സ്ത്രീകൾക്കെതിരായ കുറ്റകൃത്യങ്ങൾ ഇല്ലാതാക്കുമെന്നായിരുന്നു​ ബിജെപിയുടെ തെരഞ്ഞെടുപ്പ്​ വാഗ്ദാനം. എന്നാൽ രാജ്യത്ത്​ സ്​ത്രീകൾക്കെതിരായ അതിക്രമങ്ങൾ വർധിച്ചുവരുന്നതിന് ഉദാഹരണമാണ് യു.പിയിലെ ഏറ്റവും ഒടുവിലത്തെ സംഭവം. പത്തൊമ്പതുകാരിയെ മൂന്നുപ്പേർ ചേർന്ന് കൂട്ടബലാത്സംഗത്തിനിരയാക്കുകയും വെടിവെച്ച്​ പരുക്കേൽപ്പിക്കുകയും ചെയ്തു.

ബുധനാഴ്​ച രാത്രിയാണ്​ സംഭവം. ശൗചാലയമില്ലാത്തതിനാൽ ബുധനാഴ്ച്ച രാത്രി പ്രാഥമിക കൃത്യം നിർവഹിക്കാനായി ലക്​​നോവി​ന്‍റെ പ്രാന്തപ്രദേശമായ മലിഹാബാദ്​ വില്ലേജിലെ വീടിന്​ പുറത്തിറങ്ങിയതായിരുന്നു യുവതി. സംഭവത്തിൽ കരൺ, ഗോലു, മുകേഷ്​ എന്നിരെ പോലീസ് അറസ്റ്റ് ചെയ്തു. സന്ദീപ്​, രോഹിത്​ എന്നിവർക്കെതിരെ ഇരയായ പെൺകുട്ടിയുടെ ബന്ധുക്കൾ പരാതി നൽകുകയും ചെയ്​തിട്ടുണ്ടെന്ന്​ റൂറൽ പൊലീസ്​ സൂപ്രണ്ട്​ സതീഷ്​ കുമാർ പറഞ്ഞു.

സംഭവത്തിൽ സന്ദീപ്​ തന്നെ കൂട്ട മാനഭംഗത്തിന്​ വിധേയനാക്കുകയായിരുന്നുവെന്ന്​ യുവതി പറയുന്നു. ഇരയായ പെൺകുട്ടിയുടെ സഹോദരനൊപ്പം സന്ദീപി​ന്റെ സഹോദരി ഒളിച്ചോടിയതിലുള്ള പ്രതികാരമായാണ് സന്ദീപ് യുവതിയെ ആക്രമിച്ചത്. വെടിയൊച്ച കേട്ട്​ പുറത്തിറങ്ങിയപ്പോൾ അച്ഛൻ കണ്ടത്​ മകൾ ചോരവാർന്ന നിലയിൽ വീട്ടിൽ നിന്ന്​ 100 മീറ്റർ അകലെ കിടക്കുന്നതാണ്. മൂക്കിൽ പരിക്കേറ്റ യുവതിയുടെ നില ഗുരുതരമല്ല. ബൽറാംപൂർ ആശുപത്രിയിൽ ​പ്രവേശിപ്പിച്ച യുവതിയെ പിന്നീട്​ കിങ്​ ജോർജ്​ മെഡിക്കൽ യൂനിവേഴ്​സിറ്റി ട്രോമകെയറിലേക്ക്​ മാറ്റി. സംഭവം താൻ പൊലീസിൽ അറിയിക്കുമെന്ന്​ പറഞ്ഞപ്പോഴാണ്​ പ്രതികളിൽ ഒരാൾ തന്നെ വെടി വച്ചതെന്ന് യുവതി മൊഴി നൽകി. കൂട്ടമാനഭംഗത്തിനും കൊലപാതക ശ്രമത്തിനുമാണ്​ പൊലീസ്​ കേസെടുത്തിരിക്കുന്നത്.

വീട്ടിൽ തന്നെ ടോയ്​ലറ്റ്​ സ്​ഥാപിക്കാൻ ​സർക്കാർ നിർബന്ധിക്കു​മ്പോഴും ദശലക്ഷക്കണക്കിന്​ പേർ തുറസായ സ്ഥലത്ത്​ പ്രാഥമിക കൃത്യം നിർവഹിക്കുകയും അതുവഴി ലൈംഗിക അതിക്രമങ്ങൾക്ക്​ വഴിവെക്കുന്നതായും പൊലീസ്​ പറയുന്നു.