ജീവിതത്തിനും മരണത്തിനും ഇടയിലെ ദൂരം, അബ്ദുല് ലത്തീഫിന് അഞ്ചു കിലോമീറ്റര്!
ചെളിയും തണുപ്പും നിറഞ്ഞു കുതിച്ചൊഴുകുന്ന പെരിയാറില് പാതാളം പാലത്തിനു സമീപം ഇന്നലെ ഉച്ചയ്ക്കു പന്ത്രണ്ടോടെയാണ് തലയുയര്ത്തിയ നിലയില് ഒരാള് ഒഴുകിപ്പോകുന്നത് ഇടമുളയില് തീരത്തിരിക്കുകയായിരുന്ന യുവാക്കള് കണ്ടത്.
കലങ്ങിമറിഞ്ഞൊഴുകുന്ന പുഴയിലേക്കു ചാടാന് അവര് ഭയന്നു. ഉടന് തന്നെ യുവാക്കള് ഏലൂര് നഗരസഭാ കൗണ്സിലറായ ജോസഫ് ഷെറിയെ വിവരമറിയിച്ചു. ഷെറി അഗ്നിരക്ഷാസേനയെയും. ഏലൂര് അഗ്നി രക്ഷാനിലയത്തിലെ സേനാംഗങ്ങളും ഷെറിയും പാതാളം പാലത്തിലേക്കു കുതിച്ചെത്തി.
ഈ സമയം ആ യുവാവ് പാതാളം പാലത്തില് നിന്ന് 200 മീറ്ററോളം അകലെയെത്തിയിരുന്നു. പാലത്തിലെത്തുന്നതിനു മുന്പുള്ള പുഴയുടെ വളവ് അയാള്ക്ക് രക്ഷയായി. ഈ ഭാഗത്തേക്ക് ഒഴുകിയെത്തിയപ്പോള് പുല്ക്കൂട്ടത്തില് പിടിത്തം കിട്ടി. അവിടെ പുല്ലില് പിടിച്ചു കിടന്ന അയാളെ അഗ്നിരക്ഷാസേന രക്ഷപ്പെടുത്തുകയായിരുന്നു.
ഏലൂക്കര വടക്കേപ്പറമ്പില് അബ്ദുല് ലത്തീഫിന് (35) ഇഎസ്ഐ ആശുപത്രിയില് പ്രാഥമിക ചികില്സ നല്കിയ ശേഷം വീട്ടിലയച്ചു. വീടിനു സമീപത്തു പുഴയില് കുളിക്കാനിറങ്ങിയതാണെന്നാണ് ഫയര്ഫോഴ്സിനോടും നാട്ടുകാരോടും ലത്തീഫ് പറഞ്ഞത്. ജീവിതത്തിനും മരണത്തിനുമിടയില് ലത്തീഫ് നീന്തിയത് അഞ്ചു കിലോമീറ്ററാണ്.
https://www.facebook.com/Malayalivartha