സന്തോഷത്തോടൊപ്പം ആശങ്കയും പ്രവാസികള്‍ക്കുണ്ട്. രൂപ ഇങ്ങനെ താഴോട്ട് പോയാല്‍ നാട്ടിലെ സ്ഥിതി അവതാളത്തിലാകുമെന്നാണ് ഭയം. ദുബായ് ഡോളറിനെതിരെ രൂപ അതീവ ദുര്‍ബലമായതോടെ ഗള്‍ഫ് കറന്‍സികളുമായുള്ള വിനിമയ നിരക്ക് കൂടി. റിയാലിനും ദിര്‍ഹത്തിനും മൂല്യം ഇരുപത് രൂപയാകുമെന്ന പ്രതീക്ഷയിലാണു സൗദിയിലേയും യു.എ.ഇയിലേയും പ്രവാസികള്‍. രാജ്യാന്തര വിപണിയില്‍ ദിര്‍ഹത്തിന് ഇന്നലെ 19.78 രൂപയായിരുന്നു മൂല്യം.

ഇതിന്റെ ഭലമായി ഇന്ത്യയില്‍ വിലക്കയറ്റവും പണപ്പെരുപ്പവുമുണ്ടാകും. പെട്രോള്‍ വില കൂടാനുള്ള ഒരു പ്രധാന കാരണമും കാരണവും ഇതാണ്.

കുവൈത്ത് ദിനാറിന് 239 രൂപ 58 പൈസയാണ് ഇന്നലെ വൈകിട്ടത്തെ നിരക്ക്. ബഹ്‌റൈന്‍ ദിനാര്‍ (192.51), ഒമാന്‍ റിയാല്‍ (188.49), ഖത്തര്‍ റിയാല്‍ (19.93), യുഎഇ ദിര്‍ഹം (19.76), സൗദി റിയാല്‍ (19.35) എന്നിങ്ങനെയാണ് മറ്റു രാജ്യങ്ങളിലെ വിനിമയ നിരക്ക്. പ്രാദേശിക വിപണിയില്‍ പത്തു മുതല്‍ ഇരുപത് പൈസ വരെ കുറഞ്ഞ നിരക്കിലാണ് വിവിധ രാജ്യങ്ങളിലെ ധനവിനിമയ സ്ഥാപനങ്ങള്‍ നല്‍കുന്നത്.

ഈ സ്ഥിതി ഇങ്ങനെ തന്നെ തുടരും

യു.എസ് ചൈന വ്യാപാരബന്ധത്തിലെ ഉലച്ചില്‍, അമേരിക്കയിലെ ബാങ്ക് പലിശ വര്‍ധന, തുര്‍ക്കിയിലെയും അര്‍ജന്റീനയിലെയും സാമ്പത്തിക മാന്ദ്യം, അമേരിക്കയും ഇറാനും തമ്മിലുള്ള ബന്ധം വഷളായത്, എണ്ണവിലയിലുണ്ടായ വര്‍ധന മുതലായവയാണ് രൂപയുടെ വിലയിടിയാന്‍ കാരണമായതെന്ന് ഫിനാബ്ലര്‍ എക്‌സിക്യൂട്ടീവ് ഡയറക്ടറും യു.എ.ഇ. എക്‌സ്‌ചേഞ്ച് ഗ്രൂപ്പ് സി.ഇ.ഒ.യുമായ പ്രമോദ് മങ്ങാട്ട് പറഞ്ഞു. ക്രൂഡ് ഓയില്‍ വിലയും നിലവിലെ ആഗോള രാഷ്ട്രീയ പരിതസ്ഥിതിയും കണക്കിലെടുത്താല്‍ കുറച്ചുനാള്‍കൂടി ഈ സ്ഥിതി തുടരുമെന്നാണ് വിപണി നല്‍കുന്ന സൂചനകളെന്നും അദ്ദേഹം പറഞ്ഞു. ദിര്‍ഹവുമായുള്ള വിനിമയമൂല്യം ഇനിയും കൂടുമെന്നും പ്രവാസികള്‍ക്ക് നാട്ടിലേക്ക് കൂടുതല്‍ പണമയക്കാന്‍ ഇത് സഹായമാകുമെന്നും അദ്ദേഹം അഭിപ്രായപ്പെട്ടു.