ഗ്രാമത്തില്‍ നിലയും വിലയുമുണ്ടാവണമെങ്കില്‍ ആണ്‍മക്കള്‍ വേണം. ആണ്‍കുട്ടികളുള്ള അമ്മമാര്‍ക്കേ ഇവിടെ വിലയുള്ളൂ. അല്ലാത്തവരെ കാണുമ്പോള്‍ നാട്ടുകാര്‍ക്ക് പുച്ഛമാണ്. തെലങ്കാനയിലെ നല്‍ഗോണ്ട ജില്ലയിലാണ് ഈ വിചിത്രമായ വിശ്വാസം. ഇവിടുത്തെ സ്ത്രീകള്‍ ആണ്‍കുഞ്ഞിനെ കിട്ടുന്നതുവരെ പ്രസവിച്ചുകൊണ്ടേ ഇരിക്കും. ഒരു പ്രമുഖ മാധ്യമമാണ് ഇക്കാര്യം റിപ്പോര്‍ട്ട് ചെയ്തത്.

ഒരു സ്ത്രീക്ക് പതൊമ്പതാമത്തെ പ്രസവത്തിലാണ് ആണ്‍കുഞ്ഞ് പിറന്നത്. എന്നാല്‍ അവിടെയും നിര്‍ത്തിയില്ല. പിന്നീട് പിറന്ന രണ്ടും ആണ്‍കുട്ടികള്‍ തന്നെ. ശേഷം പ്രസവം നിര്‍ത്തി. 48 വയസിലാണ് ഇവര്‍ക്ക് ആണ്‍കുഞ്ഞ് പിറന്നത്. രമാവാത് സീതിയുടെ കഥയും മറിച്ചല്ല. അവര്‍ക്ക് പതിമൂന്നാമത്തെ പ്രസവത്തിലാണ് ആണ്‍കുട്ടിയെ ലഭിച്ചത്. മുദുദഡ്‌ല ഗ്രാമത്തില്‍ മൊത്തം ഈ വിശ്വാസം നിലനില്‍ക്കുന്നുണ്ട്. പെണ്‍കുട്ടികള്‍ കല്യാണം കഴിഞ്ഞ് മറ്റു കുടുംബത്തിലേക്ക് പോവും. ആണ്‍മക്കളാണ് വയസാവുമ്പോള്‍ രക്ഷക്കുണ്ടാവുകയെന്ന് പറയുന്നു.

പ്രായം ചെല്ലുമ്പോഴുള്ള സഹായം മാത്രമല്ല ആണ്‍കുട്ടികളെ കൊണ്ടുള്ള മെച്ചം.
ഇവിടെ ആണ്‍കുട്ടികള്‍ക്ക് മാത്രമേ ഉന്നത വിദ്യാഭ്യാസം നല്‍കുകയുള്ളൂ. പെണ്‍മക്കള്‍ കുറച്ച് പഠിച്ചാല്‍ മതിയെന്നാണ് നാട്ടുനടപ്പ്. കാരണം അവരെ പഠിപ്പിച്ചിട്ട് കാര്യമില്ല. പെണ്‍മക്കളെ കുറച്ച് കാലമല്ലേ സ്വന്തം വീട്ടില്‍ കിട്ടൂ. പിന്നീടവര്‍ ഭര്‍ത്താവിന്റെ വീട്ടിലല്ലേ താമസിക്കുക..

ലക്ഷ്മിയുടെ മകന്‍ മഹേഷിന് ഇപ്പോള്‍ 25 വയസുണ്ട്. ബിരുദാനന്തര ബിരുദം നേടിയ മഹേഷ് അടുത്തിടെ ഗ്രൂപ്പ് രണ്ട് എന്‍ട്രന്‍സ് പരീക്ഷ എഴുതി. മഹേഷിന്റെ ചേച്ചിക്ക് ഇയാളേക്കാള്‍ ഒരുവയസ് മാത്രമാണ് കൂടുതല്‍. പക്ഷേ സ്‌കൂളില്‍ പോയിട്ടേയില്ല. ഈ ഗ്രാമത്തില്‍ പെണ്‍കുട്ടികള്‍ക്ക് പഠിക്കാന്‍ മതിയായ സൗകര്യവും ലഭ്യമല്ല.