ഡല്ഹിയില് ഇന്ന് ജിഎസ്ടി കൗണ്സില് യോഗം , പെട്രോളിയം ഉത്പന്നങ്ങളെ ജി.എസ്.ടിയുടെ പരിധിയില് കൊണ്ടുവരണമോയെന്ന കാര്യവും ചര്ച്ചയില്
ചരക്ക് സേവന നികുതി നടപ്പിലാക്കിയപ്പോഴുണ്ടായ പ്രശ്നങ്ങള് അവലോകനം ചെയ്യാന് ധനമന്ത്രി അരുണ് ജയ്റ്റ്ലിയുടെ നേതൃത്വത്തില് ഡല്ഹിയില് ഇന്ന് ജി.എസ്.ടി കൗണ്സില് യോഗം ചേരും. പുതിയ നികുതി ഘടനയെ സംബന്ധിച്ച് വിവിധ തലങ്ങളില് നിന്നുള്ള പരാതികളും നിര്ദ്ദേശങ്ങളും പരിഗണിച്ച് ആവശ്യമെങ്കില് ജി.എസ്.ടിയില് വേണ്ട മാറ്റങ്ങള് വരുത്തുമെന്നാണ് പ്രതീക്ഷ. പെട്രോളിയം ഉത്പന്നങ്ങളെ ജി.എസ്.ടിയുടെ പരിധിയില് കൊണ്ടുവരണമോയെന്ന കാര്യവും ഇന്നത്തെ യോഗത്തില് ചര്ച്ചയാകും.
ജി.എസ്.ടിയില് ആവശ്യമെങ്കില് മാറ്റം വരുത്തുമെന്ന് കഴിഞ്ഞ ദിവസം പ്രധാനമന്ത്രി നരേന്ദ്ര മോദി പറഞ്ഞിരുന്നു. ചരക്കു സേവന നികുതി മൂന്ന് മാസം കൂടി പരിശോധിച്ച ശേഷം ആവശ്യമെങ്കില് മാറ്റങ്ങള് കൊണ്ടുവരുമെന്നായിരുന്നു മോദിയുടെ പ്രസ്താവന. റിസര്വ് ബാങ്കും ഇത് സംബന്ധിച്ച നിര്ദ്ദേശം സര്ക്കാരിന് മുന്നില് വച്ചിരുന്നു.
കഴിഞ്ഞ ദിവസം നരേന്ദ്ര മോദി കേന്ദ്ര ധനമന്ത്രി അരുണ് ജയ്റ്റ്ലി, ബി.ജെ.പി ദേശീയ അദ്ധ്യക്ഷന് അമിത് ഷാ എന്നിവരുമായി ഡല്ഹിയില് കൂടിക്കാഴ്ച നടത്തിയിരുന്നു. ജി.എസ്.ടി കൗണ്സില് യോഗത്തിലെ വിഷയങ്ങളും ചര്ച്ചയുടെ ഭാഗമായെന്നാണ് സൂചന. വിവിധ സംസ്ഥാനങ്ങളിലെ ധനമന്ത്രിമാര് അംഗങ്ങളായ കൗണ്സില്, വ്യാപാരികള് എല്ലാ മാസവും മൂന്ന് ടാക്സ് റിട്ടേണുകള് ഫയല് ചെയ്യണമെന്ന നിബന്ധന ഇളവു ചെയ്യാന് ഇടയുണ്ട്. 1.5 കോടിയില് താഴെ വാര്ഷികവരുമാനമുള്ള ചെറുകിട വ്യാപാരികളെ ഇതില് നിന്നും ഒഴിവാക്കുമെന്നാണ് സൂചന.
ജി.എസ്.ടി സാമ്പത്തിക തളര്ച്ചയ്ക്ക് ഇടയാക്കിയെന്ന പ്രതിപക്ഷ പാര്ട്ടികളുടെയും ബി.ജെ.പിയിലെയും ചില നേതാക്കളുടെ പ്രസ്താവനയും യോഗത്തില് ചര്ച്ചയാകുമെന്നാണ് കരുതുന്നത്.
https://www.facebook.com/Malayalivartha
