പ്രധാനമന്ത്രി നരേന്ദ്ര മോദി നടത്തിയ 'നോട്ടു വിപ്ലവ'ത്തിന്റെ ഒന്നാം വാര്‍ഷികം നാളെ. വിനിമയം ചെയ്തുവന്ന കറന്‍സി നോട്ടുകളില്‍ 86 ശതമാനവും ഒറ്റയടിക്ക് അസാധുവാക്കിയതുമൂലം ഉണ്ടായ മാന്ദ്യം സമ്പദ്‌രംഗം അവതാളത്തിലാക്കിയ പശ്ചാത്തലത്തിലാണ് ഒന്നാം വാര്‍ഷികം.

നോട്ട് അസാധുവാക്കല്‍, ധിറുതിപിടിച്ച് ജി.എസ്.ടി നടപ്പാക്കിയത് എന്നിവ പൊതുസമൂഹത്തില്‍ ഉണ്ടാക്കിയിരിക്കുന്ന പ്രയാസങ്ങള്‍ ഉയര്‍ത്തിക്കാട്ടി ബുധനാഴ്ച പ്രതിപക്ഷ പാര്‍ട്ടികള്‍ കരിദിനം ആചരിക്കുകയാണ്. കോണ്‍ഗ്രസ്, സി.പി.എം, തൃണമൂല്‍ കോണ്‍ഗ്രസ് എന്നിവയടക്കം 18 പ്രതിപക്ഷപാര്‍ട്ടികളാണ് രാജ്യവ്യാപകമായി പ്രതിഷേധദിനാചരണം നടത്തുന്നത്.

നിര്‍ണായകമായ ഗുജറാത്ത് തെരഞ്ഞെടുപ്പിലേക്ക് നീങ്ങുന്ന ഘട്ടത്തില്‍ പ്രതിപക്ഷം നടത്തുന്ന കരിദിനാചരണത്തെ ബദല്‍ പരിപാടി സംഘടിപ്പിച്ചു നേരിടുകയാണ് ബി.ജെ.പി.

കള്ളപ്പണവിരുദ്ധ ദിനമായാണ് നവംബര്‍ എട്ട് ബി.ജെ.പി രാജ്യവ്യാപകമായി ആചരിക്കുന്നത്. അതേസമയം, നോട്ടു നിരോധനത്തെ എതിര്‍ക്കുന്നവരില്‍ ബി.ജെ.പിയുടെ തൊഴിലാളി സംഘടനയായ ബി.എം.എസുമുണ്ട്. നോട്ടും ജി.എസ്.ടിയും സൃഷ്ടിച്ച മാന്ദ്യം അടുത്ത രണ്ടു വര്‍ഷത്തേക്ക് മാറ്റമില്ലാതെ തുടരുമെന്ന സാമ്പത്തിക വിദഗ്ധരുടെ പ്രവചനം 2019ലെ പൊതുതെരഞ്ഞെടുപ്പിനെ നേരിടുന്നതില്‍ ബി.ജെ.പിയുടെ ആത്മവിശ്വാസം ചോര്‍ത്തിയിട്ടുണ്ട്. വിപണിയിലെ മരവിപ്പ്, വിലക്കയറ്റം, നോട്ട് അസാധുവാക്കലിനു പിന്നാലെ ആധാര്‍ പിന്‍ബലമാക്കി സര്‍ക്കാര്‍ കൊണ്ടുവരുന്ന നിയന്ത്രണങ്ങള്‍ എന്നിവ കടുത്ത അമര്‍ഷമാണ് ഉണ്ടാക്കിയിട്ടുള്ളത്

2016 നവംബര്‍ എട്ടിനാണ് മന്ത്രിസഭാംഗങ്ങള്‍ക്കുപോലും ശരിയായ വിവരം നല്‍കാതെ പ്രധാനമന്ത്രി നരേന്ദ്ര മോദി ടെലിവിഷനിലൂടെ രാജ്യത്തെ അഭിസംബോധന ചെയ്തത്. 500 രൂപ, 1000 രൂപ നോട്ടുകളാണ് അസാധുവായി പ്രഖ്യാപിച്ചത്. കള്ളപ്പണം, കള്ളനോട്ട്, ഭീകരത, നികുതിവെട്ടിപ്പ് എന്നിവ തടയാനും പണരഹിത സമ്പദ്‌വ്യവസ്ഥയിലേക്ക് രാജ്യത്തെ നയിക്കാനുമാണ് 15.44 ലക്ഷം കോടി രൂപയുടെ നോട്ടുകള്‍ ഒറ്റയടിക്ക് അസാധുവാക്കുന്നതെന്നാണ് സര്‍ക്കാര്‍ പറഞ്ഞത്.

എന്നാല്‍, ഒരു കൊല്ലം പിന്നിടുമ്പോള്‍ ഈ ലക്ഷ്യങ്ങളൊന്നും നടപ്പായില്ല. അസാധുവാക്കിയ കറന്‍സിയുടെ മൂല്യത്തിനുള്ള മുഴുവന്‍ നോട്ടുകളുംതന്നെ ബാങ്കുകളിലേക്ക് തിരിച്ചെത്തി. അതോടെ കള്ളപ്പണം, കള്ളനോട്ട് തുടങ്ങിയവക്കെതിരായ പോരാട്ടമാണ് സര്‍ക്കാര്‍ നടത്തിയതെന്ന പ്രതീതി പോയ്മറഞ്ഞു. സര്‍ക്കാറിന്റെ പ്രഖ്യാപിത ലക്ഷ്യങ്ങളെല്ലാം പാളി.

കൃഷിയും വ്യാപാരവും വ്യവസായവുമെല്ലാം ഒരുപോലെ തളര്‍ത്തിയ നോട്ടു പരിഷ്‌കാരം ഉണ്ടാക്കിവെച്ച പ്രതിസന്ധിയില്‍നിന്ന്, അതിന്റെ നടത്തിപ്പുകാരായ ബാങ്കുകളും കരകയറിയിട്ടില്ല. പലിശനിരക്കുകള്‍ കുറച്ചെങ്കിലും വാങ്ങല്‍ശേഷി പോയതിനാല്‍ നിക്ഷേപ, വായ്പ തോതിലെ അന്തരം വര്‍ധിച്ചുനില്‍ക്കുകയാണ്.