നോട്ട് നിരോധനത്തിന്റെ ഒന്നം വാര്‍ഷികമായ നവംബര്‍ എട്ടിന് പ്രതിഷേധ പരിപാടികള്‍ സംഘടിപ്പിക്കാനുള്ള കോണ്‍ഗ്രസ് നീക്കത്തിനെതിരെ പ്രധാനമന്ത്രി നരേന്ദ്ര മോഡി. നോട്ട് നിരോധനം ഇന്ദിരാ ഗാന്ധി പ്രധാനമന്ത്രി ആയിരിക്കെ ചെയ്യേണ്ടിയിരുന്ന കാര്യമാണെന്ന് മോഡി പറഞ്ഞു. നോട്ട് നിരോധിക്കാന്‍ യശ്വന്ത് റാവു ചവാന്‍ അധ്യക്ഷനായ സമിതി ശിപാര്‍ശ ചെയ്തിരുന്നു.

എന്നാല്‍ ഇന്ദിരാ ഗാന്ധി അതിന് തയ്യാറായില്ല. രാജ്യതാല്‍പ്പര്യത്തേക്കാളും സ്വന്തം പാര്‍ട്ടിയുടെ താല്‍പ്പര്യം സംരക്ഷിക്കാനാണ് അവര്‍ പ്രാധാന്യം നല്‍കിയതെന്നും മോഡി കുറ്റപ്പെടുത്തി. വേണ്ട സമയത്ത് ഇന്ദിരാ ഗാന്ധി നോട്ട് നിരോധനം നടപ്പിലാക്കിയിരുന്നെങ്കില്‍ തനിക്ക് ഭാരിച്ച ജോലി ചെയ്യേണ്ടി വരില്ലായിരുന്നെന്ന് പ്രധാനമന്ത്രി പറഞ്ഞു. കോണ്‍ഗ്രസും അഴിമതിയും തമ്മില്‍ അവിഭാജ്യമായ ബന്ധമാണ്.

കോണ്‍ഗ്രസിന്റെ മുഖമുദ്ര തന്നെ അഴിമതിയാണ്. പല കോണ്‍ഗ്രസ് നേതാക്കളും അഴിമതിക്കേസില്‍ അന്വേഷണം നേരിടുന്നവരാണെന്നും പ്രധാനമന്ത്രി പറഞ്ഞു. നോട്ട് അസാധുവാക്കലിനെ തുടര്‍ന്ന് മൂന്ന് ലക്ഷം കമ്പനികള്‍ അടച്ചുപൂട്ടി. അത്തരം അയ്യായിരം കമ്പനികളെക്കുറിച്ച് നടത്തിയ അന്വേഷണത്തില്‍ 4000 കോടി രൂപയുടെ വെട്ടിപ്പ് കണ്ടെത്തിയെന്നും പ്രധാനമന്ത്രി കൂട്ടിച്ചേര്‍ത്തു.

 നോട്ട് അസാധുവാക്കല്‍ മൂലം ബുദ്ധിമുട്ട് നേരിടേണ്ടി വന്നതാണ് കോണ്‍ഗ്രസിന്റെ രോക്ഷത്തിന് കാരണം. നടപടി കോണ്‍ഗ്രസ് നേതാക്കളുടെ ഉറക്കം കെടുത്തി. അതിന്റെ രോക്ഷം അടങ്ങിയിട്ടില്ല. സര്‍ക്കാര്‍ നടപടിയുടെ ദോഷഫലം അനുഭവിക്കേണ്ടി വന്നവരാണ് നവംബര്‍ എട്ടിന് കരിദിനം ആചരിക്കുന്നതെന്നും പ്രധാനമന്ത്രി പറഞ്ഞു.