ശത്രുദോഷം തീര്‍ക്കാനെത്തിയ പൂജാരി യുവതിയെ പീഡിപ്പിച്ച്‌ നഗ്നചിത്രമെടുത്ത്‌ ഇന്റര്‍നെറ്റിലിട്ടു
ദോഷപരിഹാരക്രിയകള്‍ക്കായെത്തി യുവതിയെ പീഡനത്തിനിരയാക്കി നഗ്‌നചിത്രമെടുത്ത പൂജാരിയെ അറസ്റ്റ്‌ചെയ്തു. കയറാടി പുത്തന്‍ചള്ള പുതിയപടിക്കല്‍ മുരളികുമാറിനെയാണ് അറസ്റ്റ്‌ചെയ്തത്.കയറാടി ഒലിപ്പാറ മാനംകൊട്ടപൊറ്റ അയ്യപ്പക്ഷേത്രത്തിലെ പൂജാരിയും വീടുകളിലെ ദോഷപരിഹാരത്തിനായി പൂജകള്‍ ചെയ്തുകൊടുക്കുന്നയാളുമാണ് മുരളി.
ആലത്തൂര്‍പോലീസില്‍ യുവതിനല്‍കിയ പരാതിയുടെ അടിസ്ഥാനത്തിലാണ് നെന്മാറ ബസ്സ്റ്റാന്‍ഡില്‍വെച്ച് മുരളികുമാറിനെ കസ്റ്റഡിയിലെടുത്തത്. പീഡിപ്പിച്ചതിനും സൈബര്‍ ആക്ട് പ്രകാരം അനുവാദമില്ലാതെ ചിത്രമെടുത്തതിനും ചിത്രം പ്രചരിപ്പിച്ചതിനും കേസെടുത്ത് ഇയാളെ അറസ്റ്റ് ചെയ്തു ആലത്തൂര്‍ കോടതിയില്‍ ഹാജരാക്കി. കോടതി ഇയാളെ 15 ദിവസത്തേക്ക് റിമാന്‍ഡ് ചെയ്തു.
രണ്ടുവര്‍ഷംമുമ്പ് ദോഷപരിഹാരപൂജകള്‍ നടത്തുന്നതിനായാണ് യുവതി ഇയാളെ സമീപിച്ചത്. പലപ്പോഴായി വീട്ടിലെത്തി പൂജകള്‍ചെയ്യുകയും ചെയ്തു. ഇതിനിടെ യുവതിയെ പീഡനത്തിനിരയാക്കിയ പൂജാരി ഭീഷണിപ്പെടുത്തി നഗ്‌നചിത്രങ്ങള്‍ മൊബൈല്‍ ഫോണില്‍ പകര്‍ത്തിയെടുക്കുകയും ചെയ്തുവെന്ന് പരാതിയില്‍ പറഞ്ഞു. ഈ ചിത്രംകാണിച്ച് ഭീഷണിപ്പെടുത്തി വീണ്ടും പീഡനത്തിനിരയാക്കിയെന്നാണ് പരാതി.
വിദേശത്തുനിന്ന് നാട്ടിലെത്തിയ യുവതിയുടെ ഭര്‍ത്താവിനെയും ഈ നഗ്‌നചിത്രങ്ങള്‍ കാണിച്ച് ഭീഷണിപ്പെടുത്തി വന്‍ തുക ആവശ്യപ്പെട്ടതായും പറയുന്നു. ഈ ഫോട്ടോകള്‍ ഇന്‍റര്‍നെറ്റുവഴി പ്രചരിപ്പിക്കുകയും പലര്‍ക്കും കൈമാറുകയും ചെയ്തുവെന്ന് പോലീസ് കണ്ടെത്തി.
https://www.facebook.com/Malayalivartha
