ബസിനുള്ളില് വച്ച് കണ്മുന്നില് മോഷണം നടന്നപ്പോള് ഒന്നു പകച്ചു പോയെങ്കിലും യുവതിയെ അതിവിദഗ്ധമായി വിദ്യാര്ഥിനി പോലീസിലേല്പ്പിച്ചു!
സഹയാത്രക്കാരിയുടെ പേഴ്സ് കെ എസ് ആര് ടി സി ബസിനുള്ളില് വച്ച് വിദഗ്ധമായി അടിച്ചു മാറ്റിയ യുവതിയെ അതിലും വിദഗ്ധമായി പോലീസിലേല്പ്പിച്ച ബികോം വിദ്യാര്ഥിനിയാണ് സോഷ്യല് മീഡിയയില് താരമാകുന്നത്. തൃശൂരില് നിന്നും ചാലക്കുടിയിലേക്ക് പോകുകയായിരുന്ന കെഎസ് ആര് ടി സി ബസില് നെല്ലായിയില് നിന്നുമാണ് കോളജ് വിദ്യാര്ഥിനിയായ ദേവഗംഗ കയറിയത്.
കയറിയപാടെ മൂന്നു പേര്ക്ക് ഇരിക്കുവാന് സാധിക്കുന്ന സീറ്റില് ദേവഗംഗയ്ക്ക് ഇരിക്കാന് സീറ്റ് ലഭിച്ചു. ഈ സീറ്റില് ഒരു സ്ത്രീ മാത്രമാണ് ഉണ്ടായിരുന്നത്. സ്റ്റോപ്പ് എത്തിയപ്പോള് ഈ സ്ത്രീ സീറ്റില് നിന്നും എഴുന്നേറ്റു. അപ്പോള് അവിടെ ഇരിക്കുവാനായി വന്ന മറ്റൊരു യുവതി, എഴുന്നേറ്റ സ്ത്രീയുടെ പേഴ്സ് കൈക്കലാക്കി. ഞൊടിയിടയില് നടന്ന ഈ മോഷണം ദേവഗംഗയുടെ കണ്മുന്നിലാണ് നടന്നത്. പഴ്സ് നഷ്ടമായതറിയാതെ ഈ സ്ത്രീ സ്റ്റോപ്പില് ഇറങ്ങിയപ്പോള് കണ്മുമ്പില് നടന്ന മോഷണത്തിന്റെ പകപ്പിലായിരുന്നു ദേവഗംഗ.
പേഴ്സ് കൈക്കലാക്കിയ യുവതി ദേവഗംഗയുടെ സമീപത്തായി വന്നിരുന്നു. ഇവര് രണ്ടുപേരുടേയും നടുവില് മറ്റൊരു കുട്ടിയും ഇരിക്കുന്നുണ്ടായിരുന്നു. ഭയന്നു വിറച്ച ദേവഗംഗ എന്തുചെയ്യണമെന്നറിയാതെ ഇരുന്നു പോയി. എന്തെങ്കിലും ഉടനെ ചെയ്യണമെന്ന് തീരുമാനിച്ചുറപ്പിച്ച ദേവഗംഗ തന്റെ ഫോണില് ഗൂഗിളില് സെര്ച്ച് ചെയ്ത് ചാലക്കുടി പോലീസ് സ്റ്റേഷന്റെ നമ്പര് എടുത്തു. ഉടന് തന്നെ പതിഞ്ഞ ശബ്ദത്തില് പോലീസിനോട് മോഷണത്തെ കുറിച്ചു പറയുകയും ബസ് ചാലക്കുടി എത്താറായെന്ന് അറിയിക്കുകയും ചെയ്തു.
ഇത്രയും പറഞ്ഞപ്പോഴേക്കും മോഷണം നടത്തിയ യുവതി അടുത്ത സ്റ്റോപ്പില് ഇറങ്ങാന് തുടങ്ങുകയായിരുന്നു. രണ്ടാമതൊന്ന് ചിന്തിക്കാന് നില്ക്കാതിരുന്ന ദേവഗംഗ ഇവര്ക്കൊപ്പം സ്റ്റോപ്പില് ഇറങ്ങുകയും ചെയ്തു. നടന്നു നീങ്ങിയ മോഷ്ടാവിന്റെ പിന്നാലെ ഈ കുട്ടിയും നടന്നു. ഈ സമയം പോലീസുകാര് സ്ഥലത്തെത്തി. ദേവഗംഗയുടെ അടുക്കല് പോലീസ് വണ്ടി നിര്ത്തിയപ്പോള് പന്തികേടു തോന്നിയ മോഷ്ടാവ് അടുത്ത ബസില് കയറി സ്ഥലം വിടാനൊരുങ്ങി. പെട്ടെന്നു തന്നെ പോലീസ് വാഹനത്തില് കയറിയിട്ട് ദേവഗംഗ അവരോട് പറഞ്ഞു, 'സാര്, മോഷ്ടാവ് ആ ബസിലുണ്ട്'. മുമ്പോട്ടു കുതിച്ച പോലീസ് വാഹനം ബസിനെ കുറുകെ തടഞ്ഞു നിര്ത്തുകയും ഞൊടിയിടയില് മോഷ്ടാവിനെ പിടികൂടുകയുമായിരുന്നു. മോഷണം പോയ പേഴ്സും ഇവരില് നിന്നും കണ്ടെടുത്തു.
തമിഴ്നാട് മധുരൈ സ്വദേശിനിയായ എസക്കിയാണ് പിടിയിലായത്. തൃശൂരിലും കൊച്ചിയിലുമുള്ള തിരക്കുള്ള ബസില് കവര്ച്ച നടത്താന് തന്റെ കൂടെയുള്ള സ്ത്രീകള് ഇറങ്ങിയിട്ടുണ്ടെന്നാണ് ഇവര് പോലീസിനോടു പറഞ്ഞിരിക്കുന്നത്. ബുദ്ധി ഉപയോഗിച്ച് മോഷ്ടാവിനെ പിടികൂടിയ ദേവഗംഗ ഇപ്പോള് നാട്ടിലും കോളജിലും ഹീറോയായി മാറിയിരിക്കുകയാണ്. ചാലക്കുടി സ്വാമി വിവേകാനന്ദ കോളജിലാണ് ദേവഗംഗ പഠിക്കുന്നത്.
https://www.facebook.com/Malayalivartha