ജമ്മു കാശ്മീരില്‍ വീണ്ടും കനത്ത മഴ ആരംഭിച്ചതിനാല്‍ രക്ഷാപ്രവര്‍ത്തനം പ്രതിസന്ധിയിലാണ്. മേഖലകളില്‍ മഴയും ഇടിമിന്നലും ശക്തമായി തുടരുകയാണ്. കഴിഞ്ഞ ദിവസങ്ങളില്‍ മഴ കുറഞ്ഞിരുന്നതിനാല്‍ ദുരിതാശ്വാസ പ്രവര്‍ത്തനങ്ങള്‍ കൂടുതല്‍ ശക്തിപ്രാപിച്ചുവരുകയായിരുന്നു. അതിനിടയിലാണ് മഴ വീണ്ടും ശക്തമായത്.

ജമ്മുകശ്മീരില്‍ കൈക്കൊണ്ട അടിയന്തിര ദുരിതാശ്വാസ പ്രവര്‍ത്തനങ്ങള്‍ എന്തെല്ലാമെന്നു തിങ്കളാഴ്ച അറിയിക്കണമെന്നു സുപ്രീംകോടതി കേന്ദ്രത്തോട് ആവശ്യപ്പെട്ടിട്ടുണ്ട്. പ്രളയം ദേശീയ ദുരന്തമായി കണ്ടു നടപടികള്‍ സ്വീകരിക്കണമെന്നും കോടതി നിരീക്ഷിച്ചിരുന്നു. മഴ ശമിച്ചതോടെ മിക്കയിടങ്ങളിലും ജലനിരപ്പ് താഴ്ന്നിരുന്നു. പക്ഷേ ആയിരക്കണക്കിനാളുകള്‍ ഇപ്പോഴും പലയിടങ്ങളിലായി കുടുങ്ങിക്കിടക്കുകയാണ്. മരണ സംഖ്യ 250 കടന്നു. ഒറ്റപ്പെട്ട മേഖലയില്‍ കുടങ്ങിക്കിടക്കുന്നവര്‍ക്കു ദിവസവും കുടിവെള്ളവും ആഹാര സാധനങ്ങളും വിതരണം ചെയ്യുന്നുണ്ട്.

ജനങ്ങളുടെ പുനരധിവാസത്തിനും പുനര്‍നിര്‍മാണ പ്രവര്‍ത്തനങ്ങള്‍ക്കുമായി സംസ്ഥാന സര്‍ക്കാര്‍ 200 കോടിയുടെ ധനസഹായ പാക്കേജ് പ്രഖ്യാപിച്ചിട്ടുണ്ട്. മരിച്ചവരുടെ കുടുംബാംഗങ്ങള്‍ക്ക് മൂന്നരലക്ഷം രൂപ സഹായമായി നല്‍കും. വീടു തകര്‍ന്നവര്‍ക്കു പുനര്‍ നിര്‍മാണത്തിനായി ആദ്യഗഡുവായി 75,000 രൂപ അനുവദിച്ചു.