്ട്​ നല്‍കിയതെന്നും നാലാം ബുള്ളറ്റ്​ ഇപ്പോഴും നിഗൂഢമായി തന്നെ അവശേഷിക്കുന്നുവെന്നും കാണിച്ചാണ്​ ഗാന്ധിജിയുടെ മരണം വീണ്ടും അന്വേഷിക്കണമെന്ന്​ പങ്കജ്​ ആവശ്യപ്പെടുന്നത്​. 'വെടിയേറ്റ ബാപ്പു രക്​തത്തില കുളിച്ചിരിക്കുകയായിരുന്നു. ബാപ്പുവിനെ ബാത്​റൂമിലേക്ക്​ കൊണ്ടുപോകുന്നതിനിടെ രക്​തത്തോടൊപ്പം ഒരു ബുള്ളറ്റും പുറത്തു വന്നു'വെന്നും മനുബെന്നി​ന്റെ ഡയറി ഉദ്ധരിച്ചുകൊണ്ട്​ പങ്കജ്​ ആരോപിക്കുന്നു. നേരത്തെ, ഹരജി ഹൈകോടതി തള്ളിയിരുന്നു.